Read njo ZÜNGDANGBA 10 Bible Online

ZÜNGDANGBA 10 - njo bible

ZÜNGDANGBA 10

¹Aser KIBUBAi Mosa dang ashi,

²“Taribi jangzü ana yangluang, itemji tatsüngba mapa asütsüla. Itemji nai telok ajatsü asoshi aser tanendak nungi apusotsü asoshi amshitsüla.

³Kodang anapronglaji apudir telok ajak ne dangi sentep süki kiküm dangi senteptsüla.

⁴Saka ka dang apura, tanishirtem Israel nübur meyirijang madak kiburtem dang ne dangi senteptsüla.

⁵Kodang ar sanga apudir, anüdoklen anena alirtemji apusotsü.

⁶Aser kodang kasaji tanabena apudir, anüdoklentip anena alirtemji apusotsü; parnok apusotsü asoshi ar sanga jangzü aputsü.

⁷Saka kodang telok senteptsü lidir, nenoki ar mesangi dang jangzüji aputsüla.

⁸“Aron putir jabasotemi jangzüji aputsüla. Ibai nenok aser nenok sülen tarutsü putu ajak atema yimsü alitsü.

⁹Kodang nenok timtemdaktsüba tsükchir anema nenok rarai odir jangzü agi ar asangtsüla. Idangji KIBUBA nenok Tsüngremi nenok bilemtettsü, aser nenok tsükchir nungi kümzüktsü.

¹⁰Ano nenok pelaba anogo nungi, aser nenok taka-tait benjong akadang, aser nenok ita tetenzük nung, nenoki nenok jangzü tarongba tenla madak, aser yimjung tenla tepsetba madak aputsüla; aser nenok asoshi itemji KIBUBA madang tebilemtettsü asoshi alitsü. Ni KIBUBA nenok Tsüngrem lir.”

¹¹Aser küm tanabuba, ita tanabuba anogo metsübuba nung, tekülemdak süki nung Ozüng Süngden temalen nungi mepetji agienadok.

¹²Anungji Israel chirtemi tatongi shia Sinai lisem lima arem nungi apusoa ao; aser mepetji Paran arem nung anen.

¹³Aser Mosa ajanga KIBUBAi melaba ama parnoki apusoa jajaba ibai mezüngbuba liasü.

¹⁴Aser tamasa Yihuda nunger tanendak nungi nisan den par telok apuso. Amminadab jabaso Nashon iba telok madak tanishir liasü.

¹⁵Issakar kidong telokji Zuar jabaso Nethaneli anir ao.

¹⁶Zebulun kidong telokji Helon jabaso Eliabi anir ao.

¹⁷Kodang tekülemdak sükiji lokten, tekülemdak süki abener Gershon aser Merari nunger apuso.

¹⁸Ajisür Shedeur jabaso Elizuri anir Reuben nunger tanendak nungi nisan den par telok apuso.

¹⁹Simeon kidong telok madak Zurishaddai jabaso Shelumiel liasü.

²⁰Aser Gad kidong telok madak Deuel jabaso Eliasaf liasü.

²¹Aser Kohat nungeri temeshi osettemji bener apuso, aser parnok matongdang tangartemi tekülemdak sükiji yanglu.

²²Ammihud jabaso Elshamai anir telok Efraim kidong tanendak nungi nisan den par telok apuso.

²³Aser Manase kidong telok madak Pedahzur jabaso Gamaliel liasü.

²⁴Benjamin kidong telok madak Gideon jabaso Abidan liasü.

²⁵Dan kidong tanendak nungi nisan den par telok apuso. Iba telok madak Ammishaddai jabaso Ahiezer liasü.

²⁶Okran jabaso Pagiel Asher kidong telok madak tanishir liasü.

²⁷Aser Enan jabaso Ahira Naftali kidong telok madak liasü.

²⁸Yamaji Israel chir telok tatongi apuso.

²⁹Idangji Mosai Midian nunger toko Reuel jabaso Hobab dang ashi, “Ni nenok nem ibai agütsüdi ta KIBUBAi ashiba linüki asenok apusodagi, onok den arung aser onoki ne dang junga benshidi; kechiyong KIBUBAi Israel dang tajung inyaktsü nangzükogo.”

³⁰Pai langzü, “Nibo nenok den maotsü; saka ni kü linük aser pei nübur dangi meyipa aotsü.”

³¹Mosai ashi, “Yimlibilema nai onok tetoktsüma, kechiaser arem koba nung onok anentsü aji nai metet, aser na onok asoshi tenük ama asütsü.

³²Na onok den arura, KIBUBAi kechisa onok dak tajung inyakdir, aji oda onokia ne dang inyaktsü.”

³³Aser parnoki KIBUBA tenem nungi asemnü lenmang ao, aser KIBUBA tezüngzüktepba ozüng süngdenji parnok jakdang asemnü lenmang jelia parnok asoshi tanendak ka bushia ao.

³⁴Aser parnoki tanendak nungi apusoa aodang KIBUBA mepetji anüngdang parnok temalen liasü.

³⁵Kodang ozüng süngdenji apusoa odir Mosai ashi, “Aramesoang; Oh KIBUBA; ne tsükchirtemji prokshidakjang, ne sempartem ne jakdang jenshidakjang.”

³⁶Kodang aji anendir pai ashi, “Oh KIBUBA, Israel nunger meyirijangsa meyirijang ter dangi meyipang.”