Read njo EZEKIEL 47 Bible Online

EZEKIEL 47 - njo bible

EZEKIEL 47

¹ Aser pai ni meyipa tenlaki kikümbangi anir aru; aser ajiang, anüdoklen tenlaki kiküm kübok nungi tzü yima adok, kechiyong kimalenji anüdoklen shia liasü; aser ki tajichilen nungi, tenladak anüolentiplen nungi teküboklen nungi, tzü yima alu.

²Idangji anüdoklentip süngkhüm lenmang nungi pai ni anir adok, aser anüdoklen shia aliba temaba süngkhüm jagi ki meketa pai ni anir ao; aser ajiang, tajichileni tzü yima alua liasü.

³Kodang nisungji pa ket nung tasadangba lisü amer anüdoklen tsütsüi ao, pai süklep meyirijang ka asadang, aser tenüklang tashi aliba tzü ajanga ni odaktsü.

⁴Tanaben pai meyirijang ka asadang, aser temokok tashi aliba tzü ajanga ni odaktsü. Ano pai meyirijang ka asadang, aser teperem tashi aliba tzü ajanga ni odaktsü.

⁵Ajiser pai meyirijang ka asadang, aser ajibo ni ajanga muotetba ayong ka liasü; kechiyong tzü awatsü junga aroka tzüji atua liasü; aji ajanga muotettsüba ayong ka liasü.

⁶Idangji pai kü dang ashi, “Nisung chir, ya nai nguali ma?” Idangji pai ni meyipa ayongkhümi anir aru,

⁷aser ni meyipa aodang, ajiang, ayongküm nungji süngdong aika külena külena liasü.

⁸Idangji pai kü dang ashi, “Item tzü anüdoklen linüki yima aor, aser Arabai alutsü; aser kodang itemji tzüyimi tzü tenakrem denji yimoka idir, tzüji tasen akümtsü.

⁹Kolenisa ayongji odir, telok senzüba shiruru tapu ajak yangji alitsü, aser yangji ango jenti alitsü, kechiyong iba ayong ya kolenisa odir, tzü tasen kümdaktsütsü, aser iba nung shiruru lidaktsütsü asoshi ajagi yima aor.

¹⁰Angopurtem tzüküm nung, Engedi lenmang tepiyong Eneglaim tashi tzüküm nung noktaktsü, aser yangji parnok zütsük salatsü; aser iba ngo tapu ajak, Tzüyim Tulu amaji jenti talubosa alitsü.

¹¹Saka iba tzüta aser tzütsüng tasen makümtsü; itemji metsü asoshi toktsütsüba lir.

¹² Ayongküm nung anatsülen chiyungtsü asoshi süngdong tapu ajak yangji adoktsü, iba totemji mazülatsü, mesüra item süngjang metangi malitsü, saka parnoki ita shia tejang atangtsü, kechiaser item mesükba tzüji temeshidak nungi ayimer, aser parnok tejang chiyungtsü asoshi, aser parnok totem tanebtsü asoshi alitsü.”

¹³Yamai KIBUBA Tsüngremi ashir; “Israel kin terana rongnung senmangtsü asoshi alinük nai lemsatsütsü asoshi itemi arrtsü lir. Yosef dangi shilem anasü aotsü.

¹⁴Nenoki aji kasasa lemsatsü. Nenok tebou nunger dang ni teka mekanga iba lima agütsütsü nangzükba ama, ya nenok asoshi senmangtsü asütsü.

¹⁵Itemi linük arrtsü asütsü; anüdoklentip len Tzüyim Tulu nungi Hethlon lenmanglen, Zedad tashi oa, Hamat lenmang tashi,

¹⁶idak nungjagi Damaska aser Hamat tsüngda nung arrtsü nung Berotha, Sibraim tashi aser Hauram arrtsü nung Hazer-hatticon tashi,

¹⁷aser tzüyim nungi arrtsüji Damaska arrtsü nung Hazar-enon asütsü, aser anüdoklentip tsütsü Hamat arrtsü lir. Ibai anüdoklentip tsütsü arrtsü lir.

¹⁸Anüdoklen Yordan, Hauran aser Damaska arrtsü tsüngda nung, Gilead aser Israel tsüngda tepiyong, aji anüdoklen tzüyim, Tamar tonga oa. Ibai anüdoklen arrtsü lir.

¹⁹Anüolentip len, Tamar nungi Meriba-kadesh tzü tashi, idak nungjagi Ijip ayong leni Tzüyim Tulu tashi. Ibai anüolentip arrtsü lir.

²⁰Anüolen nung Tzüyim Tulu, anüolentip arrtsü nungi Hamati aiba lenmang tejakdang aliba tashi. Ibai anüolen arrtsü lir.

²¹Yamai iba lima nenok rongnung Israel kintem apir nenoki lemsateptsüla.

²²Aser aji nenok sasa senmangtsü asoshi lemzüktsü, aser nenok rongnung aenertem arua aliba chirnurtem asoshi, parnok dang nenoki Israel senso chirtem ama benshitsü asünungji, Israel kin rongnung nenok den parnoka senmangtsü lemzüktsütsü.

²³Koba kin nung bendangerji lidir, yangji nenoki pa senmang lemzüktsütsüla” ta KIBUBA Tsüngremi ashir.