Read njo ZÜNGDANGBA 17 Bible Online

ZÜNGDANGBA 17 - njo bible

ZÜNGDANGBA 17

¹KIBUBAi Mosa dang ashi,

²“Israel chirtem dang shiang, aser parnok nungi kidong shia ajok ka ka agiang. Parnok kidong tanishir shia nungi ajok ajak agi terana, nisung shia ajok nungji pei tenüng züluang.

³Levi ajok nungji nai Aron tenüng zülutsüla. Parnok kidong shia tanishir ka ka shia ajok ka ka alitsü.

⁴Aser sentep süki kechi nung ni ne den ajuruteper yangji Ozüng Süngden madang nai itemji yujang.

⁵Nisung shiba ni shimteter pa ajok nungji temechi adoktsü, aser Israel nunger nemnemba koba parnoki ni anema nemnemer aji ni anendaktsütsü.”

⁶Anungji Mosai Israel chirtem dang jembi, aser parnok tanishir ajaki pa nem ajok agütsütsü. Parnok kidong shia tanishir shiai ka ka oda ajok terana; aser parnok ajok rongnung Aron ajoka liasü.

⁷Mosai Ozüng Süngden süki nung KIBUBA madang itemji ataloka yutsü.

⁸ Tasüngji Mosai Ozüng Süngden süki jaki ai, aser Aron ajok koba Levi kidong asoshi liasü, idakji temechi adoka tepen apung aser almond süngjang tamen atang.

⁹Idangji Mosai KIBUBA madang nungi ajok ajakji Israel chirtem dangi bener adok. Parnoki aji reprang aser nisung shiai pei ajok agi.

¹⁰Aser KIBUBAi Mosa dang ashi “Ozüng Süngden madang Aron ajokji anema apusortem anema temaitsü asütsü meyipa yuang. Iba yagi parnoki ni anema nemnemba tatem kümdaktsütsü, anungji parnok masütsü.”

¹¹KIBUBAi melaba ama Mosai ajak inyak.

¹²Aser Israel chirtemi Mosa dang ashi, “Ajiang, onok tesamar, onoka makaka, onok ajak makaka.

¹³Anasa arur nisung shia KIBUBA tekülemdak süki anasa arurbo asür aser asenok ajak samatsü asü?”