Read njo EZEKIEL 6 Bible Online

EZEKIEL 6 - njo bible

EZEKIEL 6

¹KIBUBA O ya oda shia kü dangi aru.

²“Nisung chir, Israel tenemtem tsütsülen ne tejak shiang, aser parnok anema shinang,

³aser shiang, nenok Israel tenemtem, KIBUBA Tsüngrem O angang, yamai KIBUBA Tsüngremi tenemtem dang, ungsemtem dang, leprungkitem dang, aser lenten dang ashir, ajiang, ni oda ni, nenok madak nok bena arutsü, aser ni nenok temeshidak raksatsütsü.

⁴Nenok tenladak sendoka akümtsü aser nenok anü süngyanglu noksa raksadoktsü; aser ni nenok tetepsetba nisungtem nenok süngyanglu madang toktsütsü.

⁵Israel chirtem tasümang parnok süngyanglu madang ataloka yutsütsü, aser nenok teret nenok tenladak meketa prokshitsütsü.

⁶Nenok tenladak endokadoka azüngmeyaka kümdaktsütsü, nenok süngyanglutem raksa-a kecha makai akümtsü, nenok anü süngyanglu lepzüka yoktsü, aser nenok mapatem okdokadoktsü asoshi nenok alidak ajak nung, yimtitem teraksa yutsütsü, aser temeshidak jendokdaktsütsü.

⁷Tetepsetbaji nenok rongnung laotsü, aser nenoki ni KIBUBA ta metettsü.”

⁸“Aji saka, kodang nenok linüktem ajanga prokshidir, kin rongnung kabo nok nungi jenbua alitsü asoshi ni tanüngba kar toktsütsü.

⁹Nenok shirnok jenbudir, parnok kolenisa tepuoker küma odir, kin rongnung ni bilemtettsü, koda parnok jabujari mulungjang kü dak nungi pila-a koba agi ni raksaja lir, aser parnok tenük koba agi parnok süngyanglutem sülen jabujaria aor; aser parnoki pei sasa parnok tenük agi tesempatsü ajak parnoki inyakba ngua, tamajungtem asoshi parnok sasa akseta bilemtsü.

¹⁰Parnoki ni KIBUBA ta metettsü; ni amajok nung iba tamajung mapa inyaktsü parnok amok memeren.”

¹¹Yamai KIBUBA Tsüngremi ashir, “Ne teka matenang, aser ne tsüng ajemtenang, aser shiang aiatai! Israel kidong tesempatsü mapa ajak; kechiyong parnok nok agi, aya agi aser wara agi laotsü.

¹²Shiba talang nung oagi lir wara agi asütsü, aser shiba ana nung lir nok agi laotsü; aser shiba anünga aser wazüka ali taya agi asütsü, yamaji ni kü ain adokba parnok madak inyaktsü.

¹³Kodang parnok tetepsetba nisung parnok süngyanglu rongnung tenladak meketa, ungsem talang manung tenem kolak ajak manung, aser parnok süngyanglu ajak dang teronem tanang tenladak süngdong tajem kübok shia ngudir, nenoki ni KIBUBA ta metettsü.

¹⁴Ni parnok madak kü teka songdoktsü, aser alinükji, arem nungi Dibla tsütsü parnok alidak ajak azüngmeyakdak aser tejentok kümdaktsütsü. Idangji parnoki niji KIBUBA ta metettsü.”