Read njo ZÜNGDANGBA 11 Bible Online

ZÜNGDANGBA 11 - njo bible

ZÜNGDANGBA 11

¹Tang nüburtemi KIBUBAi angashia tamajung jembia nemnem, aser aji angashia pa ain adoka, KIBUBA mi parnok rongnung jangru aser tanendak tezülen kar arong.

²Kodang nüburtemi Mosa dang ayimten, pai KIBUBA dang sarasadem aser miji remsepadok.

³Anungji iba meta dangji Tabera ta aja, kechiaser KIBUBA miji parnok rongnung jangru.

⁴Parnok den külemi bendangertema liasü, aser parnoki shi kanga chinüa aküm, aser Israel chirtemia tanaben jeba ashi, “Shibai onok nem tachitsü shi agütsütsü?

⁵Ijip nung onoki angati ango achiba, züngi, mapu-züngi, repchilasüng aser lasüng bilemteter.

⁶Saka tang onok yaseta lir, aser kecha maka, mana dak alema onok kecha maka.”

⁷ Manaji Koriander tejang amai tereprangtsü nung berem mesüka liasü,

⁸ nisungtemi oagi itemji bendena senzü, aser aji lung nung menünga mesüra semki nung asen aser aji chipo nung metar iba jagi amtsük telong yanglu; aser aji tachitsü asoshi totzü den amtsük telong asangba amai liasü.

⁹Tanendak azüngtsü tsükdang iba manung manaji tsük.

¹⁰Mosai nüburtem kinunger shia pei süki kikümbang nung jebtepba angashi, aser KIBUBA ain kanga adokba yong Mosa kanga mepelai liasü.

¹¹Anungji Mosai KIBUBA dang ashi, “Kechiba ne tenzüker dang nai yamai sashia benshir? Nai iba nübur khuret ajak kü nem benloktsütsüsa na mepelatsü mapa ni kechi inyak?

¹²Ni item nübur ajak aben asü? Mesüra parnok ne teku nung ajunger nubentsüri mama ayongba tanur abenba amato nai parnok tebou nunger dang azüngashia nangzükba linük jagi bener oang, ta nai kü dang shitettsüsa ni parnok aso asü?

¹³Ni iba nübur ajak nem kong nungi shi bena arua agütsütsü? Kechiyong onok achitsü shi onok nem kua, ta jeba parnoki kü dang ashir.

¹⁴Kü kijai iba nübur khuret ajak abentsü makok, kechiaser ya ni asoshi onsara taret lir.

¹⁵Iba amai nai kü dang benshitsü süra, ni khenyongi tepseta tokang ta ni ne dang mepishir; ne tsüngdang ni yimlibilem ngura kü nem joko kü timtem tengudaktsü.”

¹⁶KIBUBAi Mosa dang ashi, “Israel nunger rongnung tanishir nai metetba tambur nisung neter kü dangi anir arung. Parnokji sentep süki-i anir arua idakji ne den külemi noktakdakjang.

¹⁷Aser ni alutsü aser yangji ne den jembitsü, aser ne madak aliba tanela kar agia parnok madak yutsütsü, aser nüburtem khu ne kijai masü, parnoki aji ne den abentsü.

¹⁸Aser nai nübur dang shiang, nenoki shi achitsü asoshi nenok sasa asüng atema meshitetang, kechiyong KIBUBAi angashia, shibai onok nem tachitsü shi agütsütsü, kechiyong Ijip nungbo onok taso shia liasü ta nenoki jebogo, anungji nenok nem shi agütsütsü, aser aji nenoki achitsü.

¹⁹Nenoki anogo ka mesüra ananü mesüra pungunü, mesüra ternü mesüra metsünü dang machitsü.

²⁰Saka ita songtema teni nungi adoka lakseta achitsü, kechiaser nenok rongnung aliba KIBUBA nenoki magizük aser pa jakdang kechiba onok Ijip nungi anir adok? ta jeba ashi.”

²¹Mosai ashi, “Nübur shir rongnung ni lir tetsüng agi jajar meyi noklang trok lir; aser nai ashi, parnok ita songtema achitsü ni parnok nem shi agütsütsü.

²²Parnok peria parnok asoshi san telok aser nashi telok tepsetdi ma? Mesüra tzüyim nung ango ajak parnok asoshi puaka aji agi parnok peridi ma?”

²³Aser KIBUBAi Mosa dang langzü, “KIBUBA teka yamaji tatsü no? Kü o atalokdisü mataloklir tang nai angutsü”.

²⁴Mosai oagi nüburtem dang KIBUBA oji ashi, aser nübur rongnung tambur neter pai sentepdaktsü, aser süki meketa toktsü.

²⁵Aser mepet nung KIBUBA alua pa dang jembi aser pa madak aliba tanela kar agia tambur neter madakji yutsü, aser kodang tanelaji parnok madak liasü, parnoki shin o jembi, saka joko parnoki yamaji meinyak.

²⁶Saka tanendak nisung ana, ka tenüng Eldad aser tangar kaji Medad liasü, aser parnok madak tanelaji alu, parnok tenüng züluoka liasü, saka süki nungi metugu, aser parnoki tanendak shin o jembi.

²⁷Anungji asangur kati asema oa Mosa dang ashi, “Eldad aser Medad nati tanendak shin o jembidar.

²⁸Aser pa teshimtet rongnung ka, Mosa tenzüker Nun jabaso Yihusuai ashi, kü kibur Mosa, parnok anendakjangma.

²⁹Saka Mosai pa dang langzü, nai tenük meremer asü? KIBUBAi pei tanela parnok dak enokja, KIBUBA er nübur ajak ainkar kümdaktsünüali.”

³⁰Aser Mosa o Israel tamburtem tanendaki shilang.

³¹Aser tzüyim nungi opiya ozü bener arutsü KIBUBA nungi mopung ka ao, aser itemji tanendak anasa külena külena anogoshi lenmang tanendak meketa ali, tema nungi süklep ana shi melema tsükdaktsü.

³²Panüji nisungtem ammang tepiyong aser tananüa anogo nungjia opiya ozüji benden. Ajak dang ishiba bena arusangia homer ter benden, aser parnoki itemji parnok tanendak meketa merepshia ayu.

³³Saka ano parnoki shiji memejaki tepu tsüngda nung alidang, KIBUBA ain nüburtem anema adok, aser KIBUBA wara tulu ka agi nüburtemji tepset.

³⁴Anungji iba dangji Kibroth-hattaava ta aja, kechiaser parnoki yangji shi jangrartemji rema yutsü.

³⁵Kibroth-hattaava nungi nüburtemi Hazeroti apusoa oa idakji anen.