Read njo EZEKIEL 35 Bible Online

EZEKIEL 35 - njo bible

EZEKIEL 35

¹ Ano KIBUBA O kü dangi aru;

²“Nisung chir, Seir tenem anema ne tejak shiang, aser iba anema shinang,

³aser iba dang shiang. Yamai KIBUBA Tsüngremi ashir. Oh Seir tenem, ajiang, ni na anema lir, aser na anema kü teka mekangtsü; aser ni na azüngmeyakdak ka kümdaktsütsü.

⁴Ni ne yimtitem raksa-a toktsütsü, aser na azüngmeyaka toktsütsü, aser nai ni KIBUBA ta metettsü.

⁵“Kechiaser nai teti Israel chirtem anema tsükchitepa liasü, aser parnok temerenshi tatembang mapang nung nai Israel chirtem nok tashi nem bendanga agütsü.

⁶Anungji KIBUBA Tsüngremi azüngashia ashir, Ni nai azü tokshiba atema aitsütsü, aser azüi ne sülen aria arutsü, nai azü sempa-a ali nung azüi na arishitsü.

⁷Yamaji ni Seir tenem tesüngmangtsü aser azüngmeyakdak kümdaktsütsü; aser pa nungi shiba arudir aser odir ni pa leptoktsü,

⁸aser iba tenemtem tetepsetba agi süngdaktsütsü; ne ungsem, ne lenten aser ne tzü ayimdak ajak nung nok agi tepsetertem, parnok laotsü.

⁹Ni na teti azüngmeyakdak kümdaktsütsü, aser ne yimtitem nisung melidaktsütsü; aser nenoki ni KIBUBA ta metettsü.

¹⁰“Kechiyong nai, kin ana aser alinük anaji kü meyong asütsü, aser ni itemji amangtsü ta KIBUBA yangji liaka ashi.

¹¹Anungji KIBUBA Tsüngremi azüngashia ashir, ne ain adokba yari, aser pa anema nai tesempaba agi tenük meremba yari ni inyaktsü; kodang ni na o bendangdir, ni kü sasa parnok rongnung meteta kümdaktsütsü.

¹²Nenoki Israel tenemtem anema, itemji asenok meyong lir, itemji asenok chiyungtsü asoshi agütsü ta tatalaba ajak ni angashia lir ta nenoki metettsü.

¹³Kechiaser nenok tebang agi ni anema mezümeküma jembi aser ni itemji angashi.

¹⁴Anungji KIBUBA Tsüngremi yamai ashir: Alima rangben pelatepdang ni na azüngmeyaka kümdaktsütsü.

¹⁵Israel senmang madak, azüngmeyaka toktsübayong nenok pelatepba ama, yamaji ni nenok den inyaktsü. Nenok azüngmeyaka alitsü, Oh Seir tenem, aser Edom ajonga teraksa alitsü, aser parnoki ni KIBUBA ta metettsü.