Read njo EZEKIEL 4 Bible Online

EZEKIEL 4 - njo bible

EZEKIEL 4

¹“Ano nai, nisung chir, lungru ka agiang, aser aji ne jakdang yuang, aser iba manung yimti ka, oda Yirusalem, yangluang;

²iba anema lungbanga tenoktangtsü yangluang; aser aji anema mitsatem yangluang; iba anasa tenem mejungketa yangluang; iba anasa miter menden yangluang, aser meketa iba anema tenungpoktsü oset ataloka yuang.

³Ajiser merang tamatsük su ka bena arung, aser aji yimti o na tsüngda nung merang jara ama yuang; aser ilen tsütsü ne tejak shiang, aser aji makbangtsü aser nai iba anema lungbanga ayutsü. Ibai Israel kidong asoshi temaitsü ka alitsü.”

⁴“Ajiser ne teka tabelen tsütsü mepitaka liang, aser iba manung Israel kidong tai menaba benlokjang; anogo kwika na mepitaka lidir, iba yari nai parnok tai menaba abentsü.

⁵Kechiyong parnok temerenshiba kümji ni ne nem anogo yongsük den kasa agütsür, oda anogo noklang asem ser tukur; yamaji nai Israel kidong tai menaba abentsü.

⁶Aser tanaben, nai ya inyaker külen, nai ne tajichileni mepitaka alitsü, aser nai Yihuda kidong tai temenen anogo lir, anogo kaji küm ka asoshi abentsü ni ne nem agütsür.

⁷Aser ne tepen tasa adoka Yirusalem lungbangba tsütsü ne tejak ashitsüla, aser iba anema nai shintsüla.

⁸Aser ajiang, ni ne dak lisü pungloktsütsü, aser nai lungbangba anogo mabensa tashi nai tip külen nungi küleni memeyiptsü.”

⁹“Ano nai wheat aser barley tsük, matsüklashi aser azüngken aser jenjang aser an menemtsü aser itemji po ka nung enokang, aser aji agi na asoshi amtsük yangluang, aser anogo kwika na mejanga lidir, oda anogo noklang asem ser tukur, nai ibai chiang.

¹⁰Aser na tachitsü chiyungtsü touzük, anogo shia shekel metsü asütsüla; anogo shia mapang telemtet ka nung nai aji achitsüla.

¹¹Aser nai tzü tatakzük, hin ka shilem nung trokbuba ajemtsüla; anogo shia mapang tatakzük nung ajemtsüla.

¹²Aser nai aji barley amtsük ama chiang aser aji nai nisung scü repranga chiang.”

¹³KIBUBAi ashi, “Oda yamaisa Israel chirtemi, kin rongnung koleni ni parnok aridokdir memerükba amtsük achitsü.”

¹⁴Idangji ni ashi, “Aya KIBUBA Tsüngrem! Ajiang, ni kodanga memerükba agi kü sasa memenendang; kechiyong ni asangwa nungi tang tashi kechi pei sasa asür mesüra shiruru agi süaka ajia machir; mesüra matalokdang.”

¹⁵Idangji pai kü dang ashi, “Ajiang, nisung scü melena ni ne nem nashi scü agütsüdi, aser iba nung nai ne amtsük yanglutsüla.”

¹⁶Ano pai kü dang ashi, “Nisung chir reprangang, Yirusalem nung chiyungtsü ni raksatsütsü; parnok amtsük seret odanga aser kümdanga achitsü, tatakzük agi aser tesüngmang agi parnoki tzü ajemtsü.

¹⁷Ni ibai inyaktsü, oda amtsük aser tzü agi anüngba agi, kati ka den aoksatepa, aser parnok temenen menaba agi kongrasüka maküm tashi merenshitsü.”