Read njo DANIEL 2 Bible Online

DANIEL 2 - njo bible

DANIEL 2

¹Nebukadnezzar chubaba küm tanabuba nung Nebukadnezzari “pungmang ka pungmang” aser pa tanela timatem, aser pa ayip majang.

²Idangji chuba dang pa pungmang ashitsü asoshi, ain sayurtem, tepuartem, arasenertem aser Kaldi nunger ajatsü chubai mela. Anungji parnok aita chuba madang noktak.

³Aser chubai parnok dang ashi, “Ni pungmang ka pungmangogo, aser pungmangji metettsü kü nela timatemer.”

⁴Idangji Kaldi nungertemi chuba dang Aram oshi nung jembi, “Oh chuba, teti taküm liang, ne tenzükertem dang ne pungmangji shiang, aser onoki tetezüji sayutsü.”

⁵Chubai langzüa Kaldi nunger dang ashi, “Kü o ya shitak lir, nenoki kü dang pungmangji meshira aser tetezüji memetetdaktsüra, nenok anüka lepsatsütsü, aser nenok ki rüja kümdaktsütsü.

⁶Saka nenoki iba pungmang aser tetezü shitetrabang, ni nungi nenoki sempet aser taa aser tetushi tulu angutsü. Anungji kü dang pungmang aser tetezüji shiang.”

⁷Tanabena parnoki langzüa ashi, “Chubai pei kilirtem dang pungmangji shiang aser onoki tetezüji ashitsü.”

⁸Chubai langzüa ashi, “Nenoki mapang ajangzüktsü meranger ta ni jungjunga metet, kechiaser kü o ya shitak lir ta nenoki metet.

⁹Saka nenoki kü dang pungmangji meshira, nenok asoshi ozüng ka dang lir, kechiyong temelenshi ka adoktsü imlaseta nenoki tiyazü o kü dang jembitsü renem; anungji kü dang pungmangji shiang, aser nenoki tetezü shitet ta ni metettsü.”

¹⁰Kaldi nungeri chuba dang langzüa ashi, “Chubai asüngdangba shisatsü atongtsüsa alima nung nisung shinga melika; kechiyong chuba koda tulu aser tashi tait südir süaka iba amai ain sayur, tepuar mesüra Kaldi nunger dang kodanga masüngdangdang.

¹¹Chubai mapa tasakla ka asüngdanger aser aji tsüngremtem, shirnok nisung den malir, parnok dak alema chuba dang ashitsü makok.”

¹²Iba yongji chubai kanga jashi aser mit adok, aser Babilon tashi temeteter ajak samatsütsü mela.

¹³Anungji tashitemetetertemji tepsettsüla ta ozüngji ayim sünga ao aser parnoki Daniel aser pa medemer tepsettsü bushi.

¹⁴Idangji chubar tanüker arkotong Ariok, shiba Babilon nung tashitemetetertem tepsettsü or liasü, pa dang Danieli shisa ka-a aser tangshia telangzüba agütsü.

¹⁵Chubar arkotong Ariok dang pai ashi, “Kechiba chuba ozüng ya oda sashi?” Kodang Arioki iba indang rasa-a Daniel dang ashi,

¹⁶Daniel ai aser chuba dang pa nem mapang agüjang ta mepishi, aser pai chuba nem pungmang teratetji agütsütsü ta ashi.

¹⁷Idangji Danieli pei kidangi ao, aser iba indang pa medemer Hanania, Mishael, aser Azaria dang ashi,

¹⁸aser iba miim o indang Daniel aser pa medemertem Babilon tashi temetetertem den mesamadaktsütsü parnoki kotak Tsüngremer taochi asüngdangtsü asoshi metetdaktsü.

¹⁹Idangji aonung mangdang nung miim oji Daniel dangi jungkai adok. Idangji Danieli kotak Tsüngrem moatsü.

²⁰Danieli ashi, “Teti tatem maka Tsüngrem tenüng temoatsü sang; kechiyong shisatsü aser tashi pa meyong lir.

²¹Pai mapang aser tsüngkhüm lemsatsür; pai chubatem agiener aser chubatem mendaktsür; shisakar nem pai shisatsü agütsür, aser tangatetba pur nem pai temetetba agütsür,

²²pai miim tarok mapatem jungkai adoktsür, ammang nung kechi ali pai aji metet, aser tesangwa pa den lir.

²³Oh na, kü tsürabur Tsüngrem, ni ne dang pelar aser na asanger, nai shisatsü aser tashi kü nem agütsü, aser tang onoki na nungi kechi meshi nai kü nem metetdaktsü; kechiyong chuba indang nai kü nem metetdaktsü.”

²⁴Anungji Babilon nung temeteter samatsütsü chubai shimtetba Ariok dangi Danieli ia pa dang ashi, “Babilon tashitemetetertem tesamadaktsü; ni chuba dangi anir iang, aser ni chuba dang tetezüji sayutsü.”

²⁵Idangji ilunga chuba madang Arioki Daniel anir ai, aser yamai pa dang ashi, “Pur aruba Yihuda pur rongnung chuba dang tetezü metetdaktsütsü ni nisung ka ngua lir.”

²⁶Daniel shiba tenüng Belteshazzar ta aja liasü, pa dang chubai ashi, “Ni koba pungmang angu, aser iba tetezü nai kü dang sayutsü kokdi ma?”

²⁷Chuba dang Danieli langzüa ashi, “Tashitemeteter, tepuar, ain sayur, mesüra petinu takzür shingai chubai akhangba miim oji chuba dang meshitet;

²⁸saka miima aliba jungkai adokdaktsüba kotak nung Tsüngrem ka lir, aser pai tesülen anogotem nung kechi asütsü aji chuba Nebukadnezzar dang metetdaktsüogo. Ne pungmang aser ne yipten manung ne kolak mangdangji itemi lir;

²⁹chuba ne dangi na yipten nung ondaka alidang tarutsü mapang kechi asütsü tebilemba aru; aser shibai miima aliba jungkai adokdaktsür pai kechi ataloktsü aji ne dang metetdaktsü.

³⁰Saka ni asoshibo, oda tangar nisung ajak dang nungi kü shisatsü tali aliba yong iba miim o ya kü dangi jungkai adok masü, saka tetezüji ne dang meteta kümdaktsütsü, aser ne mulungjang tebilembatem nai metettsü asoshi lir.

³¹“Oh chuba, nai angu, aser ajiang! Süngyanglu tulu ka liasü, iba süngyanglu kanga tulu aser onsara sentsüpranga liasü aser ne madang noktak; aser iba sorubangru tetsübutsü ka liasü.

³²Iba süngyanglu kolakji hon temerük liasü, pa teku aser tepen taribi liasü, pa tepok aser tepi yongmenyin liasü,

³³pa tetsüng merang, pa temupu tesadang ka merang aser tesadang ka ajongli.

³⁴Nai aji repranga alidang teka medeni angentetba lung kati pa temupu tesadang merang aser tesadang ajungli ta alidakji onshi aser itemji anüka ajasa-a ao.

³⁵Idangji merang, ajongli, yongmenyin, taribi, aser hon, külemi anüka ajasa, aser mei motsüngnem tsüksü ama aküm, aser mopungi itemji onür ao, aser parnok mungui aküm. Saka süngyanglu tsükreptsüba lungji tenem tulu ka aküm, aser alima rangben asüng.

³⁶“Pungmangji ya liasü, aser tang onoki chuba dang tetezüji ashitsü.

³⁷Na, Oh chuba, chubatem madak chuba, shiba nem anüng Tsüngremi yimli, ain, tashi, aser sentsüwangshi agütsü;

³⁸aser kongsa nisung chirtem lir, moapu shiruru aser anüng ozü pai ne ket nung agütsü idakji parnok ajak madak nai yimsü südaktsü; hon kolakji na lir.

³⁹Ne sülen ne dang tilaba tachemba yimli ka adoktsü; aser tasembuba yongmenyin yimli kati alima ajak madak yimsü asütsü.

⁴⁰Aser pezübuba yimliji merang ama tashi ita alitsü; kechiyong merang agi ajasa-a oset ajak zükreptsür; aser merang agi oset ajak menüngsatsüba ama, yamaji pai anüka raksatsütsü aser menüngsatsütsü.

⁴¹Aser nai temupu aser temesüla tesadang poteper ajongli, aser tesadang merang anguba ama, aji telemsa yimli ka asütsü; saka nai ajongli lishi den merang meyoktepa anguba ama iba nung merang takangtalung karbo alitsü;

⁴²saka temupu tesadang merang aser ajongli aliba ama yimliji tesadang tashi tait tesadang tashi mait alitsü.

⁴³Aser nai merang ajongli lishi den meyoktepa anguba amaji, parnok kibalembu meyokteptsü; saka merang ajongli den memeyoktep ama parnok külemi loktepa malitsü.

⁴⁴Aser item chuba tendak kotak Tsüngremi kodanga mesamaba yimli ka yanglutsü, mesüra yimliji tangar nübur nem metoktsütsü; saka iba jagi item yimli ajak anüka raksatsütsü aser samatsütsü, aser ibaji teti noktaka alitsü.

⁴⁵Oda tenem nungi teka medeni lung ka angentetba nai angu ama, aser aji agi merang, yongmenyin, ajongli, taribi, aser hon anüka raksatsü amaji alitsü. Tulusang Tsüngremi yasür kechi ataloktsü aji chuba dang metetdaktsüogo; aser pungmangji atangji, aser iba tetezü shitak lir.”

⁴⁶Idangji Nebukadnezzar chubai pa tejak apudak, aser Daniel külem, aser pa nem tenla aser teronem tanang agütsütsü parnok dang mela.

⁴⁷Chubai Daniel dang ashi, “Atangji ne Tsüngrembo tsüngremtem madak Tsüngrem, aser chubatem madak KIBUBA, aser nai iba miim o jungkai adokdaktsütet nungji, pa miima aliba jungkai adokdaktsüsangji lir.”

⁴⁸Idangji chubai Daniel nisung tongti ka kümdaktsü, aser pa nem sempet tulu jenti agütsü, aser Babilon province ajonga madak yimsüsür, aser Babilon tashitemeteter ajak madak tongtiba kümdaktsü.

⁴⁹Idangji Danieli chuba dang mepishi, aser Babilon province yimsüsüba mapa madak pai Shadrak, Meshak, aser Abednego shim, saka Danielbo chuba kidang ali.