Read njo EZEKIEL 45 Bible Online

EZEKIEL 45 - njo bible

EZEKIEL 45

¹“Kodang nenoki senmangtsü asoshi ali lemtsüdir, temeshi ali shilem ka KIBUBA nem tenla agütsütsüla, metongji süklep meyirijang metsür pungu aser lenten nung süklep meyirijang metsü asütsü; temeket ajaklen temeshi alitsüla.

²Iba nung temeshidak asoshi ajaklen meketa metong nung noklang pungu alitsü.

³Aser iba linük nungi, süklep meyirijang metsür pungu metong nung, aser lenten nung meyirijang ter, ajak dang temeshi linük, ta nenoki asatettsüla.

⁴Ibai temeshi linük asütsü; aji temeshidak tenzükertem shirnok KIBUBA anasa tenzüktsü arur item putir asoshi alitsü; aser aji parnok ki asoshi talidak, aser temeshidak asoshi temeshi linük asütsü.

⁵Aser, Levitem shirnoki temeshidak tenzüker parnok asoshi metong nung süklep meyirijang metsürpungu, aser lenten nung meyirijang ter alitsü, aji parnok alitsü ki asoshi alitsü.

⁶Yimti asoshi alinük lenten nung süklep meyirijang pungu, aser metong nung meyirijang metsür pungu, temeshi linük lazüka aliba anasatepa alitsü. Aji Israel kidong ajonga asoshi alitsü.”

⁷Tongtipuri temeshi linük aser yimti meyong anatsülen aliba linükji temeshi linük aser yimti meyong anüolen aser anüdoklen tsütsü tejak shia, kin shilem denji metong kasa, linük litsü anüolen nungi anüdoklen agitsü;

⁸Ibai Israel nung pa rongsen asütsü. Kü tongtipurtemi joko kü nübur rishikangshi masütsü, saka Israel kidong nem parnok kin yari ali agütsütsü.

⁹Yamai KIBUBA Tsüngremi ashir, “Oh Israel tongtipurtem, ojang sang; tashiyim mapa aser temakzükba agienang; ochiba aser shitak inyakang; kü nübur parnok talidak ki nungi aridokba anendakjang ta KIBUBA Tsüngremi ashir.

¹⁰ “Nenok seret dong shitak, takong aser tzü oset tatakzük shitak akatsüla.

¹¹Efa aser bath tatakzük, kasa oda bath nung homer ka nung terbuba shilem, aser efaji homer ka terbuba shilem asütsü; aser iba tatakzükji homer amaji alitsü.

¹²Aser shekelji gera metsü asütsü, shekel metsü shekel pungu, aser shekel terji shekel ter, aser nenok minaji shekel tenem asütsü.”

¹³“Nenoki agütsütsüba tenlaji yamai alitsüla, wheat tsük homer shia nungi efa ka nung trokbuba, aser barley tsük homer shia nungi efa ka nung trokbuba;

¹⁴cor shia nungi bath ka nung terbuba tashi totzü teyari ka, bat ter agi cor ka asür;

¹⁵Israel kidong ajak nungi san telok noklang ana shia nungi san ka chiyungtsü tenla, tarongba tenla, aser yimjung tenla, oda parnok asoshi temenen pungitsü yanglutsü ta KIBUBA Tsüngremi ashir.

¹⁶Linük nübur ajaki iba tenla Israel nung tongtipur asoshi agütsütsü.

¹⁷Aser benjongbentsü nung, aser Israel kidong teshimtet benjongbentsü ajak nung tarongba tenla agütsütsü, chiyungtsü tenla, aser tajemtsü tenla agütsütsüji tongtipur shilem asütsü. Israel kidong asoshi pai temenen tenla, aser tesünep tenla renemtsüla.”

¹⁸Yamai KIBUBA Tsüngremi ashir: “Mezüngbuba ita anogo mezüngnü nai nashi pungchi chanu tarak maket ka agiang; aser nai temeshidakji meshitettsü.

¹⁹Aser putiri temenen tenla züji agitsü, aser aji ki kikümdang nung, aser tenladak kitem pezüsülen, aser telungba taktang süngkhüm tongnütem manung teploktsü.

²⁰Anogo tenetbuba shia shibaisa aibelenba agi mesüra memetetba agi temenen mena, kasa nai parnok dang inyaktsü, aser ki asoshi temenen pungdoktsütsüla.

²¹ Mezüngbuba ita anogo terpezübuba nung, nenoki kümtettsü benjong akatsüla; aser anogo tenet nenoki piyazü meinokba amtsük achitsü.

²²Iba anogo nung tongtipuri pei asoshi aser linük nung nübur ajak asoshi nashi pungchi ka temenen tenla asoshi agütsütsüla;

²³aser benjong anogo tenet tetsüngda nung tarak maketba nashi pungchi tenet aser san tepung tenet anogo shia KIBUBA nem tarongba tenla asoshi anogo shia nabong tepung ka dena temenen tenla asoshi agütsütsüla.

²⁴Aser chiyungtsü tenla asoshi nashi pungchi shia efa ka renemtsü, aser san tepung shia efa ka, efa shia asoshi totzü hin ka ser tesadang renemtsüla.

²⁵ Ita tenetnübuba anogo terpungububa aser benjong anogo tenet tetsüngda nung, temenen tenla tarongba tenla, chiyungtsü tenla aser totzü asoshi pai kasa renemtsüla.”