Read njo AMOS 4 Bible Online

AMOS 4 - njo bible

AMOS 4

¹“Ya angang, nenok Bashan nashitem, nenok Samaria tenem nung alirtem; nenoki sensaker rishikangshir, mokokmeiner ajemzüka yoker, aser parnok kibur dang, bener arung, asenoki jemdi, ta ashir.

²Parnoki nenok jui agi atsür aotsü, aser nenok anünga alibatemji ango poroki agi atsütsü, item anogo nenok madak arudagi ta KIBUBA Tsüngremi pa temeshiba agi azüngashia ashir.

³Aser nenok nisung shia indang indanga la madak teraksa alidak jagi tugutsü, aser nenok sasa Harmon nung enoktsütsü” ta KIBUBAi ashir.

⁴“Betheli arung, aser ozüng raksa-ang, Gilgali arung, aser ozüng raksaba jenti kümdakjang; aser nenok shiruru tenla anepdang shia, aser nenok ter-shilem asemnü shia bener arung;

⁵aser tenüngsang tenla, piyazü meinokba amtsük ronga agüjang, aser temulunger tenla sangdongang aser itemji metetdakjang. Kechiyong, Oh Israel nunger nenoki aji aginür” ta KIBUBA Tsüngremi ashir.

⁶“Aser ano ni nenok nem tepu temerük, aser nenok talidak ajak nung anüngakongba agütsüogo, aji saka nenoki kü dangi meyipa maru” ta KIBUBAi ashir.

⁷“Aser alu arutsü ita asem lia ni ano nenok nungi tzünglu sot, ni yimti ka madak tzünglu arudaktsü aser yimti tanga ka madakbo tzünglu marudaktsü; alu ka madak tzünglu aru, saka alu koba nung tzünglu maru aji konga adok.

⁸Anungji yimti ana asem yimti ka dangi tzü ajemtsü meshimetsüa aru aser tipmatem; aji saka nenoki kü dangi memeyip” ta KIBUBAi ashir.

⁹“Ni nenok tashitak aser wara agi tongdaktsü, nenok atsüki jenti aser nenok tsükmenatzü lutem aser nenok mungudongtem aser nenok oliv süngdongtem süngkui chimatsü. Aji saka nenok kü dangi memeyip” ta KIBUBAi ashir.

¹⁰“Ni nenok Ijip dangi yokba ama tashitak wara yok, ner asangurtem ni nok agi tepset; ner kortem ni meiner oadok, aser ner yipten dong teshinem agi nenok teni tonga ni atudaktsüogo. Aji saka nenoki kü dangi meyipa maru,” ta KIBUBAi ashir.

¹¹ “Tsüngremi Sodom aser Gomora endoktsüba ama ni nenok rongnung karbo endoktsüogo, aser jangrua aliba nungi sütetba milungsang ama nenok liasü. Aji saka nenoki kü dangi memeyip” ta KIBUBAi ashir.

¹²“Anungji, Oh Israel, ni nenoki dang yamai inyaktsü, aser ni ne dang yamai inyaktsü ali nungji, ne Tsüngrem den ajuruteptsü renemang” Oh Israel.

¹³“Kechiyong angang, shibai tenemtem kümdaktsü, aser mopung yanglu, shibai nisung dak pa tebilembatem kechi lir aji ashir, aser anepdangji tammang kümdaktsür, aser alima tokong tenem nung ajemshir; pa tenüngji KIBUBA, Temeranger Telok Tsüngrem lir.”