Read njo AMOS 7 Bible Online

AMOS 7 - njo bible

AMOS 7

¹Yamai KIBUBA Tsüngremi kü dang sayu; aser ajiang tesü adokba tzünütsü meia alidang, pai süngku adokdaktsü; aser angang, aji chubar tzünütsü bendener külen liasü.

²Aser kodang moapu nung parnoki rem chima, idangji ni ashi, “Oh KIBUBA Tsüngrem, tai tokang, ta ni ne dang mepishir, Yakobi koda noktaktettsü? Kechiyong pa kanga tila lir.”

³Iba indang KIBUBAi temulung meyip, aji oda masütsü ta KIBUBAi ashi.

⁴Yamai KIBUBA Tsüngremi kü dang sayu, aser ajiang, KIBUBA Tsüngremi mi agi bendangtsü aja; aser aji agi tarok tulu meyok, aser ali meyokadoker liasü.

⁵Idangji ni ashi “Oh KIBUBA Tsüngrem, ni ne dang mepishir, anenangma. Yakobi koda noktaktettsü? Kechiyong pa kanga tila lir.”

⁶Iba indang KIBUBAi temulung meyip, ya aji oda masütsü, ta KIBUBA Tsüngremi ashi.

⁷Yamai pai kü dang sayu, aser ajiang, tasadangba lisü agi yangluba jara ka anasa, KIBUBA tasadangba lisü ka pa ket nung amer noktak.

⁸Aser KIBUBAi kü dang ashi, “Amos, nai kechi angur?” Aser ni ashi, “Tasadangba lisü ka.” Idangji KIBUBAi ashi, “Ajiang, kü nübur Israel rongnung ni tasadangba lisü ka ayutsü, ni joko parnok oda metoktsütsü.

⁹Aser Isak tekülemdak tesemtem azüngmeyaka alitsü, aser Israel temeshidak sendoka yutsütsü; aser Yeroboam kidong anema ni nok mekangtsü.”

¹⁰Idangji Bethel putir Amaziai Israel chuba Yeroboam dangi ya shia yok, “Israel kidong rongnung na anema Amosi tamajung tasa asaogo, pa o ajak alimai matir.

¹¹Kechiyong Amosi ashir, ‘Yeroboam nok agi asütsü, aser idangji linük nungi Israel pur aotsü.’”

¹²Ano Amaziai Amos dang ashi, “Oh na ainkar, oang, Yihuda limai jenang, aser yangji pok yimang, aser ainkar o jembiang;

¹³saka joko Bethel nungbo ainkar o tejembi, kechiyong ibai chubar tekülemdak lir aser ya chuba ki lir.”

¹⁴Idangji Amosi langzü, aser Amazia dang ashi, “Ni ainkar masü, mesüra ainkar chira masü, saka ni aluyimer, aser munguzünu lu anebalur nisung lir;

¹⁵aser san telok sülen anidakba nungi KIBUBAi ni jatet, aser KIBUBAi kü dang ashi, ‘Oang, kü nübur Israel dang ainkar o jembiang.’

¹⁶“Anungji tang nai KIBUBA O angang. Nai ashir Israel anema o tejembi, aser Isak kidong anema ne o tetsükdaktsü.

¹⁷Anungji yamai KIBUBAi ashir; ‘Nebutsü yimti nung nüktapangtatsür akümtsü, aser ne jabaso aser jalatem nok agi laotsü, aser ner li tilala küma lemsatsü, aser na ne sasa memerükba lima nung asütsü, aser Israel pei lima nungi atangji tepuoker küma anir oadoktsü.”