Read njo HOSEA 10 Bible Online

HOSEA 10 - njo bible

HOSEA 10

¹Pei tejang tangdakja mesangshia aoba tsükmenatzüji Israel lir. Pa tejang tali kümli, tenladak tali pai yangluli ta, pa linük renli, par tongshia renlokli ta.

²Parnok mulungjang tiyazü lir, tang par tai asoshi parnoki khu abentsü; KIBUBAi parnok tenladak raksatsütsü aser pa anoksatsütsü.

³Atangji tangbo parnoki ashitsü, “Onok chuba mali, kechiyong onoki KIBUBA metsübur; aser chubaji kela, pai asenok dang kechi shitet?”

⁴Tezüngzüktepba nung tiyazü azüngashia parnoki amajok o jembir, anungji alu angensaba nung miim-ayidong adok ama, obendangba adoktsü.

⁵Samaria nung alirtemi Beth-aven nashi chanutem asoshi tsübua alitsü, kechiyong iba indang nisungtemi mang ayimtsü aser iba madak süngyanglu külemba putirtemi ajebtsü, pa sentsüwangshi pilaba asoshi parnoki ajebtsü.

⁶Ano aji Yereb chuba dangi sempet ka asoshi Asiriai bener aotsü; Efraim maksü angutsü, aser Israeli pei süngyanglu asoshi aaktsü.

⁷Tzü manung poja ama Samaria pei chuba samatsü,

⁸Aven tokong külemdak Israel temenen raksatsütsü, parnok tenladak ai aser ayidong, meitsü, aser tenem dang parnoki, “Onok nembangang”; aser tenem tila dang, “onok madak tsükang” ta ashitsü.

⁹Oh Israel, Gibea tendak nungi nai temenen menaogo, yangji parnok maneni noktaka lir, Gibea nung parnok menepa rara marutsü no?

¹⁰Kodang ni mulungtetdir, ni parnok merenshitsü; kodang parnok ozüng raksaba anasü agi parnok alendir, parnok anema nisungtem senteptsü.

¹¹Mo anettsü jangraba tesayutet nashi lamenji Efraim liasü, saka la tekong tobur tajung ni süngra meinoktsü; saka ni Efraim dak alu alaba süngra pungloktsütsü. Yihudai alu alatsü, Yakobi ali medema süsütsü.

¹²Nenok pei asoshi temeshiba prokang, temeim takang süngjang ruang; nenok alu tasen ala-ang; kechiyong KIBUBA arua nenok madak tzünglu ama tekümtet marudaktsü tashi pa bushitsü mapangji tang lir.

¹³Nenoki tamajung mapa tensaogo, nenoki tai temenen ruogo; nenoki tiyazü süngjang chiogo; kechiyong nai ne mapa nung aser ne temeranger nisung telok dak temulung alem.

¹⁴Anungji ne nübur rongnung rongrongshishi adoktsü, aser rara mapang nung Shalmani Beth-arbel raksatsü ama, ne mitsa ajak raksatsü; lar chirnur den anüka akusatsü.

¹⁵Yamaji nenok majungba yong Betheli nenok dang inyaktsü, anepungi Israel chuba meshimeshia samatsü.