Read njo HOSEA 5 Bible Online

HOSEA 5 - njo bible

HOSEA 5

¹Oh nenok putirtem, ya angang! Nenok Israel kidong, temulung agüjang! aser Oh, chuba kibong, tenarong tenang, kechiyong nenok anema o bendangba lir; kechiaser Mizpa nung nenok sang ka ama liasü, aser Tabor madak sang mesanga yua liasü.

²Aser parnoki Shittim kangla aroka atu, saka parnok ajak ni arütsütsü.

³Ni Efraim metet, aser kü dang nungi Israel miima mali; kechiyong tang, Oh Efraim, nai jabujari benshiogo, Israel menena kümogo.

⁴Par mapa agi par Tsüngrem dangi meyiptsü parnok memelar, kechiyong parnok rongnung süngyanglu külemba tanela lir, aser parnoki KIBUBA memetet.

⁵Israel mezümekümbaji pa jakdang kuli adoka lir, aser Israel o Efraim parnok pei tai nung metsüdaktsü, ano Yihuda parnok den metsüdaktsü.

⁶Par san telok aser nashi telok den KIBUBA bushia parnoki aotsü, saka parnoki pa mangutsü, parnok nungi pa atsüngzükogo.

⁷KIBUBA anema parnoki külaka benshiogo, kechiyong parnoki kita chir sotsüogo. Tang ita tasen agi par lu den parnok meyokadoktsü.

⁸Gibea nung nenoki jangzü aser Rama nung jemji apuang, Beth-aven nung arür osang sangokjang; Oh Benjamin, ne sülen arudarji!

⁹Temerenshi anogo nung Efraim azüngmeyaka akümtsü. Israel nunger rongnung koba atangji ataloktsü ali, aji ni metetdaktsüogo.

¹⁰Yihuda tongtipurtemji arrtsü lung agienertem mesüka kümogo, parnok madak kü terasaba tzü ama ni meküploktsütsü.

¹¹Efraim ajemzüka yoka lir, obendangba nung akorepja lir, kechiaser pai amajok sülen jajatsü mulungtet.

¹²Saka Efraim madang ni tarütsü mesen mesüka, aser Yihuda kidong madang tap akümba mesüka lir.

¹³Kodang Efraimi pa shirangba angu, aser Yihudai pa zübu angu, idangji Efraim Asiriai ao, aser Yareb chuba dangi yok, saka pai na anebtsütsü makok mesüra ne zübu manebtsütet.

¹⁴Kechiyong Efraim madang ni molusongzü ka amai, aser Yihuda kidong madang molusongzü chanu amai alitsü. Ni, oda ni, tila küma shisatsütsü aser oadoktsü, ni bener oadoktsü aser tekümzüktsür shinga malitsü.

¹⁵Parnoki pei tai nangzüka kü tejak mebushi tashi, ni pei talidaki meyipa aotsü, aser parnok tekangshi nung parnoki ni jangraa bushitsü.