Read njo EZEKIEL 44 Bible Online

EZEKIEL 44 - njo bible

EZEKIEL 44

¹Idangji anüdoklen tsütsü shia aliba temeshidak temaba süngkhüm lenmangi pai ni meyipa anir aru; aser aji shibanga liasü.

²KIBUBAi kü dang ashi, “Iba süngkhüm ashitsü, aser aji melapoktsü, mesüra ajagi nisung shinga maitsü, kechiyong KIBUBA Israel Tsüngrem iba yagi ai; anungji aji shibangtsü.

³KIBUBA madang amtsük achitsü chubai dang iba nung mentet; süngkhüm kilempok lenmang jagi pa aitsü, aser lenmang jagi tugutsü.”

⁴Idangji pai ni anüdoklentip süngkhüm lenmang agi ki tejakleni anir aru; aser ni reprang, aser ajiang, KIBUBA sentsüwangshi agi KIBUBA ki asüng, aser ni kü tejak rembanga lao.

⁵KIBUBAi kü dang ashi, “Oh nisung chir, KIBUBA ki yimsü ozüng, aser iba ozüng ajak indang ni ashiba temulungjang nung yuang, aser tenük agi ajiang, aser ne narong agi angashiang; aser ano taiba aser temeshidak nungi tuguba temulungjang nung yuang.

⁶Tashi mangaba Israel kidong dang shiang, Yamai KIBUBA Tsüngremi ashir, Oh Israel kidong nenok tesempatsütem tatem kümdakjang,

⁷kodang nenoki kü chiyungtsü, temo aser azü tenla agütsür, kü ki menentsütsü, nenoki temulungjang aser shi nung memejeptokba Bendangertem kü temeshidak aniok, aser nenok tesempatsü mapatem agi nenoki kü tezüngzüktepba raksatsü,

⁸aser kü temeshi osettem ketdangsüa mayu, saka item Bendangertem kü temeshidak ketdang asütsü aniok.”

⁹Anungji yamai KIBUBA Tsüngremi ashir, “Bendanger shinga, temulungjang aser shi nung memejeptokba, Israel chir rongnung aliba bendanger ajak, kü temeshidaki maitsüla.

¹⁰Saka kü dang nungi talangka oadokba Levi nunger, kodang Israel mashileni ao, parnok kü dang nungi pila-a mashileni süngyanglu sülen ao; parnoki pei tai khu abentsü.

¹¹Aji saka, ni süngkhüm nung ketdangsüa, aser kidang tenzüka, parnok kü temeshidak tenzükertem asütsü; parnoki tarongba tenla aser nisungtem asoshi tenla tepsettsü, aser nisungtem madang noktaka parnok dang tenzüktsü.

¹²Kechiaser parnoki parnok süngyanglu jakdang parnok dang tenzük, aser Israel kidong asoshi tai menatsü temetsüdaktsü ka aküm; anungji ni parnok anema kü ket mekang ta KIBUBA Tsüngremi ashir, aser parnoki pei tai temenen abentsü.

¹³Aser kü dang putir mapa inyaktsü asoshi, mesüra kü temeshi osettem kar anasa arutsü, temeshitiba osettem asoshi, parnoki ni anasa marutsüla; saka parnoki pei maksü, aser parnok tesempatsütem parnoki inyakba parnoki abentsü.

¹⁴Aji saka iba nung mapa ajak asoshi, aser yangji inyaktsü aliba ajak asoshi parnok kü ki ketdangpur kümdaktsütsü.”

¹⁵“Saka Levi putirtem, Zadok jabasotem, Israel chirtem kü dang nungi mashileni aodang kü temeshidak ketdangsüa alirtem, parnok ni anasa kü dang tenzüktsü arutsü; aser parnoki kü dang temo aser azü agi tenlatsü ta kü madang parnok noktaktsü” ta KIBUBA Tsüngremi ashir.

¹⁶Parnok kü temeshidaki aitsü, aser kü dang tenzüktsü asoshi parnok kü langbang anasa arutsü aser parnoki ni melaba benshitsü.

¹⁷ Kodang parnoki taktang telungbai idir, parnoki kümpa sü abentsüla; kodang taktang telungba nung aser kilung nung tenzükdir tezüng sü mabentsüla.

¹⁸Parnok kolak nung kümpa sü naitsüla, aser parnok teperem nung kümpa sü tesemoktsü alitsüla; aser asentzü sendaktsüba kecha agia parnok sasa nangri makangtsüla.

¹⁹ Kodang parnoki kima taktang, oda nübur kima taktangi adokdir, kong parnoki tenzüker, yangji parnoki süoshi sepzükadoktsütsüla, aser itemji temeshi taktang nung ayutsüla; parnok süoshi agi parnok menena mekümdaktsütsü asoshi, parnoki süoshi tanga abentsüla.

²⁰ Parnoki pei kolak mesüdoktsü mesüra parnok ku langa mekümdaktsütsü; parnok ku talaklen dang tera mejeptoktsüla.

²¹ Mesüra taktang telungbai aidang putir shingaia yi majemtsüla.

²² Parnoki amitsür mesüra palabatsür magitsü, saka Israel kidong nungi jakzükba aiür dang, mesüra putir kibutsü ka amitsür agitsü akok.

²³ Parnoki kü nüburtem dang temeshi aser memeshiba, temerük aser memerükba balala metettsü sayutsüla.

²⁴O bendangdak parnoki o bendanger amato o bendangtsütsü; kü ozüngtem ama parnoki o bendangtsü; aser kü benjongbentsü nung parnoki kü yimsü ozüng amato benshitsüla, aser kü amungnü meshiteta ayutsüla.

²⁵ Putir shingaia, pei tebu mesüra tetsü, mesüra jabaso mesüra jala, mesüra tedi mesüra tenu, mesüra kibong mekümi aliba teyi mesüra tenu dak alema tasü mang anasa aoba agi pei sasa memenentsüla;

²⁶aser ibala nung pai menenadokra, anogo tenet pai süidaktsütsü, iba sülen pa meshiteta akümtsü;

²⁷aser temeshidak tenzüktsü pai telungba taktangi kodang pa idir, pai pei asoshi temenen tenla agütsütsüla” ta KIBUBA Tsüngremi ashir.

²⁸ “Putirtem senmang makatsü, kechiaser ni parnok senmang lir, aser ni parnok rongsen asünungji, Israel nung parnok nem rongsen kecha magütsütsü.

²⁹ Chiyungtsü tenla, temenen tenla, aser tai tenlatemji parnok chiyungtsü; aser Israel nung KIBUBA nem bendanga agütsüba ajak parnok dangi aotsü.

³⁰Kechiaser mezüng süngjanglijang tajungtiba, aser kechisarena tenla koba nenoki agütsür, putirtem asoshi alitsü; aser nenok kibong nung temoatsü alitsü asoshi, nenoki tamasa amtsük yangluba putir nem agütsütsüla.

³¹ Saka yimya agi asüba, mesüra anüka shisatsüba, ozü süshia, shiruru süshia kecha putiri machitsüla.”