Read njo EZEKIEL 7 Bible Online

EZEKIEL 7 - njo bible

EZEKIEL 7

¹Tanaben KIBUBA O kü dangi ya aru,

²“Na, Oh nisung chir, yamai KIBUBA Tsüngremi Israel linük dang ashir, Tatembang! tatembang ka tongogo, alima pezüsülen madak tatembang tonga arua lir.

³Tang ne madak tatembang arua lir, aser ni kü ain adokba ne madak yoktsü, aser ne mapa yari na o bendangtsü; aser ne tesempatsü ajak ni ne dangi bener arutsütsü.

⁴Aser kü tenük agi na mapayutsü, mesüra ni taochi makatsü; saka ne lenmangtem ni ne dangi bener arutsütsü, aser ne tesempatsütem ne madak alitsü, aser nenoki ni KIBUBA ta metettsü.”

⁵Yamai KIBUBA Tsüngremi ashir, “takoksa madak takoksa! Ajiang, aji arur!

⁶Tatembang ka arua lir, ibai na anema adoker, ajiang, aji arur!

⁷Ne tata mapang arur, Oh linük nung alirtem, mapang tonga lir, anogoji anasa lir; rongrongshishiba anogo, temenen manung ayimtena pelateptsü asoshi masü.

⁸Tang ni yakta kü ain adokba ne dak shiloktsütsü aser na anema kü ain adokba inyaktsü, aser ne mapa yari na o bendangtsü; aser ne tesempatsü ajak ne madaki ni bener arutsü.

⁹Aser kü tenüki mapayutsü, mesüra taochi makatsü; ni ne madak ne mapatem yari bena arutsütsü, aser ne tesempatsütem ne madak alitsü, aser nenoki ni KIBUBAi azüker ta metettsü.”

¹⁰“Ajiang, anogoji, ajiang, aji arur; ne tata mapang tejakleni odagi; ne mechi tepen punga lir, asüküm temechi adoka lir.

¹¹Tashiyimji tamajung tulu küma adoka lir, parnok rongnungi kata manüngtsü, parnok telok nungi süshia, parnok rongsen nungi süshia, mesüra balaka shisangba malitsü.

¹²Mapangji arua lir, anogo anasa arur; talira tepelatep, mesüra tayokera tesasatep, kechiyong telok ajak madak ain adokba lir.

¹³Kechiyong parnok taküm ali tashi tayokeri pai kechi ayok ajagi meyipa mangutsü; kechiyong ajak indang mangdangji meyipa maotsü, aser pei temenen yong shingaia pei taküm sota ayutsü makoktsü.”

¹⁴“Parnoki jangzü apuogo, aser ajak renema lir, saka shinga tongbangi maor; kechiyong kü terasaba parnok ajak madak lir.

¹⁵Temalen nok aser telunglen tasütsü tashitak aser ayawara lir; shir moapu nung ali pa nok agi asütsü, aser shiba yimti nung ali, ayawara aser tasütsü tashitak agi pa meyoktsü.

¹⁶Saka shirsa item nungi jenbudir parnok temenen manung lenten posü ama, nisung shia pei temenen asoshi, parnok ajak jebtepa alitsü.

¹⁷Teka ajak tezü tanga aser temokok ajak tashi meiti tzü ama akümtsü.

¹⁸Parnoki pei sasa ano anemsü agi nangri akangtsü, aser taoksatsü agi parnok nembangtsü; aser tejak ajak nung maksü alitsü, aser parnok kolak ajak lemtsü alitsü.

¹⁹Parnoki pei taribi yimdong nung endokadoktsü, aser parnok hon memerükba oset ama alitsü; KIBUBA terasaba anogo nung parnok taribi aser hon agi parnok mekümzüktsü, parnok pei tanela jangra metemdaktsütsü, mesüra parnok tepok mesüngdaktsütsü; kechiaser aji parnok tai menaba temetsüdaktsü lung lir.

²⁰Pa sobutsü tobur tajung atemaji pai aji asükümtsüang kümdaktsü; aser parnok tesempatsütem aser magitsüba osettem iba nungi adokdaktsü, anungji aji parnok asoshi memerükba oset ama ni kümdaktsü.

²¹Aji ni bendanger ket nung tepsettsü asoshi, aser alima nung tamajunger nem rakzükdaktsütsü agütsütsü; aser aji parnoki menentsütsü.

²²Parnok nungi kü tejak meyipadoktsü, aser parnoki kü miima rizüngdak menentsütsü; aser rakzükraktemer ajagi aitsü aser aji menentsütsü.

²³Yinzü yangluang, kechiyong alima azü tokshia ozüng raksaba agi sünga lir, aser teka itepba agi yimti sünga lir.

²⁴Anungji ni mamanger tamajungtiba anir arutsü, aser parnoki parnok ki agitsü; ano ni tashi tait asükümba anendaktsütsü, aser parnok temeshidak menentsütsü.

²⁵Teraksatsüba arur, parnoki tesünep bushitsü, saka kecha malitsü.

²⁶Lendong madak lendong aser olulu madak olulu arutsü; aser parnoki ainkar mangdang bushitsü, saka putir nungi tesayuba ozüng, aser tamburtem nungi shisa agütsüba süitema aotsü.

²⁷Chubai mang yima akümtsü, aser tongtipuri pei sasa shisa rama sobutsü abentsü, aser alima nisungtem teka atententsü. Ni parnok mapa ama parnok dang inyaktsü, aser parnoki inyakba yari ni parnok o bendangtsü; aser ni KIBUBA lir ta parnoki metettsü.”