Read njo HOSEA 4 Bible Online

HOSEA 4 - njo bible

HOSEA 4

¹Oh nenok Israel nunger, KIBUBA O angang. Kechiyong linük nung nüburtem den KIBUBAi rongrong ka kar, kechiaser linük nung temulung lemtepba mesüra temeimtep mesüra Tsüngrem metetba mali.

²Azüngashiba, yazüba, leptepba, auyaba, aser nüktapangtaba dang lir; itemi adokjen adoker aser azü tokshiba sülen maneni azü tokshiteper.

³Anungji linüki mang ayimer aser yangji alir ajak, oda arem shiruru aser anüng ozü dena jimir; aser tzüyim nungi angotema bener oadoktsü.

⁴Aji saka nisung shingaia teraratep, mesüra shingaia tai tagütsütep; kechiyong ne nüburji putir den raratepba pur amai lir.

⁵Aser anüngdang na metsüdaktsü, aser aonung ne den ainkara metsüdaktsü; aser netsü ni samatsütsü.

⁶Shisatsü anüngba yong kü nübur samar; nai shisatsü magizük nungji, ni asoshi na putir mesüdaktsütsü. Ne Tsüngrem ozüng nai amadok nungji, nia ne chirtem amadoktsü.

⁷Parnok tali züinli parnoki tali ni anema temenen menali asü; ni parnok sentsüwangshiji maksü kümdaktsütsü.

⁸Kü nübur temenen manung parnoki pelateper aser parnok tai madak parnok mulung ayur.

⁹Anungji nübur koma, putira yamaji alitsü, parnok mapatem asoshi ni parnok merenshitsü, aser parnoki inyakba parnok nem ajangzüktsütsü.

¹⁰Parnoki achitsü saka tipmatemtsü, parnoki nüktapangta inyaktsü saka mezüintsü, kechiaser nüktapangta inyaktsü asoshi parnoki KIBUBA senzüka toktsü.

¹¹Nüktapangta aser yi aser yi lanu agi tangatetba bener oadoker.

¹²Kü nüburtemi süng dang shisatsü asüngdanger, aser parnok mechi agi parnok dang metetdaktsür; kechiaser jabujari shisatsüi parnok aibelendaktsü, aser parnoki Tsüngrem toktsür jabujaria oa lir.

¹³Tenem kolak nung parnoki tetepsetba tenlar, aser tenem manung, sülem dong, poplar aser terebint süngdong kübok liangmesen aronger, kechiaser parnok akhümji tajung lir; anungji ner jalatemi jabujari benshia, aser ner kiyimlatemi nüktapangta benshir.

¹⁴Ner jalatemi jabujari benshidang, aser ne kiyimlatemi nüktapangta benshidang ni parnok memerenshitsü; kechiyong teburtema parnok sasa jabujari den oadoker, aser nüktapangtar den shiruru tepseta tenlar, aji oda mangatetba nübur kaji raksatsür.

¹⁵Oh Israel, nai nüktapangtar mapa inyakaka Yihuda dak tai teketdaktsü; Gilgali taru, mesüra Beth-aveni[4] tetu, mesüra, “KIBUBA taküm ali tashi” ta azüngashi tesü.

¹⁶Kechiyong nashi lamen küprak ama, Israel küpraka lir; tangbo moapu nung san chanu ama KIBUBAi parnok mesütsü asü?

¹⁷Efraim süngyanglu den ka küma lir, pa oda tokjang.

¹⁸Parnok ajemtsü sensena kümogo, maneni parnoki jabujari benshir; la yimsüsürtemi maksü kanga meimer.

¹⁹Mopungi pei tashikang nung la bener oa lir, aser parnok tetepsetba tenla asoshi parnok akseta alitsü.