Read njo HOSEA 14 Bible Online

HOSEA 14 - njo bible

HOSEA 14

¹Oh Israel, KIBUBA ne Tsüngrem dangi meyipang, kechiyong ne tai yong na laoa lir.

²Nai ne den o benang, aser KIBUBA dangi meyipang; pa dang shiang, “Tai temenen ajak bener oang, aser kechi tajung aji agizükang; aser onok tebang mechi tenla nashi pungchitem ama onoki agütsütsü.

³Asiria-i onok mekümzüktsü, kor nung onoki mamentsü; mesüra onok teka mapatem, ta mashitsü; kechiyong ne dak tebu malirtemi yimlibilem angur.”

⁴Parnok atsüngzüka aoba ni anebtsütsü, ni parnok angati dang meimtsü; kechiyong kü ain adokba pa dang nungi meyipa ogo.

⁵Ni Israel madang azüngtzü ama alitsü, labu naro ama pa apungtsü, aser Lebanon ama pa tera ayangtsü.

⁶Pa kongsangtem sangshia aotsü, aser pa tobur ajungji oliv süngdong ama alitsü aser teronem Lebanon ama alitsü.

⁷Shirnok pa akhüm nung alir, parnok meyipa arutsü; modong ama parnok tanaben adoktsü, aser tsükmenatzü ama apungtsü; teronemji Lebanon yi ama alitsü.

⁸Oh Efraim süngyanglu den ni ano kechi tali inyaktsü? Ni langzüogo, aser pa züngsemtsü; ni fir süngdong tamak ama lir, kü dang nungi ne süngjang angur.

⁹Shiba shisa taka lir, pai itemi angatetang. Shiba tekümdang lir, pai item metetang; kechiyong KIBUBAr sentong shitak lir aser ochishiri item nung jajatsü; saka ozüng raksartem iba nung laotsü.