Read njo DANIEL 3 Bible Online

DANIEL 3 - njo bible

DANIEL 3

¹Nebukadnezzar chubai hon süngyanglu ka yanglu, aji süklep roker talang, aser lenten nung süklep trok; pai aji Babilon province Dura lenten nung meso.

²Idangji Nebukadnezzar chubai mesoba süngyanglu meshitetdaki arutsü asoshi, Nebukadnezzar chubai tamarenertem, governortem, tirtem, obendangertem, terizüngertem, shisa agütsürtem, sen kiburtem, aser province yimsüsürtem külemi atenshitsü tajai yok.

³Idangji tamarenertem, governortem aser tirtem, obendangertem, terizüngertem, shisa agütsürtem, sen kiburtem, aser province madak yimsüsürtem ajak Nebukadnezzar chubai mesoba süngyanglu meshitet dak atenshi, aser Nebukadnezzar chubai mesoba süngyanglu madang parnok noktak.

⁴Idangji chubar osangbener kati tashi agi ayimten, “Oh nüburtem, kintem aser oshitem, nenok dang ya melar,

⁵koba mapang nung jangzü ola, jemji, tzürang kongki, aser kongki tapu meyina; aser ken tapu ajak angashidir, nenoki apudaktsü, aser Nebukadnezzar chubai yangluba hon süngyangluji külemtsü.

⁶Aser shibaisa mapudaker aser mekülemlir idangyongji jangrua aliba mimung misem nung puoktsütsü.”

⁷Anungji iba mapang nung, nisung ajaki jangzü ola, jemji, tzürang kongki aser kongki tapu meyina, aser ken tapu ajak angashidang apudak aser Nebukadnezzar chubai mesoba hon süngyanglu külem.

⁸Anungji iba mapang nung Kaldi nunger kar anasa aru aser Yihuda nunger aitsü.

⁹Nebukadnezzar chuba dang parnoki ashi, “Oh chuba, teti taküm liang.

¹⁰Oh chuba, nisung shiai jangzü ola, jemji, tzürang kongki, aser kongki tapu meyina, aser ken tapu ajak angashidang apudaktsü, aser hon süngyanglu külemtsü ta nai ozüng yanglu.

¹¹Aser shibai apudaka mekülemlir, milak adoka aliba misem tiyong nung puoktsütsü.

¹²Babilon province nung yimsüsüba mapa madak ketdangser Yihuda nunger kar, Shadrak, Meshak, aser Abednego, nai shimteta lir, Oh chuba, item nisungi na mezüngoker; parnoki ne tsüngremtem metenzüker, mesüra nai yangluba hon süngyanglu mekülemer.”

¹³Idangji ain adoka aser mit adoka Nebukadnezzari Shadrak, Meshak aser Abednego, anir arutsü mela. Idangji parnoki item nisungtem chuba madangi anir aru.

¹⁴Nebukadnezzari parnok dang ashi, “Oh Shadrak, Meshak, aser Abednego, nenoki kü tsüngrem metenzüker, mesüra ni yangluba hon süngyanglu mekülemer ta ya atangji asü?

¹⁵Tang nenoki jangzü, jemji, tzürang kongki, aser kongki meyina aser ken tapu ola ajak angashidang, ni yangluba süngyanglu tsüngdang apudaktsü, aser külemtsü nenoki renema lira, aji tajungba dang; saka nenoki mekülemra, milak jangrua aliba misem nung puoktsütsü; aser kü ket nungi nenok kümzüktsüba tsüngrem shiba ali?”

¹⁶Shadrak, Meshak aser Abednegoi chuba dang langzüa ashi, “Oh Nebukadnezzar, onoki iba indang ne dang langzütsü kecha tenüngdaktsü maka.

¹⁷Ajiang, ozü Tsüngrem shiba onoki tenzüker pai milak adoka aliba misem nungi onok kümzüktsü koka lir; aser Oh chuba, pai onok ne ket nungi kümzüktsü.

¹⁸Saka aji oda mesüaka, Oh chuba, nai ya metetang, onoki ne tsüngremtem metenzüktsü, mesüra nai yangluba hon süngyangluji mekülemtsü.”

¹⁹Idangji Nebukadnezzar ain kanga adok, aser Shadrak, Meshak aser Abednego anema pa tejak tebang balaka melenshi; anungji misemji akhidang aliba dang nungi tenetben agi tatsükba kümdakjang ta parnok dang mela.

²⁰Aser pa temeranger telok rongnung tashi aitba nisung kar dang Shadrak, Meshak, aser Abednego alena milak adoka aliba misem nung puoktsütsü pai mela.

²¹Idangji item nisungtem parnok tema nung sembangba semoksü, kolakjen, aser temang semoktsü, aser süoshi tanga dena alen aser milak adoka aliba misem tiyong nungji puoktsü.

²²Aser chuba ozüng kanga tesashi, aser misemji onsara tatsük asü nung, Shadrak, Meshak, aser Abednego alenertem milak jangrua aliba misem jagi rongset.

²³Aser item nisung asem, Shadrak, Meshak, aser Abednego alener milak jangrua aliba misem tiyong nungji tsük.

²⁴Idangji Nebukadnezzar aoksa, aser ilunga noktak, aser pai pei kübok teshisadanger dang ashi, “Asenoki nisung asem alener mi nung meinoktsü no?” Parnoki langzüa chuba dang ashi, “Atangji, Oh chuba.”

²⁵Pai ashi, “Ajiang, ni nisung pezü mi tiyong nung jaja-a angur, aser parnok dak kecha masür; aser pezübubaji tereprangtsü tsüngremtem chir ka mesüka lir.”

²⁶Idangji misem jangruba bang anasa arua Nebukadnezzari jembia ashi, “Shadrak, Meshak, aser Abednego, nenok tematiba Tsüngrem tenzükertem, adokang aser yagi arung.” Idangji Shadrak, Meshak, aser Abednego mi tiyong nungi adok.

²⁷Aser yimsüsür tongtipur aser governortem, aser chuba teshisadangertem külemi sentepa, item nisung asem angu, aser parnok temang madak mi tashi mali, mesüra parnok kolak nung ku memerok, mesüra parnok temaba semoksü marong, mesüra parnok dak mi züknema metui liasü.

²⁸Nebukadnezzari ashi, “Shadrak, Meshak, aser Abednego Tsüngrem temoatsü sang, shibai pei tenzükertem shirnoki pa dak temulung alem parnok kümzüktsü pei tenyar yok aser parnoki pei Tsüngrem dak alema tanga tsüngrem kecha metenzüktsü mesüra mekülemtsü asoshi parnok temang bendanga agüja chuba ozüng melenshidaktsü.

²⁹Anungji ni ozüng ka yanglur, oda nübur kari, kin, mesüra oshi kobai, Shadrak, Meshak, aser Abednego Tsüngrem anema o ka danga jembidir, anüka lepsatsütsü, aser parnok kitem rüja tenem kümdaktsütsü; kechiyong iba amai kümzüktsü akokba tangar tsüngrem shinga mali.”

³⁰Idangji chubai Shadrak, Meshak, aser Abednego Babilon province nung menden temabai tudaktsü.