Read njo YONA 1 Bible Online

YONA 1 - njo bible

YONA 1

¹ Tang Amitai jabaso Yona dangi KIBUBA o ya oda shia aru.

²“Aramesoang, yimti tulu Nineve jagi oang, aser iba anema ayimtenang, kechiyong parnok majungba kü madangi atuogo.

³Saka KIBUBA tsüngdang nungi Tarshisi jena aotsü Yonai arameso, aser pa Yopai alu, aser Tarshisi aotsüba rong ka ngua idakji pai taa agütsü, aser parnok den Tarshisi KIBUBA tsüngdang nungi pilaa aotsü iba nung alu.

⁴Saka KIBUBAi yipru mopung tulu ka tzüyimi yok, aser tzüyim nung yipru tulu ka adok, anungji rongji raksadi ta aküm.

⁵Idangji rong nung inyakertemi tsübu, aser nisung shia pei tsüngrem dang ayimten, aser rong pungpadaktsütsü asoshi parnoki rong nung aliba osettsüset tzüyim nung endoktsü. Saka Yonabo rong telunglen luagi sümanga amua or liasü.

⁶Anungji rong tanishiba pa dangi arua pa dang ashi, “Na ya kechi tetezü, Oh amua aosang? Shishiang; ne Tsüngrem dang jaang, aji oda süra, ashiko Tsüngremi asenok indang bilemtsü aser asenok mesamatsü.”

⁷Rongirtem parnok o parnok na jembitepa ashi, “Arung, shiba meji iba lendong ya asen dangi arur, aji asenoki metettsü an tokdangdi.” Anungji parnoki an tokdang, aser aji Yona dak kao.

⁸Idangji parnoki pa dang ashi, “Shiangjong, shiba meji iba lendong asen madak lir, onok dang shiang; na kechi mapa inyaker? Aser na kong nungi arur? Ner linük kechi? Aser na kechi nübur nungi?”

⁹Idangji pai parnok dang ashi, “Ni Ibri nunger, tzüyim aser ali takong yangluba KIBUBA anüng Tsüngrem ni tsübur”.

¹⁰Idangji nisungtemji kanga dang tsübuadok aser pa dang ashi, “Nai ya kechi inyak? Kechiyong KIBUBA tsüngdang nungi pa jena aor ta nisungtemi metet, kechiaser pai parnok dang shir liasü.”

¹¹Idangji parnoki pa dang ashi, “Tzüyimji asenok asoshi süngjema akümtsü onoki ne dang kechi inyaktsü?” Kechiyong tzüyim tali tali tzüsem adok.

¹²Aser pai parnok dang ashi, “Ni ajunga arung aser tzüyim nungji ajungokjang, anungji nenok asoshi tzüyimji süngjema alitsü, kechiyong iba tzüsem tulu kü meji nenok madak lir ta ni metet.”

¹³Aji saka nisungtemi parnok meyipa ali atongtsü meranga rongji ai, saka parnoki makok, kechiyong parnok anema tzüsemji tali taliang adok.

¹⁴Oda parnoki KIBUBA dang ayimtena ashi, “Oh KIBUBA, onoki ne dang mepishir, iba nisung taküm atema onok tesamatsüma, aser tai makaba zü onok dak tenloktsüma; kechiyong nai, Oh KIBUBA, nai mulungba ama aji inyakogo.”

¹⁵Anungji parnoki Yona bena aru, aser tzüyim nungji ajungoktsü aser tzüyim pei ain adokba nungi anen.

¹⁶Idangji nisungtemi KIBUBA kanga dang tsübu, aser parnoki KIBUBA dang tetepsetba tenla agütsü, aser azüngashi.

¹⁷ Saka KIBUBAi Yona meyoktsü asoshi ango tulu ka renem, aser ango pok nung Yona anogo asemnü aser asem aonung liasü.