Read njo EZEKIEL 43 Bible Online

EZEKIEL 43 - njo bible

EZEKIEL 43

¹Aji ser pai ni anüdoklentip shia aliba süngkhümbongi anir ao,

² aser ajiang Israel Tsüngrem sentsüwangshi anüdoklen tsütsü nungi aru, aser pa olaji tzü jenti ola ama liasü; aser alima pei sentsüwangshi agi sangwa-a liasü.

³Ni anguba tereprangtsüji pai yimti samatsütsü arudang ni anguba tereprangtsü ama liasü, Kebar ayong nung ni anguba ama liasü. Ni kü tejak rembanga lao.

⁴Aser KIBUBA sentsüwangshi kidangi anüdoklen aliba süngkhüm ajanga aru.

⁵Anungji tanelai ni anir atu, aser telungba taktangi anir aru, aser ajiang, KIBUBA sentsüwangshi agi kiji asüng.

⁶Aser ki nungi nisung kati kü dang jembiba ni angashi; aser nisungji ni anasa noktak.

⁷Pai kü dang ashi, “Nisung chir, ya kü chuba menden alidak, kü tetsüng temupu ajemetdak, kong ni Israel chir rongnung teti alitsü, aser kü temeshi tenüng joko Israel kidongi memenentsütsü, mesüra parnoki mesüra parnok chubatemi, parnok jabujari agi, mesüra tokong külemdak parnok chubatem tasü mang agi memenentsütsüla.

⁸Kü motsüngnemtem anasa parnok motsüngnem yangluba agi, kü tongnütem anasa parnok tongnü, aser ni aser parnok tsüngda nung jara yangluba agi, oda parnok tesempatsü mapa parnoki inyakba agi kü temeshi tenüng parnoki menentsüogo: iba yongji kü ain adokba nung ni parnok samatsüogo.

⁹Tang parnok jabujariba, aser parnok chubatem tasü mang kü dak nungi talangka nung endokdakjang, aser ni parnok rongnung teti alitsü.

¹⁰“Na nisung chir, Israel kidong dang, parnoki pei tai menaba indang akseta alitsü asoshi sayuang; aser parnok nem tatishitsü noksaji asadangdakjang.

¹¹Parnoki inyakba ajak indang parnoki akseta lira, parnok dang ki noksaji aser tereprangtsü, aser iba nungi tadoklen, aser iba jagi tailen, aser item yangluba ajak, aser iba ozüng ajak, aser aji parnoki ngua züluang: oda parnoki iba yangluba ajanga, benshitsü aser itemji inyaktettsü parnok dang itemji metetdakjang.

¹²Ibai ki indang ozüng lir; tenem kolak manung temeket arrtsü ajongaji temeshitiba asütsü. Ajiang, ibai tenla ki ozüng lir.”

¹³ Itemi süklep agi tenladak asadangbatem lir (Süklepji süklep ka ser tekabu ka lema lir). Tetsünglanglenji süklep ka alitsü, aser lentenji süklep ka, aser tatembang meketa am ka; aser ibai tenladak tamentakdakji asütsü.

¹⁴Aser ali nung temtsüng nungi teküboklen kitembang tashi süklep ana, aser lenten süklep ka, aser kitembang tilaba nungi kitembang tuluba tashi süklep pezü, aser lenten süklep ka.

¹⁵Aser tenladak mimungji süklep pezü talang asütsü; aser tenladak mimung temalen tezü pezü, ka ka nung süklep ka asütsü.

¹⁶Tenladak mimungji ajaklen tip pezüsülen metong süklep terana lenten süklep terana.

¹⁷Temaba kitembangji ano ajaklen tasazük kasasa tip pezüsülen asütsü, metong süklep terpezü aser lenten süklep terpezü, tebang meketa yangluba nung lenten süklep ka tesadang, aser iba bonglangji süklep ka shi asütsü; aser iba jenjangtemji anüdoklen shia alitsü.

¹⁸Pai kü dang ashi, “Nisung chir, Yamai KIBUBA Tsüngremi ashir: Kodang parnoki tenladak yangludir, iba manung tarongba tenla tenlatsü aser iba manung azü rükloktsütsü iba anogo nung itemi tenladak yimsü ozüng lir.

¹⁹Levi putirtem shirnok Zadok kinunger lir parnok nem nai temenen tenla asoshi nashi pungchi ka agütsütsü, aser parnoki dang kü dang tenzüktsü anasa arutsü ta KIBUBA Tsüngremi ashir.

²⁰Nai azü kar agitsü aser aji tezü pezü dak, aser kitembang kinük pezüsülen, aser kikümbang temeket nung mezütsütsü; yamaji nai tenladak meshitettsü aser merüktettsü.

²¹“Ajiser nai temenen tenla asoshi nashi pungchiji agitsü, aser aji tenla ki tesem shitak ali nung, temeshidak temalen arongtsüla.

²²Tananübuba nung nai tarak maketba nabong tepung ka temenen tenla asoshi tenlatsü, aser yangji tenladakji nashi pungchi agi meshitetba ama meshitettsü.

²³Kodang nai meshitetbaji renemdir, nai tarak maketba nashi pungchi ka, aser san telok nungi tarak maketba san tepung ka agi tenlatsüla.

²⁴Aser nai itemji KIBUBA madangi bener arutsüla, aser putirtemi parnok dak metsü paloktsütsü, aser parnoki itemji tarongba tenla asoshi KIBUBA nem tenlatsü.

²⁵Anogo tenetnü anogo shia nabong ka ka temenen tenla asoshi nai renemtsüla: ano parnoki nashi pungchi chanu ka, aser tarak maketba san tepung san telok nungi renemtsüla.

²⁶Anogo tenetnü tenladak asoshi parnoki temenen pungdoktsü yanglutsü aser aji merüktettsüla; yamaji parnoki bendanga meshitettsü.

²⁷ Kodang anogoji abensadir, ti nübuba nung, aser iba sülen, putirtemi tenladak manung nenok tarongba tenla tenlatsü; aser ni nenok agizüktsü ta KIBUBA Tsüngremi ashir.”