Read njo DANIEL 10 Bible Online

DANIEL 10 - njo bible

DANIEL 10

¹Persia chuba Cyrus kümsembuba nung Daniel, shiba tenüng Belteshazzar liasü, pa dangi pa o jungkai adok, aser oji atangji liasü aser aji rara tulu ka indang liasü, aser pai oji angatet aser mangdangji tezütet.

²Item anogo nungji ni, Daniel hapta asem tepiyong mang yima liasü.

³Chiyungtsü tajung kecha ni machi mesüra shi mesüra yi kü bang nung matalokdang, mesüra hapta asem mesongtem tashi ni totzü kecha malok.

⁴Ajiser, mezüng ita anogo metsür pezübuba nung, ni Tigris ayong tulu kümbang nung noktaka alidang,

⁵ ni kü tenük rangket, aser reprang, aser ajiang, nisung ka kümpa sü abener angu, aser pa teperem Ufaz hon tajung agi nangri kanger liasü,

⁶pa temang beryl sentilung ama prangshi, pa tejak tsüngpret ama, pa tetsüng tepen meyuzükli yongmenyin ama sentsüpranga, aser pa ola telokti ola ama liasü.

⁷Aser ni, Danieli dang mangdangji angu, kechiyong kü den aliba nisungtemi mangdangji mangu; saka parnok kanga atenten, aser parnok sasa atsüktsü jena ao.

⁸Anungji ni kija toktsü, aser iba mangdang tuluji angu, aser kü dak tashi makai aküm; kü tejak sentsü meremba oadok, aser ni tashi meiti aküm.

⁹Idangji ni pa ola angashi, aser pa ola angashidang kü tejak alilen shir ni sümanga amua ao.

¹⁰Aser ajiang, teka kati kü dak kongshi, aser kü temokok aser teka manung ni atentena toktsü.

¹¹Aser pai kü dang ashi, “Oh kanga temulung achiba Daniel, ni ne dang jembiba otem angang, aser metong metonga noktakang; kechiyong tang ni ne dangi yoka lir.” Aser pai item jembidang, ni atentena noktak.

¹²Idangji pai kü dang ashi, “Tetsübu, Daniel; kechiyong tamasayongi Tsüngrem madang angatettsü asoshi nai ne mulung nung jangraba, aser ajemaluba mapang nungi, ne sarasademba angashiogo, aser nai jembibayong ni arua lir.

¹³ Anogo metsür ka tashi, Persia yimli chubai ni noktang, saka temaba tenyar rongnung ka, Maikel ni yaritsü aru; anungji yangji pa Persia yimli chuba den toktsür ni aru.

¹⁴Tesülen anogo nung ne nüburtem dang kechi ataloktsü aji ni ne dang angatetdaktsütsü ni aru; kechiyong mangdangji tarutsü mapang asoshi lir.”

¹⁵Kodang pai item o kü dang jembi, ni kü tejak alilen ashi, aser ni o mejembiteti aküm.

¹⁶Aser ajiang, nisung chir rongnung ka mesükba kati kü bang mechi nung kongshi, idangji ni kü bang lapok aser jembi; aser kü madang noktaka aliba dang ni ashi, “Oh kü kibur, mangdang ajanga ni timtem agi tongogo, aser ni tashi meiti kümogo.

¹⁷Anungji kü kibur tenzükeri kü kibur den koda jembitet? Kechiaser kü dak tashi teraka mait, mesüra kü dak tangula anünga mali.”

¹⁸Ano nisung sorubangru mesüker kati arua kü dak kongshi, aser pai ni tashi itdaktsü,

¹⁹aser ashi, “Oh kanga temulung achiba nisung, tetsübu, ne den tesünep liang; tashi itang, hau, tasü itang.” Aser pai jembir külen, ni tashi ita aküm, aser ni ashi, “Kü kiburi jembidakjang, kechiyong nai ni tashi itdaktsüogo.”

²⁰Idangji pai ashi, “Ni kechi atema aru nai meteter ma? Saka tang ni Persia chuba den raratsü meyipa aotsü; aser kodang ni odir, ajiang, Grik chuba arutsü.

²¹Saka ochiba kaket nung kechi zülua lir ni ne dang sayutsü; item anema kü den yariteptsü ne chuba Maikel alema shinga mali.”