Read njo EZEKIEL 34 Bible Online

EZEKIEL 34 - njo bible

EZEKIEL 34

¹KIBUBA O kü dangi aru,

²“Nisung chir, Israel sannükertem anema shiang; shina jembiang, aser parnok dang shiang, yamai KIBUBA Tsüngremi ashir, pei dang mesüba Israel sannükertem asoshi aiatai! Sannükertemi santem memesütsü no?

³Nenoki temo achir, nenoki tezüng sü abener, tejebketba nenoki tepseter, saka nenoki santem memesür.

⁴Nenoki tashi maitbatem tashi meitdaktsü, mesüra shiranger manebtsü, mesüra zübubang maleptsü, mesüra mashileni aor meyipa anir maru, mesüra tesamaba mebushi; saka tashiyim aser tesashi agi nenoki parnok madak yimsü asü.

⁵ Parnok prokshia ao, kechiaser sannüker maliasü, aser moapu nung shiruru ajak asoshi parnok chiyungtsü aküm, aser prokshia ao.

⁶Kü santem tenem ajak ajanga, aser ungsem ali jak ajak nung prokshia liasü, aser parnok bushitsü mesüra reprangtsü shinga maliasü.

⁷“Anungji, nenok sannükertem KIBUBA O angang;

⁸Ni azüngashir, ta KIBUBA Tsüngremi ashir, kü san telok tetepsettsü kümdaktsü nungji, sannüker malibayong kü santem moapu nung shiruru ajak asoshi chiyungtsü aküm, mesüra kü sannükertemi kü santem mebushi; saka sannükertemi parnok sasa pei mesü, aser kü santem memesü;

⁹anungji, nenok sannükertem, KIBUBA O angang;

¹⁰Yamai KIBUBA Tsüngremi ashir, Ajiang ni sannükertem anema lir; aser parnok ket nungi ni kü santem akangtsü, aser santem mesüba nungi anendaktsütsü, mesüra joko sannükertema parnok sasa pei memesüdaktsütsü; aser parnok asoshi kü santem chiyungtsü mekümdaktsütsü asoshi ni parnok kümzüktsü.

¹¹“Kechiyong yamai KIBUBA Tsüngremi ashir: Ajiang, ni kü sasa, oda nisa kü santem bushitsü, aser parnok angutsü.

¹²Prokshia aliba pei san rongnung sannüker anüngdang pei san telok bushiba ama, yamaji ni kü santem bushitsü; aser mepet sübanga aser mangmanga aliba anogo nung kechi nungsa parnok prokshia ali ni talidak ajak nungi parnok kümzüktsü.

¹³Ni parnok kintem nungi anitettsü, aser linük nungi anitentsü; aser parnok pei limai bener arutsü; aser ni parnok Israel tenem nung, tzü ayimdak anasa aser talitsü tajungdak ajak nung mesütsü.

¹⁴Chiyimdak tajungdak ni parnok mesütsü, aser Israel tenem kolak nung parnok mejangdak ki alitsü; yangji ki tajung nung parnok mejangtsü, aser chiyimdak tajung nung, Israel tenem manung parnok chiyimtsü.

¹⁵Ni kü santem mesütsü, aser ni parnok mejangdaktsütsü, ta KIBUBA Tsüngremi ashir.

¹⁶Koba sama-a liasü ni bushitsü, aser aridoka alibaji ni tanaben anir arutsü, aser yiruba zübu ni alenteptsütsü, aser tashi maiter tashi itshidaktsütsü; teyira aser tashi aiter ni samatsütsü, ni parnok ochishiba agi mesütsü.

¹⁷“Nenok asoshibo, Oh kü san telok, Yamai KIBUBA Tsüngremi ashir, ajiang, san o san na tsüngda nung, san tepung o nabong tepung nata ni o bendangtsü.

¹⁸Chiyimdak tajung nung chiyimdaktsütsüba ya tila ka dang asü? Anünga aliba chiyimdak manung nenok tetsüng agi ajemshitsü? Tzü temerük ajemtsübaji nenok asoshi teperi masü no? Tzü tanüngbajibo nenoki menendaktsütsüba asü?

¹⁹Nenoki kechi tetsüng agi ajemshia aser kechi menentsü aji kü santem achitsü aser ajemtsü asü?

²⁰“Anungji yamai KIBUBA Tsüngremi parnok dang ashir, ajiang, ni oda, san teyira aser san tekongra tsüngda nung o bendangtsü.

²¹Kechiaser nenoki tesa aser tapubang agi nungoktsür, aser parnok ajaklen prokshia meyok tashi nenok tezü agi tashi maiter ajak dang atonger.

²²Anungji ni kü san kümzüktsü, aser parnok joko tetepsettsü mekümdaktsütsü, aser ni san o san na o bendangtsü.

²³Aser ni parnok madak sannüker ka, parnok anüktsü yutsütsü, oda kü tenzüker Dawid, pai parnok mesütsü, aser pa parnok sannüker asütsü.

²⁴Aser ni KIBUBA, par Tsüngrem asütsü, aser kü tenzüker Dawid parnok rongnung chuba asütsü, ni KIBUBAi aji jembiogo.

²⁵“Aser ni parnok den yimjung tezüngzüktepba ka yanglutsü, aser linük nungi shiruru tamajung piladaktsütsü; aser min nung mejangtsü.

²⁶Ni parnok meketa ungsem talidakji temoatsü ka kümdaktsütsü; aser ni tzünglupu pei tsüngkhüm nung aludaktsütsü; aser yangji temoatsü tzünglupu alitsü.

²⁷Aser moapu süngdongi pei tejang tangtsütsü, aser alimai pei dak adokba agütsütsü, aser parnok pei lima nung kümzüka alitsü; aser kodang parnok tartangtsü süngra ni raksadakja, alar kümdaktsübapurtem nungi ni parnok kümzüktsü parnoki ni KIBUBA lir ta metettsü.

²⁸Joko parnok kintem dang tetepsettsü makümtsü, mesüra alima shirurui parnok memeyoktsü; saka parnok kümzüka alitsü, aser shingaia parnok metsübudaktsütsü

²⁹Ni parnok asoshi nüngtugu asütsü tzünütsü ka adokdaktsütsü, aser joko parnok linük nung ayawara agi mesamadaktsütsü, mesüra kintem tsüngdang parnok mak masütsü.

³⁰Aser parnoki ni KIBUBA parnok Tsüngrem parnok den lir, aser parnok Israel kidong, kü nübur ta metettsü ta KIBUBA Tsüngremi ashir.

³¹Aser nenok kü santem, kü chiyimdak aliba santem, nisung lir, aser ni nenok Tsüngrem lir” ta KIBUBA Tsüngremi ashir.