Read njo EZEKIEL 46 Bible Online

EZEKIEL 46 - njo bible

EZEKIEL 46

¹Yamai KIBUBA Tsüngremi ashir, “Telungba taktang süngkhüm anüdoklen shia alibaji mapa inyakba anogo troknü shibanga alitsü, saka amungnü aser ita tasen anogo nungbo aji lapoktsü.

²Aser tongtipuri temalen süngkhüm kilempok lenmang agi aitsü, aser süngkhüm tongnü anasa noktaktsü, aser putirtemi pa tarongba, aser pa tesünep tenla renemtsü, aser pai süngkhüm nungji külemtsü aser ilenjagi pa tugutsü saka süngkhümji nikongtsütsü matong tashi meshibangi alitsü.

³Aser amungnü nung aser ita tasen nung, linük nüburtemi iba süngkhüm kishi züngdang KIBUBA madang külemtsü.

⁴KIBUBA dang tongtipuri tarongba tenla tenlatsübaji amungnü anogo nung tarak maketba san chanu trok aser tarak maketba san tepung ka asütsüla;

⁵aser chiyungtsü tenla san tepung asoshiji efa ka, aser chiyungtsü tenla san chanutem asoshi pei akokba ama, efa ka nung totzü hin ka ser tesadang asütsü.

⁶Ita tasen anogo nungji tarak maketba nashi pungchi chanu ka, aser san chanu trok, aser san tepung ka, itemji tarak maket asütsüla;

⁷aser chiyungtsü tenla ka, nashi pungchi asoshi efa ka, aser san tepung asoshi efa ka, aser san chanutem asoshi, pai akokba ama, efa ka nung totzü hin ka ser tesadang dena renemtsüla.

⁸Kodang tongtipurji telungi aitdir, pai süngkhüm kilempok leni aitsü, aser pai iba lenmang jagisa tugutsü.

⁹“Saka kodang nüburtemi KIBUBA tsüngdangi, teshimtet benjongbentsü idir, shibai anüdoklentip süngkhüm lenmang agi tekülemtsü aitdir anüolentip süngkhüm lenmangi tugutsü, aser shiba anüolentip süngkhüm lenmang agi aitdir pa anüdoklentip süngkhüm lenmang agi tugutsü; pa ailen süngkhüm lenmang jagi pa meyipa marutsü, saka pa tejaklen indang indanga aotsüla.

¹⁰Kodang parnok idir, parnok rongnung tongtibaji aitsüla; aser kodang parnok tugudir, pa parnok den tugutsü.

¹¹Benjong nung aser teshimtet benjongbentsü nung chiyungtsü tenlaji nashi pungchi ka asoshi efa ka, aser san tepung asoshi efa, aser san chanutem asoshi pai akokba ama, efa ka nung totzü hin ka ser tesadang asütsüla.

¹²Kodang tongtibai temulungba tenla ka agütsüdir, tarongba tenla mesüra tenüngsang tenla temulungtetba tenla ama KIBUBA dang tenladir, anüdoklen süngkhümji pa asoshi lapoktsütsü aser pa sülen süngkhümji shibangtsü.

¹³“Aser anogo shia, tarongba tenla KIBUBA dang tarak maket san chanu küm ka chanu nai bena arutsüla; anepdang shia aji bener arutsüla.

¹⁴Aser iba denji pai anepdang shia chiyungtsü tenla efa ka shilem trokbuba, aser amzü den meyokteptsü trokbuba, aser amzü den meyokteptsü totzü hin ka nung shilem asembuba, chiyungtsü tenla yimsü ozüng agi maneni KIBUBA asoshi renemtsüla.

¹⁵Yamaji san chanuji renemtsü, aser chiyungtsü tenla, aser totzüji anepdang shia maneni tarongba tenla asoshi renemtsüla.”

¹⁶Yamai KIBUBA Tsüngremi shir; “Tongtibai pei jabaso nem sempet kar agütsüra, aji pa senmang lir, aji par chir meyong asütsü; aji senmanglen nungi parnok oset lir.

¹⁷ Saka pa senmang kar nungi pai par kilir kar nem sempet agütsüra, aji nüji kümdaktsüba anogo tashi pa meyong alitsü; aji sür tongtiba nem meyipa agütsütsü; saka senmangtsü asoshibo, aji par jabasotem asoshi alitsü.

¹⁸Aser tongtibai nüburtem nung rongsen, parnok senmang oset kecha merakzüktsüla, pai pei rongsen nungi dang pei jabasotem nem senmang agütsütsüla, aji oda kibur shinga pei rongsen nungi mepiladaktsütsüla.”

¹⁹Idangji pai ni süngkhüm tezülen lenmang ajanga, anüdoklentip putir temeshi taktang taren jagi anir aru; aser ajiang, iba anüolen tatembangti nung tesem ka liasü.

²⁰Aser pai kü dang ashi, “Ibai putirtemi tai tenla metadak, aser chiyungtsü tenla am yangludak lir, aji nüburtem anempong mekümdaktsütsü atema kima taktangi aji parnoki bener madoktsü asoshi lir.”

²¹Idangji pai ki kima taktangi anir ai, aser taktang kinük pezüsülen süia odaktsü, aser ajiang, taktang kinük shia nung taktang ka ka liasü.

²²Taktang pezü kinük nung taktang metenloka liasü; metong süklep lir aser lenten süklep semer liasü; kinüktem nung item pezüji tasazük ka liasü.

²³Aser item nung ki taren ka pezüji meketa liasü, aser tareni aliba kübok meketa temetadak yanglua liasü.

²⁴Idangji pai kü dang ashi, “Itemi temetadak ki lir, tekülemdak kidang tenzükertemi nüburtem asoshi tenla tepsetba metatsü asoshi lir.”