Read njo HOSEA 2 Bible Online

HOSEA 2 - njo bible

HOSEA 2

¹Nenok adianutem dang, Kü nübur, aser aianu dang, “Taochi angurtem” ta shiang.

²“Nenok tetsü den mepiang, kechiyong la kü kinungtsü masü ni la kinungpu masü; aser la dak nungi nüktapangtaba aser la mama tsüngda nungi jabujari endokdakjang;

³aji mesüra ni la nungi süoshi agizüka mangsa kümdakja, aser la tasonü ama la toktsütsü, aser la azüngmeyakdak ama aser la ali takong ama toktsütsü, aser tetzüra agi la tepsettsü.

⁴Hau, lar chirnur dang ni yimlibilem makatsü, kechiyong parnok nüktapangtar chirtem lir.

⁵Kechiyong parnok tetsüi nüktapangta benshi, parnok asolai maksütsüsa inyak; kechiyong lai ashi, ni meimertem, shirnoki kü nem kü chi aser kü tzü, kü tezüng aser kü kümpa, kü totzü aser kü tajemtsü agütsür parnok sülen aotsü.

⁶Anungji ni la lenmang ai agi atsüdangadoktsü, aser lai pei lenmang mangutsüsa ni la anema atsü atsütsü.

⁷Aser lai la meimertem sülen anidaktsü, saka lai parnok memeneptsü; lai parnok bushitsü saka parnok mangutsü, idangji lai ashitsü, ‘Ni aotsü aser kü mezüng kinungpu dangi meyiptsü, kechiyong ni asoshi tang dang nungi ajiang tajungba liasü.’

⁸Kechiyong la nem tsük, yi, aser totzü ni agütsü, aser Baal asoshi amshiba taribi aser hon ni renloka kümdaktsü ta lai memetet.

⁹Anungji tsük mapang nung ni kü tsük meyipa sotdaktsü, aser yi tsüngkhüm nung kü yi sotdaktsü, aser kü tezüng aser kümpa sü bener oadoktsü, angji lai pei mangsa menembangtettsü.

¹⁰Aser la meimertemi ngua ni la mangsa toktsütsü, aser kü ket nungi shingai la mekümzüktsü.

¹¹Aser la pelaba ajak ni anendaktsütsü, lar benjongtem, lar ita tasen benjong, aser lar amungnü aser lar benjongbentsü amungba ajak.

¹²Aser la tsükmenatzü dong aser mungu dong koba indang lai, ni meimertemi kü nem agütsüba kü taa itemi lir ta ashir, itemji ni teraksa küma yutsütsü; aser ni itemji arem kümdaktsütsü, aser arem shirurui itemji achitsü.

¹³Aser Baal benjong anogo nung ni la merenshitsü, shiba dang lai liangmesen arong; aser kodang teni küri aser senti zük sobur la meimertem dangi ao, aser ni amadok ta KIBUBAi ashir.”

¹⁴Anungji ajiang, ni la mesüzüktsü, aser azüngmeyakdaki la anir arutsü, aser la dang anükalema jembitsü.

¹⁵Idak nung jagi ni lar tsükmenatzü lu la nem meyipa agütsütsü, aser Akhor lentenji teimla kiküm ka asütsü asoshi, aser la aiwa anogo nung ama, aser la Ijip nungi adokba anogo nung ama lai ken atentsü.

¹⁶KIBUBAi ashir, iba anogo nung nai kü dang “Kü kinungpu” ta ajatsü, aser joko kü dang “Kü Baal” ta majatsü.

¹⁷Kechiyong la bang nungi Baal tenüngtem bener oadoktsü, aser parnok tenüngtem joko metetshitsü.

¹⁸Iba anogo nung ni parnok asoshi arem shiruru den, aser anüng ozü den aser ali nung ayazübatem den tezüngzüktepba ka yanglutsü; aser linük nungi ni lijak aser nok aser tongbang raksatsütsü, aser parnok lendong makai mepitaka toktsütsü.

¹⁹Teti asoshi ni na ani asüngtsü, hau temeshiba nung, ochishiba nung, yimlibilem nung, aser taochi nung ni na asoshi ni na ani asüngtsü.

²⁰Temulung alemba nung oda ni na ani asüngtsü, aser nai KIBUBA metettsü.

²¹Iba anogo nung ni anüngtem dang langzütsü, aser parnoki alima dang langzütsü;

²²aser alimai tsük dang, yi dang, aser totzü dang langzütsü; aser parnoki Yezreel dang langzütsü.

²³ Ni asoshi ni la ali nung atemtsü, aser la dang yimlibilem akatsü shiba yimlibilem mungui ali? aser shirnok kü nübur masü parnok dang ni ashitsü, “Na kü nübur lir,” aser parnoki ashitsü, “Na kü Tsüngrem lir.”