Read njo EZEKIEL 9 Bible Online

EZEKIEL 9 - njo bible

EZEKIEL 9

¹Idangji pai kü narong nung ola tulu agi ayimtena ashi, “Yimti madak tanishirtemji, nisung shia, pei ket nung teraksatsütsü nok o nü amer anasa arudakjang!”

²Aser anüolentip tsütsü aliba temaba kikümbang lenmang nungi nisung trok, nisung shia pei ket nung tetepsettsü nok o nü bener aru, aser parnok rongnung nisung ka kümpa sü abener, tesa nung tezülur mozützü bongdang nung bener liasü. Aser parnok ai, aser yongmenyin tenladak anasa noktak.

³Israel Tsüngrem sentsüwangshi cherubim[3] manung aliba nungi ki tayaoklen jagi tua liasü; aser kümpa sü abena aliba nisung dang pai aja, shibai pei tesa nung tezülur mozützü bongdang nung bena liasü.

⁴ Aser KIBUBAi pa dang ashi, “Yimti tiyong ajanga süiang, Yirusalem ajanga süia oang, aser iba nung tesempatsü inyakba ajak asoshi nisung shibai jashia ayimtendir parnok tenütsü nung temaitsü ka yuang.”

⁵Aser tangar dang ni angashia pai ashi, “Nenoki yimti ajanga pa sülen oang, aser tepsetang; nenok tenük agi mapayui, mesüra maochi tepsetang.

⁶Tambur, asangur aser aiür, aser tila tanurtem aser tetsürtem tasü küma tepsetang; saka temaitsü aliba nisung shinga anasa taru; aser kü temeshidak tenzükang.” Idangji tejaklen aliba tamburtem dak nungi parnoki tenzük.

⁷Pai parnok dang ashi, “Kiji menendakjang, aser taktangtemji tetepsetba agi süngdakjang; nenok apusoa oang.” Aser parnok ao, aser yimti nungji tepset.

⁸Parnoki tepsetyonga aodang, aser ni kija tokja alidang, ni kü tejak rembang aser ayimtena ashi, “Aia KIBUBA Tsüngrem! Nai Yirusalem madak ain adoka tokloktsüdang, Israel tanüngba ajak nai samatsütsü no?”

⁹Idangji pai kü dang ashi, “Israel kidong aser Yihuda tai menaba onsara tulu, aser alima azü agi sünga lir, aser mashilen sentong agi yimtiji sünga lir; kechiyong parnoki, ‘KIBUBAi alima senzüka toktsüogo, aser KIBUBAi mangur,’ ta ashir.

¹⁰Aji asünung ni asoshia, kü tenüki mapayutsü aser taochi makatsü, saka ni parnok mapa parnok kolak nung benloktsütsü.”

¹¹Aser angang! kümpa sü abenba nisung, shiba pa tesa nung tezülutsü mozützü, bongdang bena liasü. Pai ashi, “Nai kü dang melaba ama ni inyakogo” ta osang agütsü.