Read njo ZÜNGDANGBA 14 Bible Online

ZÜNGDANGBA 14 - njo bible

ZÜNGDANGBA 14

¹Idangji telok ajaki ola adoka ayimten, aser paonungji nisungtemi ajeb.

²Aser Israel chir ajaki Mosa o Aron na anema nemnem, aser telok ajaki tena dang ashi, “Onok Ijip lima nung sür lilasang.

³Kechiba onok nok agi laodaktsütsü KIBUBAi anir aru? Onok kinungtsütem aser onok chirtem parnoki tepsettsü; onok asoshi Ijipi meyipa aotsü tajungba masü no?”

⁴Aser parnok kati ka dang ashi, “Asenoki arkotong ka shimdi aser Ijipi meyipa odi.”

⁵Idangji telok ajak sentepa aliba jakdang Mosa aser Aron na tejak mechiokadok.

⁶Aser linük ladangi aortem rongnung Nun jabaso Yihusua aser Yefune jabaso Kaleb nati pei süoshi shisa;

⁷aser Israel chir telok ajak dang parnoki ashi, “Alinük koba ladanga onoki ajanga ao, aji kanga dang alima tajung lir.

⁸KIBUBAi asenok dang pelara, pai iba limai asenok anir arutsü, aser mamatzü o ninang mojitzü yima aliba limaji asenok nem agütsütsü.

⁹ KIBUBA anema dang tapuso, mesüra linük nung aliba nisungtemji nenoki tetsübuma; kechiyong itemji asenok asoshi chiyungtsü, parnok tekümzüktsü parnok nungi agienogo aser KIBUBA asenok den lir, parnokji tetsübuma.”

¹⁰Saka telok ajaki tena dak lung agi aontsü ashi. Idangji KIBUBA sentsüwangshi sentep süki nung Israel chir ajak madaki adok.

¹¹Aser KIBUBAi Mosa dang ashi, “Iba nüburi kopiga ni sensatsütsü? Parnok rongnung temaitsü ajak ni inyakaka, kopiga parnoki kü dang mamangtsü?

¹²Ni parnok wara agi tepsettsü, aser parnok senmang mamangdaktsütsü, aser parnok dang nungi na agi kin tuluba aser tamarenba kümdaktsütsü.”

¹³ Saka Mosai KIBUBA dang ashi, “Ajangla Ijip nungeri aji angashitsü; kechiyong parnok rongnungi ne tashi agi nai iba nübur anitet,

¹⁴aser aji parnoki iba linük nung alirtem dang ashitsü. Na KIBUBA iba nübur rongnung lir ta parnoki angashiogo, kechiyong na KIBUBA tejak o tejak na angur aser ne mepet parnok temalen noktaker, aser anüngdang mepet tongshi nung aser aonung mi tongshi nung nai parnok jakdang aor.

¹⁵Tang nai iba nübur nisung ka ama tepsetdi ta süra, idangji ne nüngsang angashirtemi ashitsü:

¹⁶KIBUBAi parnok dang nangzükba lima iba nübur pai anir arutsü makok, anungji pai parnok arem nung tepset.

¹⁷Aser ni ne dang mepishir, KIBUBA ain adoktsü mekara aser yimlibilem nung teperi, temenen menaba aser ozüng raksaba tai atoker; aser iba jagi tai aketba kecha agi memeshitettsür; tsürabur tai menaba asoshi chirnur madak tasembuba aser pezü buba putu tashi semdanger,

¹⁸ ta nai jembiba amato KIBUBA tashi tulusang.

¹⁹Ni ne dang mepishir, ne yimlibilem uluba ama iba nübur tai menaba aser Ijip nungi tang tashi nai iba nübur dang tai atokba ama tai tokangma.”

²⁰Aser KIBUBAi Mosa dang ashi, “Ne o amato ni tai tokogo.

²¹ Saka ni taküm alinung, atangji KIBUBA sentsüwangshi agi alimaji agütsütsü;

²²atangji ni Ijip nung aser arem nung inyakba kü sentsüwangshi aser temaitsütem angurtem ni ano terben atitangogo, aser kü o magi;

²³atangji ni par tsürabur dang nangzükba limaji parnoki mangutsü, mesüra ni sensatsür katia aji mangutsü.

²⁴ Saka kü tenzüker Kaleb dak tanela balaka alinung, aser temulung bendanga kü sülen anitak nung, pa aoba linük jagi ni pa anir arutsü, aser par chirtemi aji agitsü.

²⁵Tang Amalek nunger aser Kanan nunger lenten nungji alinungji asüng nenok meyipang aser Temerem Tzüyim leni arem jagi iang.”

²⁶KIBUBAi Mosa aser Aron dang ashi,

²⁷“Kopiga ni anema nemnemba iba tamajung telok den ni azüzüktsü? Israel chirtemi nemnemba koba parnoki ni anema jembitep, aji ni angashiogo.

²⁸Parnok dang shiang, KIBUBAi ashir, Ni taküm alinung atangji nenoki ni angashia jembiba ama, yamaji ni nenok dang inyaktsü.

²⁹ Nenok tasümang iba arem nung tsüktsü; aser nenok yongsük nung atenba küm metsü nungi temalen shirnoki ni anema nemnem,

³⁰atangji Yefune jabaso Kaleb aser Nun jabaso Yihusua dak alema koba lima asoshi nenok lidaktsütsü ni kü teka mekang, aji agi nenok marutsü.

³¹Saka nenok tila tanurtem shirnok tepsettsü atema alitsü ta nenoki ashi, parnok ni anir arutsü, aser parnoki nenoki magizükba limaji metettsü.

³²Saka nenok asoshibo nenok tasümang iba arem nung toktsütsü.

³³ Aser nenok chirtem arem nung küm lir sannüker küma alitsü, aser arem nung nenok tasümang shizüka mao tashi nenok jabujari khu nenoki abentsü.

³⁴Nenoki alinük ladangba anogo apir, oda anogo lir anogo kaka shia küm kaka, oda küm lir nenoki menaba tai nenoki abentsü, aser nenoki ni nungi tenoktangba meteta arutsü.

³⁵Ni KIBUBAi jembiogo, ni anema sentepa aliba iba tamajung telok ajak dang atangji inyaktsü; iba arem nung nenok asütsü.”

³⁶Nisungtem shir linük ladangtsü asoshi Mosai yok, parnoki alinük indangji tiyazü bener aruba ajanga telok ajak pa anema nemnemdaktsü,

³⁷oda linük atemaji tiyazü osang bener arurtem ajak KIBUBA madang wara agi südaktsü.

³⁸Saka linük ladangi aortem rongnung Nun jabaso Yihusua aser Yefune jabaso Kaleb tena taküm ali.

³⁹“Aser Mosai item o Israel ajak dang ashi, aser nisungtemi mang kanga ayim.

⁴⁰Parnok anepdang shishia tenem kolaki tua ashi, KIBUBAi jembiba linüki atutsü onok yangi lir, kechiyong onoki temenen menaogo.”

⁴¹Saka Mosai ashi, “Takok mangutsü ta meteta kechiba nenoki KIBUBAi melaba raksatsüyonga aor?

⁴²Nenok tsükchir jakdang nenok tepseta lir tetu; kechiyong KIBUBA nenok rongnung mali.

⁴³Kechiyong nenok jakdang Amalek nunger aser Kanan nunger lir, aser parnok nok agi nenok laotsü, kechiaser nenok KIBUBA sülen manitaki meyipa oa lir; anungji KIBUBA nenok den malitsü.”

⁴⁴Saka parnoki ma ta tenem jagi atutsü merang, aji saka KIBUBA tenangzükba Ozüng Süngden, aser Mosa tanendak nungi aenshia mao.

⁴⁵Idangji Amalek nunger aser iba tenem nung aliba Kanan nunger alu aser parnok den rara, aser Horma tashi parnoki amak.