Read njo EZEKIEL 37 Bible Online

EZEKIEL 37 - njo bible

EZEKIEL 37

¹KIBUBA teka kü madak liasü, aser pai ni KIBUBA tanelai anir ao, aser lenten tiyong nung pai ni mendaktsü; aser aji teret agi sünga liasü.

²Pai ni item meketa senzüdaktsü; aser ajiang, lenten moapu nung idakji jenti dang liasü, aser itemji kanga takong liasü.

³Aser pai kü dang ashi, “Nisung chir, item teret taküm alitsü kokdi ma?” Aser ni langzü, “Oh KIBUBA, nai metet.”

⁴Tanaben pai kü dang ashi, “Item teret madak shin o jembiang, aser parnok dang shiang, ‘Oh nenok teret takongtem, KIBUBA O angang.

⁵Yamai KIBUBA Tsüngremi item teret dang ashir; ajiang, ni nenok dak tangula idaktsütsü, aser nenok taküm alitsü.

⁶Ni nenok dak tashi enoktsütsü aser nenok madak shi adokdaktsütsü, aser teküp agi na nembangtsütsü, aser ne dak tangula enoktsütsü, aser nenok taküm alitsü; aser nenoki ni KIBUBA ta metettsü.’ ”

⁷Anungji kü dang melaba ama ni shin o jembi, aser ni shin dang ola ka liasü, aser ajiang item jagi arakzü aser terettemji külemi pei meten teret bushia aru.

⁸Aser ni reprang aser item madak tashi liasü, aser shi adok aser item tema nung teküp agi nembang; saka item dak tangula maliasü.

⁹Idangji pai kü dang ashi, “Tangula dang shina jembiang; shinang, Oh nisung chir, tangula dang shiang, yamai KIBUBA Tsüngremi ashir; Pezüsülen mopung nungi arung, Oh tangula, item tetepsetba nisungtem dangi parnok taküm alitsü tangula iang.”

¹⁰ Anungji pai kü dang melaba ama ni shin o jembi, aser parnok dangi tangula aru, aser parnok taküm ali, aser temeranger telok tulu jenti parnok pei tetsüng agi noktak.

¹¹Idangji pai kü dang ashi, “Nisung chir, item teret Israel kidong ajonga lir; ajiang, parnoki ashir, asenok teret kongadokogo, aser asen teimla samaogo, asenok meshimeshia lepdoka lir.

¹²Anungji shinang, aser parnok dang shiang, yamai KIBUBA Tsüngremi ashir; ajiang, ni nenok lepertem lapoktsütsü, aser nenok leper nungi adokdaktsütsü. Oh kü nüburtem, aser ni nenok Israel limai anir arutsü.

¹³Aser kodang ni nenok leper lapoktsüdir, aser nenok leper nungi adokdaktsüdir, Oh kü nüburtem, nenoki ni KIBUBA lir ta metettsü.

¹⁴Aser kü nela ni nenok dak enoktsütsü aser nenok taküm alitsü, aser ni nenok pei lima nung yutsütsü; aser nenoki ni KIBUBAi aji jembi, aser aji inyakogo ta metettsü” ta KIBUBAi ashir.

¹⁵KIBUBA O kü dangi tanaben aru;

¹⁶“Nisung chir, nai mechi ka am-ang, aser iba manung züluang, ‘Yihuda aser pa medemertem Israel chirtem asoshi,’ ajiser mechi tanga ka agiang aser iba manung züluang, ‘Yosef asoshi Efraim mechi aser pa medemer Israel kidong ajak asoshi.’

¹⁷Aji ne ket nung mechi ka dang akümtsüsa itemji metentepang.

¹⁸Kodang ne nüburtemi ne dang, itemji na kechi tetezü onok dang nai mesayutsü no? ta shidir,

¹⁹parnok dang shiang, Yamai KIBUBA Tsüngremi ashir, Ajiang, Efraim ket nung aliba Yosef, aser pa medemer Israel kidong mechi ni agitsü, aser aji kü ket nung ka küma Yihuda mechi den metenteptsü.

²⁰Mechi nungji nai zülur aji parnok nükdang ne ket nung alitsüla.

²¹Aser nai parnok dang shiang, KIBUBA Tsüngremi yamai ashir, ajiang, Israel chirtem, kolensa oagi ali ni anir arutsü, aser ajaklen parnok anitentsü aser parnok pei limai anir arutsü.

²²Aser ni parnok, Israel tenem manung kin ka kümdaktsütsü; aser parnok ajak asoshi chuba ka alitsü; aser joko parnok kin ana masütsü, mesüra joko parnok chuba yimli ana malitsü.

²³Mesüra joko parnok sasa par süngyanglu agi, mesüra ozüng raksaba kecha agi memenentsü; saka parnoki kechi nungsa atsüngzüka ao, ajak nungi ni parnok kümzüktsü, aser parnok meshitettsütsü; yamaji parnok kü nübur asütsü, aser ni parnok Tsüngrem asütsü.

²⁴ “Kü tenzüker Dawid parnok madak chuba asütsü, aser parnok ajak asoshi sannüker ka alitsü, aser parnoki kü o bendangba nung jajatsü, aser kü tzüzüng-ozüngtem benshitsü, aser itemji inyaktsü.

²⁵Aser kü tenzüker Yakob nem ni agütsüba linük nung, kechi nung ne tsüraburtem liasü, yangji parnok alitsü; aser yangji parnok aser par chirnur, aser par chirnur chirtem, teti asoshi alitsü; aser kü tenzüker Dawid teti asoshi parnok chuba asütsü.

²⁶Ano ni parnok den yimjung tezüngzüktepba yanglutsü: aji teti aliba tezüngzüktepba parnok den alitsü; aser ni parnok lidaktsütsü, aser parnok jenti kümdaktsütsü, aser teti asoshi ni parnok rongnung ni kü temeshidak ayutsü.

²⁷ Ano kü tekülemdak süki parnok den alitsü, aser ni parnok Tsüngrem asütsü, aser parnok kü nübur asütsü.

²⁸Aser kodang kü temeshidak parnok rongnung teti asoshi lidir, kintemi Israel meshiteta yutsüba KIBUBA ni lir ta metettsü.”