Read njo ZÜNGDANGBA 16 Bible Online

ZÜNGDANGBA 16 - njo bible

ZÜNGDANGBA 16

¹ Tang Levi kidong nungi Kohat chir Izhar jabaso Kora, Reuben kidong nungi Eliab jabasotem Dathan aser Abiram aser Pelet jabaso On,

²parnoki Israel chirtem nüngtugu kar shimteter telok tanishir noklang ana ser tenem anir Mosa anema apuso.

³Parnoki Mosa aser Aron anema atenshi aser tena dang ashi, “Nenata yabo onsara, telok ajak oda nisung shia temeshi lir, aser KIBUBA parnok rongnung lir; ajangla kechiba nenati KIBUBA er telok madak nena sasa yamai ulur?”

⁴Mosai aji angashi dang pa tejak mechiok,

⁵ajiser pai Kora aser pa telok dang ashi, “Anepdang KIBUBAi pa meyong shiba aser shiba temeshi lir aji sayutsü, aser paji pa anasa arudaktsütsü; oda shiba pai shimdir, pai pa anasa arudaktsütsü.

⁶Ya inyakang: Kora aser par telok ajaki miteptsü susa nenoki benang;

⁷aser iba nungji mi enokang, aser asüng KIBUBA madang liangmesen enokang, aser KIBUBAi shiba shimdir paji temeshi alitsü; nenok Levi chirtem ya nenoka onsara.”

⁸Aser Mosai Kora dang ashi, “Tang angang, nenok Kora chirtem.

⁹Israel pur telok nungi nenok kisüng shimteta pa anasa arudaktsütsü; KIBUBA tekülemdak süki nung tenzüktsü aser telok jakdang noktaka parnok tenzüktsübaji nenok asoshi atemata dang asü?

¹⁰Aser pai na aser adianutem Levi jabasotem ajak pa anasa anir aru; aser nai putir mapa bushir asü?

¹¹Aji asünung na aser ne medemer ajak sentepba ya KIBUBA anema lir, aser nenok Aron anema nemnemtsüsa pai kechi inyak.”

¹²Mosai Eliab jabaso Dathan aser Abiram tajai yok, aser parnoki ashi, “Onok matutsü.

¹³Mamatzü aser ninang mojitzü yima aliba linük nungi nai onok anir arua arem nung tepsettsü, aser onok madak ne sasa tanishir asütsü ya atemata ka dang asü?

¹⁴Ano nai mamatzü aser ninang mojitzü yima aliba linüki onok anir maru, mesüra onok nem alu mesüra tsükmenatzü tsüki senmang amangtsü magütsü; item nisung tenük nai pokdaktsütsü asü? Onok matutsü.”

¹⁵Idangji Mosa kanga ain adok aser KIBUBA dang ashi, “Parnoki tenlaba tagizük, ni parnok nungi gado ka danga magika, mesüra parnok shinga maitsü.”

¹⁶Mosai Kora dang ashi, “Asüng na aser ne medemer ajak KIBUBA madangi arutsüla, na, parnok aser Aron.

¹⁷Nenok nisung shiai pei mi susa nung liangmesen enoker benang, nenok nisung shiai KIBUBA dangi mi susa abentsü, aji mi susa noklang ana ser tenem alitsü; na aser Aron pei mi susa benang.”

¹⁸Parnok nisung shiai pei mi susa aben aser iba manung mi enok, aser iba manung liangmesen ayu, aser sentep süki kikümbang nung Mosa aser Aron den noktak.

¹⁹Korai parnok anema sentep süki kikümbang nung telok ajak sentepdaktsü aser KIBUBA sentsüwangshi telok ajak madaki adok.

²⁰Aser KIBUBAi Mosa o Aron dang ashi,

²¹“Parnok khenyongi samatsütsü asoshi nenok sasa iba telok nungi pila-ang.”

²²Saka Mosa aser Aron nati pei tejak mechiok aser ashi, “Oh Tsüngrem, meimchir tanela ajak madak Tsüngrem, nisung kati temenen mena nung nai telok ajonga madak ain adokdi ma?”

²³KIBUBAi Mosa dang ashi,

²⁴“Kora, Dathan aser Abiram alidak nungi atsüngenang ta telok dang shiang.”

²⁵Mosai aramesoa Dathan aser Abiram dangi ao, aser Israel tambur pa sülen anitak.

²⁶Aser pai telok dang jembia ashi, “Item nisung tamajungtem süki nungi aenshiang, aser parnok meyong kecha nunga tekongshi, aji mesüra parnok temenen ajak den oker aotsü.”

²⁷Anungji Kora, Dathan aser Abiram alidak süki nungi parnok aenshi. Aser Dathan o Abiram parnok kinungtsürtem o tanurtem den parnok süki kikümbang nung adoka noktak.

²⁸Idangji Mosai ashi, “Iba yagi ni pei mulungba agi inyaker masü item mapa ajak inyaktsü KIBUBAi ni yok ta nenoki metettsü.

²⁹Item nisung, nisung ajak asüba amai, mesüra nisung ajak yimya amato süra, ajangla KIBUBAi ni meyok.

³⁰Saka KIBUBAi langka tasen inyakra, aser ali-i pei tebang lapoka parnok akaba ajak meyokadokra, aser parnok taküm dang Sheoli lura, idangji nisungi KIBUBA sensatsüogo ta nenoki metettsü.”

³¹Idangji item o ajak pai jembizükli, parnok kübok aliji sadanga lapok;

³²aser ali-i pei tebang lapoka parnok ajak, parnok kibong aser Kora den adener nisung ajak aser oset ajak meyokadok.

³³Anungji parnok aser parnok den adener ajak taküm dang Sheoli alu; aser ali-i parnok manung shibang aser telok nungi parnok sama.

³⁴Idangji parnok meketa aliba Israel nunger ajaki ayimtena jena oa ashi, “Asenok ali-i meyoka lir asemang.”

³⁵Aser KIBUBA nungi mi adoka liangmesen tenlaba nisung noklang ana ser tenemji meyokadok.

³⁶Idangji KIBUBAi Mosa dang ashi,

³⁷“Aron putir jabaso Eleazar dang shiang, jangrua aliba mi susaji shimtenang aser mi susaji ajakleni talang nung prokshidakjang, kechiaser aji temeshi lir.

³⁸Kechiaser item temenen nisungi parnok taküm agi alanga mi susaji temeshi kümdaktsüogo. Tenla dak tenembangtsü asütsü asoshi itemji tematsük küma atsüngtsüla, kechiaser parnokji KIBUBA madang tenlaba lir. Parnokji Israel nungertem asoshi temaitsü ka lidakjang.”

³⁹Anungji Eleazar putiri terongsetertemi tenlaba yongmen yin susatemji benden aser aji tenladak tenembangtsü asoshi atsüng.

⁴⁰Ibai Israel chirtem atema tebilemtettsü ka alitsü, oda Aron semchirtem dak alaka shingaia KIBUBA dang liangmesen marongtsü, aji oda mesüra pa Kora aser pa telok ama masütsü asoshi Mosa ajanga KIBUBAi pa den jembiba ama inyak.

⁴¹Saka tasüngji Israel chir telok ajaki Mosa o Aron na anema nemnema ashi, “Nenoki KIBUBAr nüburtem kar tepsetogo.”

⁴²Saka kidong nisungtemi Mosa o Aron na anema sentep, parnoki sentep süki tsütsü reprang; aser ajiang mepet agi aji sübang aser KIBUBA sentsüwangshi adok.

⁴³Idangji Mosa o Aron na sentep süki tejakleni aru.

⁴⁴Aser KIBUBAi Mosa dang ashi,

⁴⁵“Ni parnok khenyongi samatsütsü asoshi telok rongnungi atsüngenang.” Aser parnoki pei tejak mechiok.

⁴⁶Mosai Aron dang ashi, “Ne mi susa bena arung aser aji tenladak nungi iba nung miji enokang, aser iba manung liangmesenji ataloka yujang aser aji telok dangi kara-a bener oang, aser parnok asoshi temenen pungdoktsü inyakang. KIBUBA nungi terasaba adokogo, aser wara tenzükogo.”

⁴⁷Mosai jembiba ama Aroni miji aben aser sentepa aliba tiyongi asüma ai aser ajiang, nisung rongnung wara ji tenzüka liasü; aser pai liangmesenji yutsü, aser nisungtem pungdoktsü pai yanglu.

⁴⁸Pai tasü o taküm na tsüngda nung noktak, aser waraji anen.

⁴⁹Tang wara agi asürtemji, Kora mapa asoshi asüba meteni meyirijang terpezü ser noklang tenet liasü.

⁵⁰Aroni sentep süki kiküm nung Mosa dangi meyipa ao aser waraji anen.