Read njo EZEKIEL 36 Bible Online

EZEKIEL 36 - njo bible

EZEKIEL 36

¹“Na, nisung chir, Israel tenemtem dang shin o jembiang, aser shiang, nenok Israel tenemtem, KIBUBA O angang.

²Yamai KIBUBA Tsüngremi ashir; kechiaser tsükchiri na anema ashir, Aha! Akhi tenemtem asen meyong kümogo;

³anungji shin o jembiang aser shiang. Yamai KIBUBA Tsüngremi ashir, kechiaser oda parnoki nenok azüngmeyaka toktsü aser tanüngba kintem meyong akümtsü asoshi ajaklen nungi ajensatsü, aser nisungtemi nenok indang jembitsü aser tamajung osang sensaksemtsü kümdaktsü;

⁴anungji, nenok Israel tenemtem, KIBUBA Tsüngrem O angang; yamai KIBUBA Tsüngremi tenem aser ungsemtem dang, tzü ayimdak aser lenten dang, aser azüngmeyaka jentoka aliba dang aser sentoka adokba yimtitem, koba meketa aliba tanüngba kintem madang tungusettsü aser tatalatsü küma lir, item dang ashir;

⁵anungji KIBUBA Tsüngremi yamai ashir: Kü nükmiba mi nungi ni tanüngba kintem aser Edom ajak anema jembiogo, shirnoki sensamasa mulungsentsü agi parnoki pei asoshi, endokadoktsü atema kü linük agi.

⁶Anungji Israel linük indang shin o jembiang, aser tenemtem dang, aser ungsemtem dang tzü ayimdak aser lenten dang shiang, yamai KIBUBA Tsüngremi ashir: Ajiang, ni kü tenükmiba aser ain aitba nung jembiogo, kechiaser kintem maksü nenoki aben.

⁷Anungji yamai KIBUBA Tsüngremi ashir; Ni kü ket mekanga, atangji nenok meketa aliba kintemi parnok maksü abentsü ta azüngashi.

⁸“Saka nenok, Oh Israel tenemtem, kongsangtem adoktsü, aser nenok tejang ne nübur Israel nem tangtsütsü; kechiaser itemji arutsü mapang ana nung lir.

⁹Kechiyong ajiang ni nenok asoshi lir, aser ni nenok dangi meyiptsü, aser nenok tusatsü aser metsü proktsü.

¹⁰Aser oda Israel kidong ajonga nung, ni nenok dak nisung ajak renlokdaktsütsü aser yimtitem nung nisung lidaktsütsü, aser teraksa linüktemji yanglutsü,

¹¹aser ni nenok madak nisung aser shiruru soyapokyadaktsütsü, aser parnok züintsü aser rena tejang atangtsü; aser akhidang anogo nung ama ni nenok lidaktsütsü, aser mezüng dang nungi tajungba nenok dang benshitsü, anungji nenoki ni KIBUBA lir ta metettsü.

¹²Hau, kü nübur Israel madak nisungtemi ajemshitsüsa ni kümdaktsütsü; aser parnoki na agitsü, aser na parnok senmang asütsü, aser tang nungi joko parnok tanur asoshi lurepa mekümdaktsütsü.

¹³“Yamai KIBUBA Tsüngremi ashir, kechiaser parnoki nenok dang, nisung meyokadokerji na, nai ne purtem tanur lurepa mekümdaktsür ta ne dang ashir,

¹⁴anungji joko nai nisungtem memeyoktsü, mesüra joko ne nüburtem tanur lurepa mekümdaktsütsü, ta KIBUBA Tsüngremi ashir;

¹⁵aser ni joko nenok anema kintem maksü ne nem mangashidaktsütsü, mesüra joko nai nisungtemi arütsüba mangashitsü, mesüra nai joko kintem memetsüdaktsütsü ta KIBUBA Tsüngremi ashir.”

¹⁶Ano KIBUBA O kü dangi tanaben aru,

¹⁷“Nisung chir, kodang Israel kidong pei lima nung liasü, parnoki yimya aser mapa agi aji menentsü, kü madang parnok jaklaji tetsür temang ita shilem mapang nung memerükba amai liasü.

¹⁸Anungji parnoki linük nung azü tokshiba yong aser parnoki süngyanglu agi aji menentsüba yong, ni parnok madak kü terasaba meküploktsü.

¹⁹Ni parnok kin rongnung prokshidaktsü, aser linük nung ayimsünga pakshia ao; parnok mapa yari aser parnoki inyakba yari ni o bendang.

²⁰Kodang parnok aolen aliba kintem dangi parnok aru, parnoki kü temeshi tenüng menentsü, anungji nisungtemi parnok dang ashir, itemi KIBUBA nüburtem lir, aser par lima nungi aenshia oagi alir.

²¹Saka kü temeshi tenüng koba Israel kidongi parnok aolen kin rongnung menentsü iba asoshi ni jashia liasü.

²²“Anungji Israel kidong dang shiang, Yamai KIBUBA Tsüngremi ashir. Oh Israel kidong, ni ya nenok mechi inyaker masü, saka kü temeshi tenüng koba nenoki kin rongnung nenok aolen menentsü iba atema lir.

²³Aser kü tenüng tulu koba kin rongnung menentsü, koba nenoki parnok rongnung menentsü, ni meshiteta ayutsü, aser kodang ni nenok parnoki ngua meshitetdir, kintemi ni KIBUBA Tsüngrem lir ta metettsü.

²⁴Kechiyong ni nenok kin rongnungi agitsü, aser linük ajak nungi nenok anitentsü, aser nenok pei limai anir arutsü.

²⁵Aser ni nenok dak tzü temerük rükloktsütsü, aser nenok merüka alitsü; nenok ar aketba ajak nungi aser nenok süngyanglu ajak nungi ni nenok merüktettsütsü.

²⁶Temulungjang tasen ni nenok nem agütsütsü, aser tanela ni nenok dak enloktsütsü; nenok shi nungi lung temulungjangji agientsütsü, aser ni nenok nem shi mulungjang agütsütsü.

²⁷Aser ni nenok dak kü nela enoktsütsü, aser kü tzüzüng-ozüng nung jajadaktsütsü, aser nenoki kü obendang ayutsü, aser itemji inyaktsü.

²⁸Aser ni nenok tsürabur nem agütsüba linük nung nenok alitsü, aser nenok kü nübur asütsü, aser ni nenok Tsüngrem asütsü.

²⁹Ni nenok memerükba ajak nungi kümzüktsü; aser ni tsüksüng-ensüng südaktsütsü aser ayawara kecha nenok madaki marudaktsütsü.

³⁰Aser kin rongnung ayawara tarutsüba joko nenok dak malitsü asoshi ni süngdong süngjang jenti kümdaktsütsü;

³¹idangji nenok tamajung mapatem, aser nenoki inyakbatem, oda tajung masübatem, nenoki bilemtettsü aser nenok temenen aser tesempatsü mapatem asoshi nenok sasa mokonga sempatsü.

³²Nenok mechi ni ya inyaker masü ta nenoki metetang ta KIBUBA Tsüngremi ashir. Oh Israel kidong, nenok pei mapatem asoshi akseta aser süngmangseta liang.”

³³Yamai KIBUBA Tsüngremi ashir, “Nenok tai ajak nungi meshitetba anogo nung, ni yimtitem nung nisung lidaktsütsü, aser teraksadak yanglutsü.

³⁴Aser süisübonger ajaki ngua endoka alitsüba melena, endoka aliba linükji alu ayimtsü.

³⁵Aser parnoki ashitsü, endoka aliba linükto Eden tsüki ama kümogo, aser teraksa aser endokadokba aser tesamaba yimtitem to atsübanger aser nisung lir.

³⁶Idangji meketa tokja aliba kintemi ni KIBUBAi teraksaba yanglushiogo, aser jentoka aliba yanglushiogo ta metettsü. Ni KIBUBAi aji jembiogo, aser ni aji inyaktsü.”

³⁷Yamai KIBUBA Tsüngremi ashir, “Ibai ano ni Israel kidong dang parnok asoshi inyakdaktsütsü kü dang asüngdangdaktsütsü; san telok ama nisung agi ni parnok renlokdaktsütsü.

³⁸Tetenlatsü san telok ama, benjongbentsü mapang nung Yirusalem nung san telok ama, yangji raksa-a aliba yimtitemji nisung telok agi asüngtsü; aser parnoki ni KIBUBA lir ta metettsü.”