Read njo HOSEA 7 Bible Online

HOSEA 7 - njo bible

HOSEA 7

¹Kodang ni Israel anebtsüdir, idangji Efraim tai temenen aser Samaria tamajung meteta akümer; kechiyong parnoki yazüa benshir, aser auürtem telungi aiter, aser kimalen rakzükraktemertemi rakzükraktemer.

²Aser parnok mapa tamajung ajak ni bilemteter ta parnoki meshisadanger, tang parnok pei inyakba agi parnok meketbanga lir, itemji kü jakdang lir.

³Parnok mapa tamajung agi, aser parnok tiyazü agi chuba aser tongtipur peladaktsür.

⁴Parnok ajak nüktapangtartem, amtsük asangeri mipong tsüka aruba ama parnok lir; amzü ajepsaba nungi aji piyazü maküm tashi mi majemokba mipong ama.

⁵Asen chuba tendak tongtipurtem yi agi leta shiranga aküm; sensamalemertem den pai pei teka songtok.

⁶Kechiyong parnok tasa tamajung agi parnok mulungjang mipong ama aronger, aonung tepiyong parnok mit mokonga lir; anepdangbo jangrua aliba mi ama iba milak adoker.

⁷Mipong ama parnok ajak tatsük lir, aser parnoki par yimsüsürtem meyoker; par chuba ajak laoa lir, aser parnok shingaia kü dang majar.

⁸Efraimi pei sasa nisungtem den meyokteper, Efraimji teraksa amtsük ka lir.

⁹Aenertemi pa tashi meyoker, aser pai aji memetet, pa dak tesem tesem nung kupu adoka lir, aser pai aji memetet.

¹⁰Aser pa anema Israel mezümekümba agi kuli agütsür; aji saka parnoki KIBUBA par Tsüngrem dangi memeyiper, mesüra pa mebushir.

¹¹Aser shisatsü maka tongmelang posü ama Efraim lir, parnoki Ijip dang ajar, aser Asiria dangi aor.

¹²Kodang parnok odir, ni parnok kü sang agi aputsü, anüng ozütem ama ni parnok anir alutsü, parnok mapa tamajung asoshi ni parnok merenshitsü.

¹³Parnok asoshi aiatai! Kechiyong parnoki kü dang nungi pila-a ao, parnok asoshi tesamatsü! Kechiyong parnoki ni anema ozüng raksa, ni parnok alangzükla, saka parnoki ni anema tiyazü jembi.

¹⁴Parnoki temulungjang agi kü dang mayimten, saka parnok yipten nung parnoki asateper; parnoki chi aser yi asoshi asateper aser ni anema apusor.

¹⁵Ni parnok sayutetaka aser tepen tashi itdakjaka, ajisaka ni anema parnoki tamajung tasa asar.

¹⁶Parnok meyiper saka temalen aliba pa dangi masü; parnok tashioktsüba lijak dang mesüka lir. Parnok tebang agi ain adokba yong tongtipur nok agi laotsü; Ijip lima nung parnok sensatsütsü ya alitsü.