Read njo AMOS 2 Bible Online

AMOS 2 - njo bible

AMOS 2

¹ Yamai KIBUBAi ashir, “Moabi ozüng raksaba asem asoshi, oda pezü asoshi, ni iba temerenshi magientsü; kechiaser Edom chuba teret pai shinü küma arong.

²Anungji Moab madak ni mi yoktsü, aser aji agi Keriot chuba kitemji rongreptsü, aser rongrongshishi, jangzü ola aser ayimtenba rongnung Moab asütsü;

³iba tiyong nungi ni o bendanger atsüngdoktsü, aser pa den tongtipur ajak tepsettsü,” ta KIBUBAi ashir.

⁴Yamai KIBUBAi ashir, “Yihudai ozüng raksaba asem asoshi, oda pezü asoshi, ni iba temerenshi magientsü; kechiaser KIBUBA ozüng parnoki mebenshi, aser pa temelaba ozüng parnoki mayu, aser parnoki yazüba agi parnok aibelendaktsü, koba sülen parnok tsüraburtemi jaja.

⁵Anungji ni Yihuda madak mi yoktsü, aser aji agi Yirusalem chuba kitemji rongreptsü.”

⁶Yamai KIBUBAi ashir, “Israeli ozüng raksaba asem asoshi, oda pezü asoshi, ni iba temerenshi magientsü; kechiaser parnoki temeshipur taribi yong ayok, aser tsüngsem jura ka yong maka maiter ayoker.

⁷Oda ali telungi ia sensaker kolak manung ajemshir, aser ajemalur lenmang nungtokadoker; aser kü temeshi tenüng menendaktsütsü asoshi tebu aser jabaso aiür kasa dangi air;

⁸aser tenangzükba nung agiba süoshi manung tekülemdak shia anasa parnok sasa ontaka alir, aser Tsüngrem kidang parnoki sen chizükba yi ajemer.

⁹ Aji saka parnok jakdang ni Amor nunger samatsütsü, shiba tar cedar süngdong ama talang liasü, aser sülemdong ama pa tashi tait liasü; aji saka temalen nungi ni pa süngjang, aser telunglen nungi pa tera raksatsütsü.

¹⁰Ano ni pa Ijip lima nungi anitet, aser Amor lima amangtsü arem nung küm lir anishi.

¹¹ Aser nenok jabasotem nungi ainkar adokdaktsü aser nenok asangurtem nungi Nazarit nisungtem adokdaktsü. Aji atangji masü no? Oh Israel chirtem? ta KIBUBAi ashir.

¹²Saka Nazarit nisungtem nema nenoki yi jemdaktsü, aser ainkartem dang mela-a, ‘Ainkar o tejembi,’ ta ashi.

¹³Ajiang, tsükpong sünga alibai talungtsü anenba ama, ni nenok dak anentsü.

¹⁴Terangrangertemi mejentettsü, aser tashikari pei tashi marutsü, mesüra temerangeri pei sasa mekümzüktettsü.

¹⁵Shibai lijak amer pai menoktaktettsü, aser shiba tetsüng tekara pa sasa mekümzüktettsü; mesüra shibai kor nung asanger pa taküm mekümzüktettsü.

¹⁶Aser temeranger rongnung shiba tasü tait lir iba anogo nung mangsa ajentsü,” ta KIBUBAi ashir.