Read njo DANIEL 8 Bible Online

DANIEL 8 - njo bible

DANIEL 8

¹Belshazzar chuba yimsüsüba kümsembuba nung, ni, Daniel dangi mezüng amato mangdang ka adok.

²Mangdang nung ni angu; aser aji angudang ni Elam province Susa yimtiba nung liasü, aser kü mangdang nung ni Ulai ayong anasa liasü.

³Idangji ni reprangketa yok, aser ajiang, ayongküm nung san tepung ka tezü ana tener noktaka liasü, aser tezü anaprong talang; saka ka talangba liasü, aser talangbaji tesüsa adok.

⁴San tepung jagi anüolen, anüolentip, aser anüdoklentip tsütsü atongba ni angu, aser shiruru katia pa tsüngdang menoktaktet, mesüra shingaia pa ket nungi mekümzüktet; saka pei pei sünütsü asü, aser pei sasa meren.

⁵Aser ni shisadanga alidang, ajiang, anüolen nungi nabong tepung ka alima rangben madak alinung mekongshi-i dang aru, aser nabongji pa tenük tetsüngda nung shisangshisanga tezü ka liasü.

⁶Aser san tepung koba ni ayong jakdang noktaka angu, pa dangi mit adoka tashi agi pai aria aru.

⁷Aser pa san tepung anasa aruba ni angu, aser pa anema rüktena pa ain adoka, san tepung dakji ajen, aser pa tezü anaji raksatsü; aser pa madang noktaktsü san tepung dakji tashi maka nungji, pai pa ali nung laodaktsü, aser pa dak ajemshi, aser pa ket nungi san tepungji kümzüktettsü shinga maliasü.

⁸Aser nabong tepungji pei sasa kanga merena aküm, aser pa tashi ita akümdang, tezü tuluji raksa-adok; aser iba melena, anüng mopung pezüsülen tsütsü shisangshisanga tezü pezü adok.

⁹Aser parnok ka nungi tezü tila ka adok, koba anüdoklentip, anüdoklen aser sentsüwangshi lima tsütsü kanga dang tulu aküm.

¹⁰ Aser anüng telok tonga ulua aküm, aser petinu telok karbo pai ali-i tsükdaktsü, aser item dak ajemshi.

¹¹Oda pai pei sasa petinu telok Chuba denji atitepa ulu, aser pai maneni tarongba tenlaba pa nungi bener oadok, aser pa temeshidak bensatsü.

¹²Aser ozüng raksaba ajanga petinu telok, maneni tarongba tenla tenlaba dena pa nem agüja liasü; aser ochiba ali nung tsükdaktsü, aser pei mulungba inyaka azükaru.

¹³Idangji temeshi pur kati jembia ni angashi; aser tanga temeshipur kati tejembisang dangji ashi, “Maneni tarongba tenlaba, aser azüngmeyaka kümdaktsüba temenen, temeshidak aser telok anaprongla tetsüng kübok ajemshidaktsütsüba indang mangdangji kopiga alitsü?”

¹⁴Aser pai pa dang ashi, “Aonung aser anepdang meyirijang anaser noklang asem tashi; ajiser Temeshidakji metendaktsütsü.”

¹⁵Kodang ni, Danieli, mangdangji angu, ni aji angatettsü bushi; aser ajiang, kü tsüngdang nisung ka mesüka noktak.

¹⁶ Aser Ulai ayongküm tsüngda nung ni nisung ola ka, jashia angashi, “Oh Gabriel, iba nisung nem mangdangji angatetdakjang.”

¹⁷Anungji ni noktakdaka alidak pa anasa aru, aser pa arudang ni tsübua aoksa, aser kü tejak apudak; saka pai kü dang ashi, “Angatetang, Oh nisung chir, kechiyong mangdangji tatem mapang indang lir.”

¹⁸Pai kü den jembia alidang, kü tejak alilen shir sümanga amua ao, saka pai kü dak kongshi aser noktakdaktsü.

¹⁹Aser pai ashi, “Ajiang, terasaba tatemlen kechi alitsü ni ne dang metetdaktsütsü; kechiyong aji tatembang tatemzükba mapang asoshi lir.

²⁰San tepung tezü ana tener nai angubaji, parnokji Media aser Persia nunger chuba lir.

²¹Aser nabong tepungji Grik chuba lir, aser pa tenük tetsüngda nung aliba tezü tuluji mezüngbuba chuba.

²²Aser koba tetzü raksa-adok, aser iba melen pezü adok, aji yimli pezü kintem nungi adoktsü, saka pa tashi ama masütsü.

²³Aser parnok yimli tatemlen kodang ozüng raksartem sünga kümdir, tsüngken tetsübutsü chuba ka shibai purapuji o aser miim o angateter adoktsü.

²⁴Aser pa ain tulu alitsü, aser pai tetsübutsüka raksatsütsü, saka pei ain agi masü aser azükarutsü, pai mulungba inyaktsü, aser tashi tulutem aser temeshi nisungtem pai raksatsütsü.

²⁵Pa yimsü ajanga pa ket nung külakkübongba azükarudaktsütsü, aser pa mulung nung pa sasa merentsü, aser parnoki mekümdangi alidang pai jenti raksatsütsü; pai ano chubatem madak chuba anema ka noktaktsü, saka nisung teka medeni pa raksatsütsü.

²⁶Aser aonung aser anepdang indang mangdang ashibaji shitak lir; saka nai mangdangji shibangadokang; kechiyong ibai tarutsü indang lir.”

²⁷Aser ni, Daniel lula-adok, aser anogo ishika shiranga ali, idangji ni shishi aser chubar mapa inyak, saka mangdangjagi ni rata-mata, aser aji mangatet.