Read njo HOSEA 12 Bible Online

HOSEA 12 - njo bible

HOSEA 12

¹Efraim mopung achir aser anüdoklen mopung sülen anidaker, pai tiyazü aser teraksatsüba maneni jenti kümdaktsür; aser parnoki Asiria den tenangzüktepba yanglur, aser Ijipi totzü bener air.

²Yihuda den ano KIBUBAi rongrong ka lir aser pa mapa yari Yakob merenshitsü; pai inyakba den sütepa pa nem shia agütsütsü.

³ Nu menden nung pai tedi shibalang nung sot, aser pa tashi ka-dang pai Tsüngrem den toktep.

⁴Hau, pai kotak tenyar den rara aser akok; pai ajeb, aser pa dang mepishi, pai pa Bethel nung bushitet, aser yangji pai asen den jembi.

⁵Oda KIBUBA, Temeranger Tsüngrem, pa tenüng KIBUBA lir.

⁶Anungji na ne Tsüngrem dangi meyipang, temeim aser ochi benshiang, aser ne Tsüngrem madang maneni ata-a liang.

⁷Shishilembar ka teka nung tiyazü seret amer pai külakkübonga inyakner.

⁸Aser Efraimi ashi, “Atangji ni takar kümogo, ni asoshi rongsen nguogo; saka pa rongsen ajak agi pai menaba temenen kodanga meindoktsü.”

⁹Saka ni Ijip lima nungi KIBUBA, ne Tsüngremji lir, akhidang ne teshimtet benjong anogo nung ama ni na süki nung lidaktsütsü.

¹⁰Ano ni ainkartem dang jembi, aser mangdang aika ni agütsü, aser ainkartem ajanga ni o entepa agütsü.

¹¹Gilead nung tai temenen lira parnok khenyongi amajok akümtsü; Gilgal nung parnoki nashi pungchiji tepsetra alu nung ali angensaba nangtena aliba ama parnok tenladak akümtsü.

¹²Yakobi Aram limai jena ao, aser Israeli tetsür ka asoshi mapa inyak, aser kinungtsü ka asoshi pai san anük.

¹³Ainkar ka ajanga KIBUBAi Israel Ijip nungi anir adok, aser ainkar ka ajanga pa wazüka ayu.

¹⁴Efraimi pa kanga jashidaktsü, anungji pa zü pa madak toktsütsü aser KIBUBAi pa tarütsüba pa dangi meyipa agütsütsü.