Read njo ZÜNGDANGBA 13 Bible Online

ZÜNGDANGBA 13 - njo bible

ZÜNGDANGBA 13

¹KIBUBAi Mosa dang ashi,

²“Israel nunger nem ni agütsütsü aliba Kanan lima ladangtsü asoshi tebu kidong shia nungi parnok rongnung tanishir ka ka yokang.”

³KIBUBAi melaba ama Mosai parnokji Paran lisem lima nungi yok. Parnok ajak Israel tanishirtem liasü.

⁴Itemi parnok tenüng liasü: Reuben kidong nungi Zakur jabaso Shammua.

⁵Simeon kidong nungi Hori jabaso Shafat.

⁶Yihuda kidong nungi Yefune jabaso Kaleb.

⁷Issakar kidong nungi Yosef jabaso Igal.

⁸Efraim kidong nungi Nun jabaso Hoshea.

⁹Benjamin kidong nungi Rafu jabaso Palti.

¹⁰Zebulun kidong nungi Sodi jabaso Gaddiel.

¹¹Yosef kidong nungi, aji Manase kidong, Susi jabaso Gaddi.

¹²Dan kidong nungi Gemalli jabaso Ammiel.

¹³Asher kidong nungi Mikael jabaso Sethur.

¹⁴Naftali kidong nungi Vofsi jabaso Nahbi.

¹⁵Gad kidong nungi Maki jabaso Geuel.

¹⁶Linük ladangtsü Mosai yokba nisungtem tenüngji itemi lir. Mosai Nun jabaso Hoshea tenüngji Yihusua agi melentsü.

¹⁷Mosai Kanan limaji ladangtsü parnok yoka ashi, “Anüolentip limai iang aser tenem jagi tuang,

¹⁸aser alinükji kechi ama, yangji aliba nisungtemji tashi tait asü mait, parnokji ishika asü aika reprangang.

¹⁹Aser parnok aliba limaji kechi ama, ajung asü majung: aser parnok alidak yimtitemji moa nung asü mitsa nung alir;

²⁰aliji kechi ama, temo asü teret, min ali asü mali, nenoki tasü itang aser iba lima nungi adokba süngjangji kar bener arung.” Iba mapangji tsükmenatzü mezüng amenba mapang liasü.

²¹Anungji parnoki tua Hamat tsütsü Zin lisem lima nungi Rehob tashi alinükji ladang.

²²Parnoki anüolentipi ai, aser Hebroni aru, aser yangji Anak chir Ahiman, Sheshai; aser Talmai liasü. (Tang Hebronji Ijip nung Zoan dang nungi küm tenet temalen yanglua liasü).

²³Aser parnoki Eshkol lenteni aru, aser idakji tsükmenatzü tejep ka keter lepzük, aser aji nisung anati süngra nung aben; ano parnoki jarem jang aser monguzünu bener aru.

²⁴Anungji iba meta dangji Eshkol lenten ta aja, kechiaser Israel chirtem idakji tsükmenatzü tejep lepzük.

²⁵Anogo lirnü linükji ladanger külen itdangitertemji shilang.

²⁶Parnokji Mosa, Aron aser Israel chir telok ajak dangi kadesh nung Paran lisem limai shilang, aser ano idakji atangba süngjangtemji parnok dang sayu.

²⁷Parnoki Mosa dang ashi, “Nai koleni onok yok, iba linük jagi onok oa ladangogo aser atangji ibaji mamatzü aser ninang mojitzü ayimba lima ka lir; aser yangi süngjang ka lir.

²⁸Aji saka yangji alirtemji tashi tait aser parnok yimtitemji atsübanga lir, aser kanga tulu, aser iba dakji alaka onoki Anak chirtem yangji angu.

²⁹Anüolentip linük nungji Amalek nunger lir, aser tenem nung Amor nunger aser Yebus nunger alir; aser Kanan nungertemji tzüyimküm aser Yordan tzüküm nung alir.”

³⁰Mosa tsüngdang aliba nisungtemji ola madokdaktsüi Kalebi ashi, “Asenoki khenyongi tudi aser aji agidi; kechiaser aji kokteta lir.”

³¹Saka pa den atur nisungtemi ashi, “Asenoki nisungtemji anema atutsü makoktsü, kechiaser parnokji asenok dang nungi tashi taitba lir.”

³²Anungji parnoki ladangba linük indangji tiyazü osang ka Israel nungertem dangi prokshia ashi, “Alinük koba onoki ladangtsü ao, idakji adokba jagi nisungtemji meperir, aser idakji aliba nisungtemji aso tulu;

³³ aser yangji Nefilim nungi arua Anak chirtem onoki angu, aser onokji parnok tsüngdang süngku amai dang liasü.”