Read njo AMOS 6 Bible Online

AMOS 6 - njo bible

AMOS 6

¹Zion nung sadoksadoka alir asoshi, aser Samaria nung temulung lema alir asoshi, tongti kin rongnungi tamarener asoshi shirnok dangi Israel kidong aru, parnok asoshi aiatai!

²Kalne ajanga oang, aser reprangang, aser idak nungjagi tulusang Hamat dangi oang; ajiser Filistia nung Gat jagi luang! Parnokji item yimli dang nungi tajungba asü? Mesüra parnok li nenok li dang nungi tuluba asü?

³Oh nenok tamajung anogo talangi endoktsürtem aser teka azü tokshiba anasa arudaktsürtem;

⁴shiti pu yipten nung mepitaka alirtem, aser parnok sasa langbang nung songtoka alirtem, aser san telok nungi san chanu aser nashi ki nungi nashi chanu achirtem.

⁵Kongki den paibalema ken atener, aser Dawid ama ken kongki pei asoshi yangerteter;

⁶marok nung yi ajemer, aser parnok sasa totzü tajung agi mezürtem; saka Yosef timtem tekangshi atema parnoki temulung ayanga mali.

⁷Anungji tang mezüngbuba tepuokertem den parnok tepuokdaki aotsü aser songtoka ondaker benjongtepba süitema aotsü.

⁸KIBUBA Tsüngremi pa sasa azüngashi, ta KIBUBA, Temeranger Tsüngremi ashir, “Ni Yakob mezümekümba sempar, aser pa mitsatem sempar. Anungji yimti aser yangji aliba ajak den ni bendanga agüjadoktsü.

⁹Aser ya ataloktsü, ki ka nung nisung ter lira, parnok asütsü.

¹⁰Idangji tebu tanubu shibai pa aronger, kidang nungi teret bener adoktsü asoshi pai pa bena arutsü, aser shiba ki telungba nung lidir, pa dang ashitsü, ‘Ne den ano kar lir ma?’ Aser pai ashitsü, ‘Shinga mali,’ aser pai ashitsü, ‘Ola tadok, kechiyong asenoki KIBUBA tenüng metetshitsüla.’

¹¹Kechiyong ajiang, KIBUBAi melar aser ki tulu anüka raksatsü, aser ki tila atsüsa-a aotsü.

¹²Kori lungpak manung asümtetdi ma? Tzüyim nung nashi pungchitemi alu aladi ma? Aji saka nenoki ochiba agi taku, aser temeshiba süngjang mim kümdaktsüogo.

¹³Nenok shiri amajok mapa nung pelateper, aser ashir, “Asenoki, asen pei tashi agi asenok asoshi ain munguka ma?” ta ashir.

¹⁴Kechiaser, ajiang, “Oh Israel kidong, ni nenok anema kin ka adokdaktsütsü” ta KIBUBA Temeranger Tsüngremi ashir, aser Hamati ailen lenmang nungi Araba ayong tashi parnoki nenok rishikangshitsü.