Read njo DANIEL 1 Bible Online

DANIEL 1 - njo bible

DANIEL 1

¹Yihuda chuba Yehoiakim yimsüsüba kümsembuba nung, Babilon chuba Nebukadnezzar Yirusalemi aru, aser aji lungbang.

²Aser Tsüngrem kidang aliba marok-aosutem kar dena KIBUBAi pa nem Yihuda chuba Yehoiakimi agütsü; aser pai itemji Shinar limai par tsüngrem kidangi bener ao, aser pai marok-aosutemji par tsüngrem terizüngdak ayu.

³Aser teyangluba nisungtem madak kibur Asefenaz dang, Israel chir kar, oda chubar kimang aser tamarener chir kar anir arung ta chubai pa dang ashi,

⁴oda tarak maket asangur, aso tajung, shisatsü nung tetangshi, temetetba shisatsü nung tesangra aser puti angatetba, aser chuba kidang noktaktsü tetemsü, aser parnok dang Kaldi nunger kaket shisatsü aser oshi sayutsü akokba asütsüla.

⁵Aser parnok asoshi anogo shia chubar chiyungtsü tajung aser pa ajemba yi agütsütsü chubai mela, aser parnok küm asem mesütsüla; iba tatembang nung parnoki chuba madang noktaktsüla.

⁶Item rongnung Yihuda kin nungi Daniel, Hanania, Mishael aser Azaria liasü.

⁷Aser teyangluba nisungtem kiburi parnok nem tenüng agütsü: Daniel dang pai Belteshazzar aja, aser Hanania dang Shadrak, aser Mishael dang Meshak, aser Azaria dang Abednego ta aja.

⁸Saka Danieli pei mulung nung chubar chiyungtsü tajung mesüra pai yi ajemba agi pa sasa pa memenentsü ta mulungtet.

⁹Aser Tsüngremi teyangluba nisung madang Daniel yimli aser taochi ngudaktsü.

¹⁰Aser teyangluba nisung tongtibai Daniel dang ashi, “Ni kü kibur chuba shibai nenok chiyungtsü aser tajemtsü mela, pa tsübur; kechiyong kechiba nenok tejak nenok züngar dang nungi tamajungba pa nem ngudaktsütsü? Yamaji süra nenoki chuba tsüngdang kü kolak lendong nung yutsür.”

¹¹Idangji ketdangpur shiba Daniel, Hanania, Mishael aser Azaria madak teyangluba nisung kiburi shimtet, pa dang Danieli ashi,

¹²“Ternü asoshi tenzükertem atidangang, tachitsü süngo-lio aser tajemtsü tzü kua,

¹³Aji ser ne tsüngdang onok tejak aser chuba chiyungtsü tajung achiba asangurtem tejak metemdangtepang aser nai ajungba ka ne tenzükertem dang benshiang.”

¹⁴Anungji pai iba atema parnok dang anga, aser anogo ter parnok tendang.

¹⁵Aser ternü temer chuba chiyungtsü tajung achiba asangur ajak dang nungi parnok sorubangru tobur tajungba aser shi teyiraba liasü.

¹⁶Anungji ketdangbuba jagi parnok nem chiyungtsü tajung aser parnok ajemtsü yi magütsüi, süngo-lio chiyungtsü agütsü.

¹⁷Tang item asangur pezü asoshi, Tsüngremi parnok nem tashi temetet aser tangazükba ajak nung tetangshi aser shisatsü agütsü; aser mangdang aser pungmang ajak nung Daniel tangatetba liasü.

¹⁸Aser parnok anir arutsü chubai ataktetba anogo tatong nung, teyangluba nisungtem tongtibai Nebukadnezzar madangi parnok anir aru.

¹⁹Aser chubai parnok den jembi, aser parnok rongnung Daniel, Hanania, Mishael aser Azaria ama shinga maliasü; anungji parnok chuba salang nung noktak.

²⁰Aser chubai koba shisatsü aser tangatetba mapa indangsa parnok dang asüngdang, pa yimli nung ainketer aser ain sayur ajak dang nungi tersü agi parnok tajungba angu.

²¹Aser Cyrus chuba mezüngbuba küm tashi Daniel maneni ali.