Read njo HOSEA 13 Bible Online

HOSEA 13 - njo bible

HOSEA 13

¹Kodang Efraimi jembi, nisungtemi atenten, pai pei sasa Israel nung ulu, saka kodang pa Baal dak metsüdak, pa asü.

²Aser tang parnoki tali dang temenen menar, aser parnoki taribi mulusa-a süngyanglutem yangluogo, parnok tesangra shisatsü agi yangluba süngyanglu ajakji teka mapa; item indang parnoki ashir, “Tetepsetba tenlartemi nashi chanutem dak tebang mesepang.”

³Anungji parnok anepdang mepet ama aser yakta oadokba azüngtzü ama, motsüngnem nungi tsüngrem mopungi oner aoba tsüksü ama, aser mipong nungi mokozü adokba ama alitsü.

⁴Saka ni Ijip lima nungi anir adokba nenok Tsüngrem KIBUBAji lir; aser kü dak alema nenoki tangar tsüngrem kecha memetettsüla; kü dak alema kümtetdakba shinga mali.

⁵Ni nenok ali takong lima tzü malidak arem nung mesüa liasü.

⁶Saka kodang parnok pei sasa sünga aküm, parnok mulungjang mezümeküma aküm; anungji parnoki ni amadok.

⁷Anungji parnok tsüngdang ni molusongzü ama asütsü; merok keyi ama ni lenmang anasa mita alitsü.

⁸Ni parnok den shirem pei techanu bener oadokba mesüka ajuruteptsü, aser parnok teku shisatsütsü, aser yangji ni parnok molusongzü mesüka meyokadoktsü, oda arem shirurui parnok shisatsütsü.

⁹Oh Israel, nenok teraksatsübaji ni lir, shibai nenok yaritet?

¹⁰Tangbo nenok kümzüktsü nenok chuba kong ali? Nenok tepu akümtsü nenok yimsüsürtem, shirnok indang nenoki, “Onok nem chuba ka aser yimsüsürtem agüjang” ta ashi;

¹¹aser kü ain adokba nung nenok nem chuba ka agütsü, aser kü terasaba nung ni pa agienadok.

¹²Efraim tai menaba tepung langogo, pa temenen rizünga yua lir.

¹³Tetsü nuso ashiba timtem pa dangi arutsü, saka pa shisa makaba chir ka lir, kechiyong nu menden bang lapokba mapang nung pa noktaka alitsü mapang masü.

¹⁴Leper ain nungi ni parnok alangzüktsü; tasü nungi ni parnok kümzüktsü, Oh tasüba, ne temerenshi kong ali? Oh leper, ne teraksatsüba kong ali? Temulung meyipba kü nükdang nungi nembangadoktsü.

¹⁵Pa adianu rongnung pa soyapokya-a liaka, anüdoklen mopung arutsü, KIBUBA mopung arem nungi adoka, pa tzübu konga akümtsü, aser pa tzüpokdak kongadoktsü, senti oset ajak terizüngdak ni raksatsütsü.

¹⁶Samariai pei tai abentsü, kechiyong pai pei Tsüngrem anema apuso; parnok nok agi laotsü, parnok kinü chanutem anüka akusatsütsü, aser mashisa aliba tsürtem rangpoktsütsü.