Read njo EZEKIEL 38 Bible Online

EZEKIEL 38 - njo bible

EZEKIEL 38

¹KIBUBA O kü dangi aru,

² “Nisung chir, Meshek aser Tubal chuba tulu, Magog lima, Gog tsütsü ne tejak shiang, aser pa anema shinang, aser shiang,

³Yamai KIBUBA Tsüngremi ashir; ajiang, ni na anema lir, Oh Gog, Meshek aser Tubal chuba.

⁴Ni na meyipdaktsütsü aser ne teküm nung poroki enoktsü, aser ne temeranger telok ajak, kor aser kor nung raraba nisungtem, parnok ajak nok o nü tabensa sobur, raraba jong aser jong bener telok tulu, parnok ajaki nok bener,

⁵Persia, Kus aser Put, parnok ajak jong bener aser merang korang semer;

⁶Gomer, aser pa telok ajak anüdoklentip talang nung Togarma kidong, aser par telok ajak; oda pa den nisung jenti dena ni na anir arutsü.

⁷“Na renema liang, hau, ne sasa renemang, na, aser ne dangi sentepa aliba telok ajak, aser na parnok asoshi tanüker sang.

⁸Aser anogo aika lir külen na semdangtsü; tesülen küm tatem nung jentoka aliba nungi yanglushiba, kin aika nungi anitenba nübur aliba linük anema, khen mapang nung maneni adoka raksa-a aliba linüki na arutsü; saka aji kintem nungi anir arua lir, aser parnok ajak tetsübutsü makai alitsü.

⁹Aser yipru ka amai na alutsü, na arutsü, aser na aser ner telok ajak, aser ne den nisung aika, linük nungbanga mepet ka amai na arutsü.”

¹⁰Yamai KIBUBA Tsüngremi ashir, “Iba anogo nung ne mulungi tebilemba aittsü, aser nai ya oda shia tamajung tasa asatsü,

¹¹Ni ladakladaka aliba yimtsüng anema apusotsü, ajemajema aliba nisungtem, shirnok tetsübutsü makai alir, parnok ajak jara agi mesüra tartangtsü agi mesüra süngkhüm ajak noktanga mali;

¹²telaluba oset agitsü aser rakzükraktemtsü, tanaben nisung aliba jentoka aliba linük anema ne ket meyiptsü aser kintem nungi anitenba nübur anema, parnok alima tiyong nung lia kiset shiruru telok aser oset-tsüset ngua lir.

¹³Sheba aser Dedan, aser Tarshis shishirtem, aser yangji molusongzü chanu ajaki ne dang ashitsü, Temakzükba oset agitsü na aru no? Nai ne medemer rakzükraktemtsü sentepdaktsü asü? Taribi aser hon bener aotsü, kiset shiruru telok aser osettsüset agitsü, terakzükba jenti agitsü asoshi no?”

¹⁴Anungji nisung chir, shinang, aser Gog dang shiang, Yamai KIBUBA Tsüngremi ashir. “Kodang kü nübur Israel tetsübutsü makai lidir, aji nai metettsü.

¹⁵Aser anüdoklentip tatembang nungi na ne talidak nungi adoktsü, na aser ne den nisung jenti, ajakji kor nung mener, telok tulu aser tashi tulu temeranger telok alitsü;

¹⁶aser mepeti alinük sübanga aruba ama nai kü nübur anema atutsü; anogo tatembang nung ya oda ataloktsü oda ni ya kü linük anema bener arutsü, Oh Gog, anungji kodang ni kü temeshiba parnok nükdang ni nenok dak inyakba ajanga jungkai adokdir, kintemi ni metettsü.”

¹⁷Yamai KIBUBA Tsüngremi ashir; “Akhidang kü tenzüker Israel ainkartem, shirnoki item anogo nung küm aika parnok anema parnok anir arutsü ta parnoki shin, parnok dang pa indang ni jembiba aji na asü?

¹⁸Saka iba anogo nung kodang Gogi Israel linük makdir, kü mit adoktsü, ta KIBUBA Tsüngremi ashir.

¹⁹Kechiyong kü tenükmiba nung aser mi ama ain aitba nung ni jembiogo, atangji iba anogo nung Israel lima nung menoknok tulu alitsü,

²⁰anungji tzüyim ango, anüng ozü, moapu shiruru, ali nung ayazüba ajak, aser alijak nung meimchir shiai kü tsüngdang atententsü, aser tenemtem shisa-a yoktsü, lungrentem longzüka alutsü, aser jara ajak ali nung laotsü.

²¹Aser ni kü tenem ajak dangi pa anema nok ajatsü, ta KIBUBA Tsüngremi ashir. Nisung shia pei nok pei adianu anema alitsü.

²²Aser ni pa anema tashitak wara aser azü tokshiba agi tenzüka inyaktsü; pa madak aser par telok madak, aser pa den aliba nisung jenti madak, tzünglupu moshia, aser rülong tulu, mi, aser mitsüktsü mozü aludaktsütsü,

²³aser ni kü sasa ulutsü aser küsasa meshitettsü aser ni kü sasa kin jenti nükdang meteta kümdaktsütsü; aser parnoki ni KIBUBA ta metettsü.”