Read njo AMOS 3 Bible Online

AMOS 3 - njo bible

AMOS 3

¹“Oh Israel nunger, nenok anema Ijip lima nungi ni anitetba kidong ajonga anema, KIBUBAi jembiba iba o angang;

²Alima kidong ajak yutsür ni nenok dang metet aser anebalu, anungji nenok tai temenen ajak ni semdangtsü.

³Temulung meputepra, nisung ana külemi jajatsü asü?

⁴Arem nung tetepsettsü shiruru maka dang molusongzüi arr asü? Molusongzü pongtui pa lungki nung langka bena arua melira asatsü asü?

⁵Pei asoshi ali nung sang soa mali nung ozüji sang nung aputsü asü? Sang nung kecha mapu nung ali nungi sangji joka atutsü asü?

⁶Yimti nung jangzü apura nisungtem matentener no? Yimti ka nung tamajung ka atalokra, aji KIBUBAi inyakba masü no?

⁷Atangji KIBUBA Tsüngremi pei tenzüker ainkartem dang pei mapa jungkai adoka mesayui pai kecha meinyaktsü.

⁸Molusongzüi arr-ogo, shibai metsübutsü? KIBUBA Tsüngremi jembiogo; shibai shin o mejembi-i litet?”

⁹Ashdod chuba kidang, aser Ijip lima nung chuba kidang sangdongang aser shiang. “Samaria tenem nung nenok sasa atenshiang, aser yangji rongrongshishi kodaka ali ajiang.

¹⁰Kechiyong parnoki shitakba inyaktsü memetet, ta KIBUBA, shibai parnok chuba kidang teka yitepba aser rakzükraktemba rizünga yutsür, pai ashir.

¹¹Anungji yamai KIBUBA Tsüngremi ashir: ‘Tsükchiri linük meketbangtsü, aser ne dak nungi pai tashi agizükadoktsü, aser ne chuba kitemji rakzükraktemdaktsütsü’.

¹²Yamai KIBUBAi ashir, ‘Sannükeri molusongzü bang nungi tetsüng ana, mesüra tenarong ka, shia aru ama, Samaria nung alir Israel nunger, yipten kinüklen aser yipten külen den kümzüktsü.’ ”

¹³Nenoki angang, aser Yakob kidong anema kuli agüjang, KIBUBA Tsüngrem, Temeranger Telok Tsüngremi ashir.

¹⁴ “Kechiyong Israel ozüng raksaba merenshiba anogo nung, ni ano Bethel tenladaka merenshitsü, aser tenladak tezütem leptoktsütsü, aser ali nung tsükdaktsütsü.

¹⁵Aser tsüngkhüm ki aser mei ki anaprongla ni samatsütsü; aser shiti pu agi yangluba ki samatsütsü, aser ki jenti tatem akümtsü,” ta KIBUBAi ashir.