Read njo EZEKIEL 5 Bible Online

EZEKIEL 5 - njo bible

EZEKIEL 5

¹“Na, Oh nisung chir, nai nok techira ka agiang, aser aji tekolak aonger kusünok amato amshiang, aser aji agi nai ne kolak aser bangsemo sütokang; ajiser nai seretdong am-ang, aser kuji lemdangang.

²Kodang yim makbangba anogotemji süitemdir yimti tiyong nung shilem asem nung ka nai mi nung arongtsüla; shilem asem nung ka nai yimti meketa nok agi lepang, aser shilem asem nung ka nai mopung nung prokshidakjang, aser ni item sülen nok atsüteta merenshitsü.

³Nai iba nungi ishika agiang, aser ne teberem sü nung temang.

⁴Aser aji tanaben nai agiang, aser mi tiyong nung enokang, aser aji mi nung rongang; iba nungi Israel kidong ajak dangi mi adoktsü.”

⁵Yamai KIBUBA Tsüngremi ashir, “Ibai Yirusalem lir. Ni pa kintem tiyong nung toktsü, aser alinüktem pa meketa lir.

⁶Aser kü obendang anema kintem dang nungi tali tamajungba nung, kü tzüzüng-ozüng anema pa meketa aliba linüktem dang nungi tali pai tashi manga; kechiyong parnoki kü obendang magizük, aser kü tzüzüng-ozüng asoshi, parnoki itemji mebenshi.”

⁷Anungji KIBUBA Tsüngremi yamai ashir, meketa aliba kintem dang nungi nenok tali tashi manga, aser kü tzüzüng-ozüng nung mejaja, mesüra kü obendangba mebenshi, mesüra nenok meketa aliba kintem yimya den putepa meinyak nungji,

⁸aji asünung KIBUBA Tsüngremi yamai ashir, ajiang, ni, oda, ni na anema arur; aser kintem madang ni nenok rongnung o bendangtsü.

⁹Ne tesempatsü mapatem asoshi, ni nenok rongnung kodanga meinyakdangba aser iba ama ni kodanga tanaben meinyaktsüba ibala inyaktsü,

¹⁰ ibayongji nenok rongnung tsüraburtemi chirnur achitsü aser chirnurtemi tsüraburtem achitsü; aser ni ne den o bendangtsü aser nenok tanüngba ajonga ni mopung nung prokshidaktsütsü.

¹¹Anungji, azüngashia shidi ta KIBUBA Tsüngremi ashir, atangji nai kü temeshidak ne tamagitsü oset ajak, aser ne tesempatsü ajak agi menentsüogo, anungji ni ne yimlibilem mesüra taochi makai leptokadoktsü.

¹²Nenok shilem asem nung ka wara agi südaktsütsü, aser nenok rongnung ayawara agi samatsü; shilem asem nung ka nenok meketa nok agi laotsü; aser shilem asem nung ka ni mopung nung prokshidaktsütsü, aser item sülen ni parnok anema kü nok bena arutsü.

¹³“Yamaji kü ain adokba sünemtsü, aser kü mit parnok madak jangra atemtsü, aser ni sünema-adoktsü; aser kodang ni parnok madak kü mit adokba anendir, parnoki ni KIBUBA tejashi agi jembiogo ta parnoki metettsü.

¹⁴Ano ni na meketa aliba kin rongnung aser süisübunger ajak tsüngdang na tesendok aser ajumechitsüba kümdaktsütsü.

¹⁵Kodang ni ne dak ain adokba aser mit adokba nung tetsübutsü tarütsüba agi o bendangdir, na meketa aliba kintem asoshi aji taoksatsü, tesayuba aser tesüngmangtsü asütsü; ni KIBUBAi aji jembiogo.

¹⁶Ni nenok anema tasütsü lijakjang yoktsü lijakjang koba na samatsütsü ni tesamatsü asoshi renema lir aser ni nenok madak ayawara tali kümdaktsütsü, aser ni nenok chiyungtsü raksatsütsü.

¹⁷ Aser ni ne madangi ayawara aser shiruru tamajungtem yoktsü aser parnoki na aser ner chirtem rakzükdaktsütsü; aser timtemtsü wara aser azü na ajanga süitsü; aser ne madak nok bener arutsütsü, ni KIBUBAi aji jembiogo.”