Read njo DANIEL 12 Bible Online

DANIEL 12 - njo bible

DANIEL 12

¹ “Iba mapang nung, tematiba tenyar Maikel noktaktsü, pai ne nübur chirtem asoshi noktaker. Aser kin ka lili nungi kodanga meli dangba timtem mapang ka alitsü; aser iba mapang nung, kaket nung tenüng zülua aliba nisung shia, ne nüburtem kümzüktsü.

²Aser ali nung mejanga alir jenti saktsü, kar teti taküm dangi, aser kar maksü aser teti tatem makaba tesempatsü dangi shia arutsü.

³Aser shir shisa aka parnoki anüng tom sentsüprang ama ayatsü; aser shirnoki temeshiba dangi jenti meyipdaktsüdir parnok petinutem ama teti tatem maka alitsü.

⁴ Saka, Oh Daniel, otemji shibangadokang, aser tatembang mapang matong tashi kaketji ajenbanga shibangang; kechiyong aika oli-aruli ta asümzütsü, aser shisatsü renloktsü.”

⁵Idangji ni Danieli reprang, aser ajiang, tangar ana noktak, ka ilen ayongküm nung, aser kaji külen ayongküm nung.

⁶Aser ayong tzü temalen aliba kümpa sü abenba dangji ni ashi, “Item tesüngmangtsütem tatembang atongtsü kopiga alitsü?”

⁷ Idangji nisung shiba kümpa sü abener ayong tzü temalen liasü, pai pa teka tajichi aser tabelen kotaklen mekang, aser shiba teti taküm alir, pa agi azüngashi, aser aji mapang ka, mapang ana, aser mapang tesadang alitsü ta ashi; aser kodang parnok temeshi nüburtem dena pai anüka raksadaktsüdir, item ajak tatem atemtsü.

⁸Aser ni angashi, saka mangatet, idangji ni ashi, “Oh kü kibur, item mapa tadoktsübaji kechi asütsü?”

⁹Aser pai ashi, “Daniel, ne lenmangi oang, kechiaser otemji shibangogo aser tatembang matong tashi ajenbangogo.

¹⁰ Jentipur parnok sasa merüktettsü, aser parnok sasa temesüng aser meshiteta alitsü; saka tamajungeri mejungi inyaktsü, aser tamajunger shingaia mangatettsü. Saka shirnok shisa aka parnoki angatettsü.

¹¹ Maneni tarongba tenla agienba mapang nungi aser teraksatsüba tesempatsü pei talidak ayuba mapang tashi anogo meyirijang ka noklang ana aser tukur alitsü.

¹²Anogo meyirijang ka noklang asem ser semerpungu shibai atadir aser tongdir pa temoatsü.

¹³Saka na pei lenmang nung tatem matong tashi oang. Kechiyong na anisüngzüktsüla, aser anogotem tatembang nung ne shilem atadak noktaktsüla.”