Read njo YONA 4 Bible Online

YONA 4 - njo bible

YONA 4

¹Saka aji agi Yona kanga dang jashidaktsü, aser pa ain adok.

² Pai KIBUBA dang sarasadem aser ashi, “Oh KIBUBA, kü lima nung ni alidangsa ni ya meshika ma? Ibayongjiang, ni Tarshisi ilunga jena ao; kechiyong na taochi akaba aser aria bilemba Tsüngrem, ain adoktsü meilungi, aser yimlibilem nung talubosa, aser merenshitsü aliba nungi nai temulung meyiper ta ni metet.

³ Anungji tang, Oh KIBUBA, kü taküm kü dak nungi agiang, ta ni ne dang mepishir; kechiyong ni asoshi taküm melii tasüang tajungba.”

⁴Aser KIBUBAi ashi, “Na ain adoktsü temeden ali asü?”

⁵Idangji Yona yimti nungi ao, aser yimti anüdoklen amen, aser pa asoshi semtu ka yangji yanglu, aser iba akhümpok nung amen, aser yimtiji kechi kümdir aji reprangtsü ataa ali.

⁶KIBUBA Tsüngremi meso zü ka renem, aser pa pesaprung nungi kümzüktsü, oda aji pa tekolak manung akhüm ka asütsü, aji Yona akhümbanga arudaktsü. Anungji meso atema Yona kanga dang pela-a liasü.

⁷Saka tananü anepdang akümdang Tsüngremi mesen ka renem, aser iba agi meso dak ala nung aji azüladok.

⁸Kodang anü adok, Tsüngremi anüdoklen mopung tatsük ka renem; aser Yona kolak nung anüi puloktsü nung, oda pa lula-adok aser pa asütsü mepishia ashi, “Ni taküm meli-i tasüang tajungba.”

⁹Tsüngremi Yona dang ashi, “Meso atema na ain adoktsü tim ali asü?” Aser pai ashi, “Ni tasütsüsa ain adoktsüba tim dang lir.”

¹⁰KIBUBAi ashi, “Meso koba asoshi nai meinyak, aser koba nai memeidaktsü, aser koba konung yongi adok, aser konung yongi sama, aji asoshi nai apayua bilem.

¹¹Nineve yimti tulu, kechi nung nisung meyi noklang ka ser metsü dak tali lir, shiri pei teka tajichi nungi tabelen balala metettsü makok, aser ano nashi telok jenti lir, ni iba yimti asoshi apayua mebilemli ma?”