Read njo ZÜNGDANGBA 15 Bible Online

ZÜNGDANGBA 15 - njo bible

ZÜNGDANGBA 15

¹KIBUBAi Mosa dang ashi,

²Israel chirtem den jembiang aser shiang, “Kodang ni nenok nem agütsüba limai nenok arudir,

³aser KIBUBA dang tenla agütsüdir, tarongba tenla mesüra tepela tenla mesüra temulunger tenla mesüra nashi o san telok nungi KIBUBA asoshi teronem menemba, nenok teti akaba benjong nung tenangzükba atalokba asoshi tenladir,

⁴idangji shibai pei tenla agütsüdir totzü hin ka shilem pezübuba den amzü tanük efa nung terbuba shilem den meyokteper chiyungtsü tenla KIBUBA asoshi agütsütsüla.

⁵Tajemtsü tenla asoshi tsükmenatzü yi, aser san chanu shia nai tarongba tenla den mesüra tetepsetba den hin ka pezübuba shilem agütsütsüla.

⁶Mesüra san tepung ka asoshi chiyungtsü tenla nai renemtsü atema amzü tanük efa ka terbuba shilem ana den totzü hin ka asembuba shilem meyokteper nai tenlatsüla.

⁷Tajemtsü tenla asoshi tsükmenatzü yi ka shilem asembuba teronem tajung asoshi KIBUBA dang nai tenla-ang.

⁸Aser tarongba tenla mesüra balaka tatemzükba atalokdaktsütsü tepseta tenlaba mesüra yimjung tenla asoshi KIBUBA atema nai nashi pungchi agütsüdang;

⁹nashi pungchi denji chiyungtsü tenla amzü tanük efa ter shilem nung asemsü totzü hin tesadang den tenlatsüla.

¹⁰Aser KIBUBA asoshi teronem menemtsü mi agi tenlaba, tsükmenatzü yi hin ka tesadang tajemtsü tenla asoshi nai tenlatsüla.

¹¹“Yamaji nashi pungchi asoshi süshia mesüra san tepung mesüra san tepung chanu, mesüra nabong chanu asoshi inyaktsüla.

¹²Nenoki kwika renemdir iba shia asoshi, yamaji item yongsük yari nenoki inyaktsüla.

¹³KIBUBA dang teronem tajung asoshi tenla agütsüdang senso shia iba amai inyaktsüla.

¹⁴Aser aener kar ne den lira, mesüra nenok rongnung teti alir süshia, pai KIBUBA dang teronem tajung tenlanüra, nenoki inyakba amaji paia shitak inyaktsüla.

¹⁵Nenok telok ajak asoshi aser aener shia nenok den amunger, item ajak asoshi yimsü ozüng ka dang alitsü. Nenok putu ajak nung nenok aser aener ajak KIBUBA tsüngdang iba ozüng kasa alitsü.

¹⁶ Nenok aser aener amunger ajak asoshi ozüng ka aser yimsü ka dang alitsü.”

¹⁷Aser KIBUBAi Mosa dang ashi,

¹⁸Israel nunger dang shiang, “Ni nenok anir arutsüba limai nenok kodang idir,

¹⁹idangji linük chiyungtsü nenoki achidang, nenoki KIBUBA dang tenlatsüla;

²⁰tamasa am yangluba mapang nung motsüngnem nungi sarutenba amato balaka yur, nenoki amtsük ka tenla asoshi agütsütsüla.

²¹Nenoki tamasa am yangluba nungi nenok putu songtema KIBUBA nem shilem ka agütsütsüla.

²²“Aser kodang KIBUBAi Mosa den jembiba item temelabatem mebenshi-i aibelendir,

²³oda Mosa ajanga KIBUBAi nenok dang melaba ajak, KIBUBAi ozüng agütsüba anogo nungi, aser nenok putu songtema;

²⁴idangji aji teloki memeteti inyakra, yimsü ozüng amato chiyungtsü tenla, tajemtsü tenla aser temenen tenla asoshi nabong tepung ka, KIBUBA dang teronem tajung asoshi telok yinti-i nashi pungchi ka tarongba tenla asoshi tenlatsüla.

²⁵Aser Israel chir yinti asoshi putiri temenen pungitsü asoshi inyaktsüla, aser parnok dang tai, atoktsü kechiyong aji aibelenba liasü, aser KIBUBA dang mi aji tenlaba parnok pei tenla bener aruogo, aser parnoki aibelenba asoshi KIBUBA madangi temenen tenla benogo.

²⁶Aser Israel yinti aser parnok rongnung aliba aener tai atoktsü, kechiaser nisung yinti-i aji meshitak inyak.

²⁷ “Nisung kati meshiteti temenen menara, idangji temenen tenla asoshi pai küm ka chanu nabong tsüla ka tenlatsüla.

²⁸Aser aibelenba nisung asoshi putiri temenen pungiba inyaktsüla. Kodang pai KIBUBA madang meshiteti temenen menadir, pa asoshi temenen pungitsütsü, aser pa tai atoktsü.

²⁹Israel nunger rongnung linük senso saka mesüra nenok rongnung bendanger saka, shibai meshiteti langka inyakdir, pa asoshi ozüng kasa alitsüla.

³⁰Saka nisung shibai meteta temenen menadir, pa linük senso saka aener saka, pai KIBUBA anema sensatsür, anungji iba nisungji pei nübur nungi jentoktsü.

³¹Kechiaser pai KIBUBA o sensatsür, aser melaba raksatsür. Iba nisungji meshimeshia leptoktsü, pai menaba tai pa dak alitsü.”

³²Aser Israel chirtem lisem lima arem nung alidang, parnoki nisung ka amungnü süng kuya angu.

³³Shirnoki pa süng kuya angu, parnoki paji Mosa aser Aron aser telok ajak dangi anir aru.

³⁴Aser parnoki paji tepuokdak ayu, kechiaser pa dak kechi inyaktsü aji memetetdaktsüi liasü.

³⁵Idangji KIBUBAi Mosa dang ashi, “Nisungbaji atangji südaktsütsüla; tanendak alir ajaki pa dak lung agi aontsüla.”

³⁶Anungji KIBUBAi Mosa dang ashiba ama parnoki pa tanendak nungi anir adoka lung agi pa dak aon, aser pa asü.

³⁷Aser KIBUBAi Mosa dang ashi,

³⁸ “Israel chirtem dang shiang, parnok putu songtema parnok sübang anüng sentsü agi sentaka parnok asoshi sütsüng parnoki yanglutsüla.

³⁹Sütsüngji nenok asoshi nenoki reprangtsüla, aser KIBUBAi melaba ajak bilemtettsü aser itemji inyaktsü; aser koba sülen nenoki jabujaria ao iba sülen nenok pei temulungjang aser nenok tenük meyoktsü asoshi aji alitsü.

⁴⁰Oda kü ozüng ajak nenoki bilemteta itemji inyaktsü aser nenok Tsüngrem asoshi meshiteta alitsü asoshi.

⁴¹Ni KIBUBA nenok Tsüngrem lir, ni nenok Tsüngrem asütsü asoshi Ijip lima nungi nenok anitet. Ni KIBUBA nenok Tsüngrem lir.”