Read njo DANIEL 4 Bible Online

DANIEL 4 - njo bible

DANIEL 4

¹Nebukadnezzar chubai alima nung alir nüburtem, kin, aser oshi ajak dangi iba osang yok, “Nenok den tesünep züinang!

²Tematiba Tsüngrem kü tsütsü inyakba temaitsü aser tesüngmangtsü indang metetdaktsütsü ni junga bilem.

³Pa temaitsütem koda tulu lir, aser pa sayatenyatem koda tashi tulu lir! Pa yimli teti aliba yimli lir, aser pa yimsüsüba putusa putu alir.

⁴“Ni, Nebukadnezzar, kü kidang anisüngzüka kü chuba kidang azükarua liasü.

⁵Ni pungmang ka angu, aser aji agi ni aoksadaktsü; kü yipten nung shisadangba aser kü kolak nung mangdang agi ni timtemdaktsü.

⁶Anungji pungmang tetezüji kü nem metetdaktsütsü asoshi Babilon nung tashitemeteter ajak kü tsüngdangi anir arutsü ni ozüng ka yanglu.

⁷Idangji ain sayurtem, tepuartem Kaldi nungertem, aser petinu takzürtem aru; aser parnok tsüngdang ni kü pungmang ashi, saka parnoki iba tetezü kü dang meshitet.

⁸Saka tesüsa Daniel shiba tenüng Belteshazzar, kü tsüngrem nüngtem, aser shiba dak temeshi Tsüngrem tanela lir, pa kü tsüngdangi ait; aser ni kü pungmang yamai pa dang ashi.

⁹Oh Belteshazzar, ainkar madak kibur, temeshi Tsüngrem ne dak lir, aser miim o kecha ne madang tasak masü ta ni metet nung ni anguba kü pungmang aser iba tetezü kü dang shiang,

¹⁰kü yipten nung alidang kü kolak nung mangdangji yamai liasü. Ni reprang, aser ajiang, alima tiyong nung süngdong ka liasü, aser aji kanga talang liasü.

¹¹Süngdongji tulu küma tashi ita liasü, aser iba jagi anüng tonga atu, aser aji alima tatembang ajak nungi ngua liasü.

¹²Iba totem tobur tajung liasü, aser iba süngjang jenti, aser iba nung ajak asoshi chiyungtsü liasü, moapu nung shirurutem iba kübok akhüm angu, aser iba kongsang nung anüng ozütem amung, aser shi ajak iba nungi mesüa liasü.

¹³“Kü yipten manung kü kolak mangdang nung ni reprang, aser ajiang, temeshi mitkar ka kotak nungi alu.

¹⁴Pai tashi agi ayimten, aser ashi, süngdongji lensükang, aser pa kongsang leptokang, pa totem anoktokang, pa süngjangtem prokshidakjang. Iba kübok nungi shirurutem aser pa kongsang nungi ozütem oadokang.

¹⁵Aji saka pa tera tembangji ali nung, merang aser yongmenyin agi nailoker, moapu rem lanu rongnung tokjang, aser aji anüng azüngtzü agi metena tokjang, aser pa shilem alima rem nung shirurutem den lidakjang.

¹⁶Nisung mulungjang nungi pa melenshijang, aser shiruru mulungjang pa nem agüjang; aser pa madang mapang tenetben süidakjang.

¹⁷Mitkartemi lemtetba ozüngji, aser temeshi purtemi lemtetba agi temelabaji ibai lir, oda Tematibai meimchir yimli madak yimsü asür, aser aji pai mulungba nem agütsür, aser iba manung teküboktiba nisungtem yutsür ta akümlir ajaki metettsü.

¹⁸Iba pungmang ya ni Nebukadnezzar chubai angu. Aser na, Oh Belteshazzar, nai tetezü metetdakjang, kü yimli nung tashi temeteter ajaki tetezü kü dang metetdaktsütsü mokoki liaka, naibo koka lir, kechiyong temeshi Tsüngrem tanela ne dak lir.”

¹⁹Idangji Daniel, shiba tenüng Belteshazzar liasü, kenpiga süngmang, aser pai shisa bulu. Chubai ashi, “Belteshazzar, pungmang mesüra iba tetezü agi na tim tetem.” Belteshazzari ashi, “Kü kibur, pungmangji ne sempartem asoshi südakjang, aser tetezüji ne tsükchirtem asoshi südakjang!

²⁰Nai anguba süngdong koba mei aser tashi ita liasü, talak agi anüng tonga liasü, aser alima ajak nungi ngua liasü;

²¹koba totem tobur junga liasü, aser iba süngjang jenti, aser aji ajak asoshi chiyungtsü liasü, koba kübok moapu shirurutem amung, aser koba kongsang nung anüng ozütem talidak liasü:

²²Oh chuba, tulu küma aser tashi ita alibaji na; kechiyong na uluba anüng tashi atonger, aser ne yimsüsüba alima tatem tashi lir.

²³Aser anüng nungi temeshi mitkar ka aluya shiba chubai angu, aser ashi, ‘Süngdongji lensükang, aser aji samadakjang; aji saka tera tembangji ali nung, merang aser yongmenyin agi meketa zür, moapu rem lanu manung tokjang, aser pa anüng azüngtzü agi ladakjaa shiruru rongnung lidakjang;’ oda mapang tenetben mesüi tashi,

²⁴Oh chuba, tetezüji ya, aser ibai tematiba ozüng, kü kibur chuba dangi aruba lir.

²⁵Na nisung rongnungi aridoktsü, aser na talidak moapu shiruru rongnung alitsü, aser nashi ama rem chidaktsütsü, aser anüng azüngtzü agi metentsü, aser ne madak mapang tenetben süidaktsütsü. Meimchir yimli madak tematibai yimsü asür, aser aji pai mulunger nem agütsür, ta nai memetet tashi aji oda alitsü.

²⁶Aser süngdong tembang tera toktsütsü melabaji ya: oda anüng Tsüngremi yimsü asür ta nai meteta kümer külen nungi ne yimli atangji ne nem agütsütsü.

²⁷Anungji Oh chuba, yimlibilema nai kü shisa agizükang, aser temeshi inyakba agi ne menentem pungtokang, aser sensaker dang taochi sayuba agi ne taitem alangzükang; ashiko idangji ne azükaruba atsülangtsü.”

²⁸Ya ajak Nebukadnezzar chuba dak atalok.

²⁹Ita terana tatem nung Babilon chuba ki kilem nung pa jajaa alidang,

³⁰chubai pei sasa ashi, “Iba Babilon tulu koba ni chuba alidak ni yanglua lir, ya kü pei tashi tulu agi aser kü pei sentsüwangshi akhüm tulu asoshi masü no?”

³¹Ano chuba bang nung oji alidang, kotak nungi ola ka alu; “Oh chuba Nebukadnezzar, ya ne dang ashir, ne dang nungi yimliji pilaogo,

³²aser na nisung rongnungi aridoktsü, aser ne talidak moapu shiruru rongnung alitsü; nashi pungchi ama na kangshia rem chidaktsütsü, aser meimchir yimli madak Tematibai yimsü asür, aser aji pai mulunger nem agütsür ta nai memetet tashi, mapang tenetben süidaktsütsü.”

³³Idangyongji Nebukadnezzar chuba madak oji atalok. Nisung rongnungi pa aridok, aser nashi ama rem achi, aser pa temang anüng azüngtzü agi metena liasü, aser pa ku mongzü tezüng ama, aser pa temezüng ozü temezüng ama aküm.

³⁴Aser anogo tatembang nung ni, Nebukadnezzar kü tenük kotak len rangloka yok, aser kü shisatsü kü dangi meyiba aru aser ni tematiba moatsü, aser teti alisang dang ni tenüng asang aser akhüm tsübu; kechiyong pa yimsüsüba teti tatem maka yimsüsüba, aser pa yimli putusa putu alir:

³⁵pa tsüngdang alima alir ajak kecha züngoka mali; kotak temeranger telok rongnung aser alima alir nisung rongnung pai kechi mulunger aji pai inyaker; aser pa ket sotadoktsü mesüra pa dang, “Na kechi inyaker” ta tashir shinga mali.

³⁶Idangjisa kü shisatsü kü dangi meyipa aru; aser kü yimli sentsüwangshi asoshi, kü akhüm aser kü mera aketba kü dangi meyipa aru, aser kü shisa takartem aser kü kübok tamarenertem ni bushia aru, aser kü yimli nung ni amen, aser kü dak yamuka ulutsü enloktsü.

³⁷Tang ni Nebukadnezzari kotak chuba tenüng asanger aser akhüm tsübur; kechiyong pa mapa ajak shitak lir, pa lenmang atangji lir aser shirnoki asüküma jajar pai pa ludaktsütsü koka lir.