Read njo HOSEA 9 Bible Online

HOSEA 9 - njo bible

HOSEA 9

¹Oh Israel, nenok tepelatep! Kintem ama angaka tuo, kechiyong ner Tsüngrem toktsür nenok jabujaria oa lir; mo anetba motsüngnem ajak nung nai nüktapangta-a sen aaba meimogo.

²Motsüngnem aser tsükmenatzü menüngdak agi parnok memesütsü, aser yi lanu agi la tip matemtsü.

³KIBUBAr lima nung parnok malitsü, saka Efraim Ijipi meyiptsü, aser Asiria nung memerükba chiyungtsü parnoki achitsü.

⁴Parnoki yi tenla KIBUBA nem meshiloktsütsü mesüra parnok tetepsetba tenla jagia pa mepeladaktsütsü; parnok madang parnok tenlaji mangyimer chiyungtsü ama alitsü, aji achir ajak menena akümtsü, kechiyong parnok chiyungtsüji parnok tepok asoshi dang lir; aji KIBUBA kidangi maitsü.

⁵Temeshi benjong anogo nung aser KIBUBA benjong anogo nung nenoki kechi inyaktsü?

⁶Kechiyong ajiang, tesamatsü nungi parnok oadokogo, aji saka Ijipi parnok anitentsü, Memfisi parnok aremtsü, parnok senti taribitemji temungtsü agi nembangtsü parnok süki nung ai alitsü.

⁷ Temerenshi anogotem aruogo, shia agütsüba anogotem aruogo, Israeli aji metettsü ainkarji tamachi, tanela atenba nisungji yiar, kechiaser ne tai temenen jenti aser tetsükchitepba tulu.

⁸Ainkarji kü Tsüngrem nübur Efraim mitkar ka liasü; aji saka pa taolen ajak nung ozü-kümer sang lir, aser pa Tsüngrem kidang tesükchitep lir.

⁹ Gibea tendak ama parnoki pei sasa kanga raksaogo; parnok tai temenen pai bilemtettsü, pai parnok temenen merenshitsü.

¹⁰ Arem nung tsükmenatzü jang ama ni Israel angu, mezüngbuba tsüngkhüm nung mungudong nung mezüng amenba mungu mesüka, ni nenok tebu nunger angu; saka parnok Baal-peori aru, aser parnok sasa Baal nem bendanga agütsü aser parnoki meimba oset ama parnok tesempatsü oset ka aküm.

¹¹Efraim sentsüwangshi ozü ama yima aotsü, tasoba malitsü, nubenba malitsü, mashisa malitsü.

¹²Parnoki chirnur mesütetaka, nisung kata melidaktsüi ni parnok rakzüka adoktsü; hau kodang ni parnok nungi piladir, parnok asoshi aiatai!

¹³Ni ngua aruba, tajungdak atemba Tair ama, Efraim lir, saka Efraimi par chirtem tetepseter dangi anir aotsü.

¹⁴Parnok nem agüjang, Oh KIBUBA, nai kechi agütsütsü? Parnok nem nu menden teraksa aser mama takong agüjang.

¹⁵Parnok tamajung mapa ajak Gilgal nung lir, kechiyong yangji ni parnok sempa; parnoki inyakba mapa tamajung asoshi ni kü ki nungi parnok aridoktsü; ni joko parnok memeimtsü; parnok tongtipur ajak bangdak anema apusortem lir.

¹⁶Efraim dak zükogo, par tera kongadokogo, parnoki tejang matangtsü; hau, parnoki mesütetaka, parnok nu menden tejang tajungji ni tepsettsü.

¹⁷Kü Tsüngremi parnok endokadoktsü, kechiaser parnoki pa dang manga, kin rongnung parnok nemzüa senzürtem alitsü.