Read njo OBADIA 1 Bible Online

OBADIA 1 - njo bible

OBADIA 1

¹ Obadia mangdang: KIBUBA Tsüngremi Edom indang yamai ashir; KIBUBA nungi onoki osang angashiogo, aser ya oda shia kin rongnung chuba tenyar yoka lir, nenok aramesoang, aser la anema tongbang nung asenok aramesodi.

²Ajiang, ni na kin rongnung tila kümdaktsüogo; na kanga sensatsütsü.

³Ne mulungjang asüküm agi na ashiokdaktsü, Oh na lung tulu jakmaba nung lir, azük talang nung alir, oda pei mulungjang nung, shibai ni ali-i ludaktsütsü ta ashir.

⁴Nai mongzü ama talangi tuaka, aser ne tesep petinu rongnung yangluaka, ni yang nungjagi na anir alutsü ta KIBUBAi ashir.

⁵Ne dangi auür arura, aonung rakzükraktemer arura, na kodaka raksatsütsü! parnok peria maka tashi parnoki mauyatsü no? Tsükmenatzü aonger kar ne dangi arura, parnoki tsükmenatzü tendok kar metoktsütsü no?

⁶Esau indang koda bushitet! Pa miima akaba rongsen koda putet!

⁷Parnoki na arrtsü tonga aridok; ne den yimjung nung aliba nisungi na ashioktsü, aser ne madak takok angu, ne metsü menakertemi ne kübok sang soa ayu; iba indang kecha tangatetba mali.

⁸Iba anogo nung ni Edom nungi shisa takar nisungtem, aser Esau tenem nung tangatetba mesamatsüli ma? ta KIBUBAi ashir.

⁹Oh Teman, ne temerangertem aoksatsü, oda nisung shia Esau tenem nungi tetepsetba agi okshia samadaktsütsüsa.

¹⁰Nenu Yakob dak teka aiba asoshi maksü agi na nembangtsü, aser na teti asoshi leptokadoktsü,

¹¹Bendangertemi pa oset bener aoba aser par süngkhümi ia, Yirusalem madak an toktang dang, na atsüngena noktakba anogo nung, oda na parnok rongnung ka liasü.

¹²Nenu timtem lendong anogo nung nai pela-a tereprang, aser Yihuda chirtem madak parnok tesama anogo nung tepelatep; mesüra tejashitsü anogo nung tasüküm.

¹³Kü nübur süngkhümbongi parnok lendong mapang nung tei; hau, parnok lendong anogo nung parnok toushi madak pela-a tereprang, mesüra parnok lendong anogo nung nenoki parnok oset nung teka tei.

¹⁴Jena aortem leptangtsü asoshi, na lenjem nung tenoktak; tejashitsü anogo nung anünga alirtemji bendanga tagütsü.

¹⁵Kechiyong kin ajak madak KIBUBA anogoji lir; nai inyakba ama ne daka inyaktsü; nai benshiba ne kolak dangi meyipa arutsü.

¹⁶Kechiyong kü temeshi tenem nung nenoki ajemba ama, yangji kin ajaki maneni ajemtsü, hau, parnoki ajemtsü aser meyoktsü, aser parnok mali ama dang akümtsü.

¹⁷Saka Zion tenem nung jena aortem alitsü, aser aji temeshi alitsü; aser Yakob kidongi senmang agitsü.

¹⁸Yakob kidong mi akümtsü aser Yosef kidong milak akümtsü, aser Esau kidong mo tembang akümtsü, aser parnoki itemji arongtsü, aser parnok meyoktsü, aser Esau kidong kata anünga malitsü; kechiyong KIBUBAi aji jembiogo.

¹⁹Anüolentip alir Negeb Esau tenem agitsü, aser ali tenemtsüng nung alirtem Filistia nunger atsüngtsü, aser parnoki Efraim moapu aser Samaria moapu agitsü; aser Benjamini Gilead agitsü.

²⁰Israel chirtem tepuokba iba telok koba Kanan nunger rongnung lir, oda Zarefat tashi agitsü.

²¹Esau tenem linük madak yimsüsütsü Zion tenemi tekümzükertem atutsü; aser yimliji KIBUBA meyong alitsü.