Read njo EZEKIEL 39 Bible Online

EZEKIEL 39 - njo bible

EZEKIEL 39

¹Na, nisung chir, Gog anema shinang, yamai KIBUBA Tsüngremi ashir, “Ajiang, ni na anema lir, Oh Gog, Meshek aser Tubal chuba tulu;

²Ni na meketa meyipdaktsütsü, aser na anir aotsü, aser anüdoklentip tatembang nungi atudaktsütsü; Israel tenem manung ni na anir arutsü;

³aser ne teka tabelen nungi lijak dak aser ne lijakjangtem ne teka tajichilen nungi tsükdaktsütsü.

⁴Na Israel tenem manung tsüktsü, na, aser ne telok ajak, aser ne den aliba nisungtem: shi achiba ozü tapu shia nem, aser moapu shirurutem nem na meyokdaktsütsü ni na agütsütsü.

⁵Na moapu nung tsüktsü; kechiyong ni aji jembizükogo, ta KIBUBA Tsüngremi ashir.

⁶Aser Magog madak, aser tzüküm linük nung tetsübu makai alir madak ni mi yoktsü; aser parnoki ni KIBUBA ta metettsü.”

⁷“Kü temeshi tenüng ni kü nübur Israel rongnung meteta kümdaktsütsü; mesüra ni joko kü temeshi tenüng memenendaktsütsü; aser kintemi ni KIBUBA, Israel nung Temeshisang lir ta metettsü.

⁸Ajiang aji arur, aser aji inyaktsü, ta KIBUBA Tsüngremi ashir; ni jembiba anogo indangji ibai lir.

⁹Idangji Israel yimtitem nung alirtem aotsü aser nok o nü agi tatsüktsü kümdaktsütsü, jong aser raraba jong, lijakjang, süngsü aser nü, aser parnoki aji mi asoshi küm tenet tatsüktsü yanglutsü.

¹⁰Anungji parnoki moapu nungi süng magitsü, mesüra arem nungi kecha melepsüktsü, kechiaser nok o nü tatsüktsü parnoki kümdaktsütsü; shirnoki parnok nungi rakzüktsü, aser parnok rakzükraktemertem rakzükraktemtsü ta KIBUBA Tsüngremi ashir.”

¹¹Iba anogo nung ni Gog nem Israel rongnung pa tenüng ajatsü taremdak leper ka, oda Abarim lenten, tzüyim anüdoklen agütsütsü; aser iba ajanga süirtem aji agi anendaktsütsü; aser yangji parnoki Gog aser par telok ajak aremtsü; aser parnoki iba dang Gog telok Lenten ta ajatsü.

¹²Ita tenet Israel kidongi linük meshitettsü asoshi parnok aremtsü.

¹³Hau, linük nung nisung ajaki aremtsü; aser kodang kü sentsüwangshi jungkai adokdir iba anogo nung parnok nem iba agi khonang bena arutsütsü ta KIBUBA Tsüngremi ashir.

¹⁴Aser linük meshitettsü asoshi, parnoki nisung shimteta tema nung meremi aliba bushia linük ajanga senzütsü. Ita tenet tashi itemji parnoki bushitsü.

¹⁵Aser kodang parnoki linük ajanga süidir, aser kari nisung teret ngura, pai iba anasa, temang aremertemi Gog telok Lenten nung rema meyutsü tashi temaitsü ka ayutsü.

¹⁶Yangji parnoki telok ajonga aremtsü, aser yamaji linükji meshitettsü.

¹⁷ “Na, nisung chir, Yamai KIBUBA Tsüngremi ashir, ozü tapu shia dang, aser moapu shiruru shia dang jembiang, nenok sasa atenshiang, aser arung, oda nenoki shi achitsü aser azü ajemtsü asoshi Israel tenem manung tetepsetba tenla tulu ni nenok asoshi tenlatsü nenok sasa ajaklen kü tetepsetba tenla dangi sentepang.

¹⁸Nenoki temeranger shi achitsü, aser alima chubatem zü ajemtsü, san tepung, san chanu, aser nabong, nashi pungchi, aser Bashan tejebketba techanu ajak, achitsü aser ajemtsü.

¹⁹Kü tetepsetba tenla koba nenok asoshi ni tenla-a lir, iba jagi tepok masüng tashi nenoki temo achitsü, aser memesep tashi nenoki azü ajemtsü.

²⁰Aser kü langbang nung kor aser talungtsü, temeranger nisung, aser raraba nisungtemi nenok talubosa asüngtsü” ta KIBUBA Tsüngremi ashir.

²¹“Ni kü sentsüwangshi kin rongnung ayutsü, aser kin ajaki ni o bendang inyakba aser parnok madak ni kongshiba kü ket angutsü.

²²Anungji Israel kidongi ni KIBUBA par Tsüngrem lir ta iba anogo nungjagi metettsü.

²³Kintemi Israel kidong parnok tai menaba asoshi tepuokdaki ao ta metettsü; kechiaser parnoki ni anema ozüng raksa, aser ni kü tejak parnok nungi atsükadok; anungji ni parnok temerir ket nung agütsü, aser parnok ajak nok agi laodaktsü.

²⁴“Parnok memerükba yari, aser parnoki ozüng raksaba yari ni parnok dak inyak; aser ni kü tejak parnok nungi atsükadok.

²⁵Anungji KIBUBA Tsüngremi yamai ashir; Tangbo ni Yakob tepuokbatem tanaben bener arutsü, aser Israel kidong ajonga dak taochi akatsü; aser kü temeshi tenüng asoshi jangraseta alitsü.

²⁶Kodang ni parnok nisungtem nungi tanaben anir arudir, aser parnok tsükchirtem lima nungi anitendir, aser kin aika nükdang ni parnok dak meshiteta lidir;

²⁷kodang parnok pei lima nung kümzüka, parnok tsübudaktsütsü shinga melilir, parnoki kechi agi ni anema tai benshi parnoki tai ajak, parnok pei maksü abentsü.

²⁸Aser ni parnok kin rongnung tepuokdaki odaktsüba, aser parnok pei lima nung anitenba agi parnoki ni KIBUBA Tsüngremji lir ta metettsü; aser ni joko parnok yangji metoktsütsü;

²⁹mesüra ni joko parnok nungi kü tejak atsüka malitsü; kechiaser Israel kidong dak kü nela meküploktsüogo ta KIBUBA Tsüngremi ashir.