Read njo ZÜNGDANGBA 18 Bible Online

ZÜNGDANGBA 18 - njo bible

ZÜNGDANGBA 18

¹KIBUBAi Aron dang ashi, “Ne jabasotem aser nebu kinungertemi tekülemdak aibelenba ajak abentsü; aser putir mapa nung aibelenba ajak asoshi na aser ne jabasotemi dang abentsü.

²Nebu kinunger Levi kin ne adianutem ne den yariteptsü asoshi ne den anir arung, aser na aser jabasotemi Ozüng Süngden jakdang tenzüktsü.

³Parnoki na aser süki mapa ajak anebalutsü, saka parnok aser na masütsü asoshi parnoki tekülemdak oset-tsüset aser tenladak anasa marutsüla.

⁴Parnoki ne den yaritepa sentep süki mapa inyaktsü saka tangar nisung shinga nenok alidak anasa marutsüla.

⁵Aser Israel chirtem madak ain adokba malitsü asoshi nenoki tekülemdak aser tenladakji reprangtsüla.

⁶Aser ajiang, ni ne adianu Levi nunger Israel chirtem nungi shimtetogo; ni asoshi parnokji KIBUBA dang sentep süki mapa inyaktsü agütsüba sempet lir.

⁷Aser na aser ne jabasotemi dang tenladak kechisarena mapa aser teyindangba sü telunglen putir mapa inyaktsü, aser itemji nenoki reprangtsü; ni nenok nem putir mapaji sempet ama agütsüba lir saka tangar nisung shibai ibaji anasa arudir südaktsütsü.”

⁸Idangji KIBUBAi Aron dang ashi, “Ajiang tenladak kü nem agütsüba ajak madak ketdang asütsü ni ne nem agütsür. Israel nungeri agütsüba temeshi tenla ajak ni na aser jabasotem nem teti atema shilem asütsü agütsür.

⁹Mi nung merongi anüngzükba temeshitiba tenlatemji ne shilem asütsü. Kü nem agütsüba sempet ajak nungi temeshitiba tenlatem, chiyungtsü süshia, temenen tenla süshia, mesüra tai tenla süshia, item ajakji na aser ne jabasotem asoshi alitsü.

¹⁰Ajak dang temeshitiba amato aji chiang, tebur shiai aji achitsüla. Nai aji temeshi ta züngshiang.”

¹¹“Ano ibai ne meyong alitsü: parnok tenla, sempet oda Israel chirtem tayipshiba tenla ajak na aser ne jabasotem asoshi teti shilem asütsü ni agütsüogo. Ne kidang shirsa merükteta ali parnoki aji achitsü.

¹²Totzü tajungtiba aser yi aser tsük tajungtiba ajak, mezüng süngjang koba parnoki KIBUBA nem agütsür aji ne nem agütsüogo.

¹³Parnok linük nung amenba süngjang koba parnoki KIBUBA dangi bener arur, aji ne meyong alitsü, ne kidong merüka alir shiai aji achitsü.

¹⁴ Israel nungeri kü nem bendanga agütsüba ajakji ne meyong alitsü.

¹⁵“Kechisarena mezüng nu menden lapokba, nisung süshia, shiruru süshia, koba KIBUBA nem agütsüogo aji ne meyong alitsü, saka mezüng asoba jabaso aser mezüng mepuba memerükba shiruru ajak nai alangzüktsüla.

¹⁶Parnokji ita ka tain asüdang talangzükba jenjang tekülemdak amshiba amato yongmenyin sen pungu agi alangzüktsüla.

¹⁷Saka mezüng mepuba nashi, san mesüra nabong, itemji nai malangzüktsüla, parnokji temeshi lir. Parnok züji tenladak rüklokjang, aser aji KIBUBA dang teronem tanang asoshi mi agi tenlaba alitsü.

¹⁸Parnok shiji ne meyong alitsü, oda tayipshiba tenla mamalong aser tajichi tepi, aji ne meyong alitsü.

¹⁹“Temeshi oset tenla ajak koba Israel chirtemi KIBUBA dang tenlar aji na aser ne jabaso jalatem nem teti shilem asoshi agütsüogo. Ibai KIBUBA madang teti tatem makaba tezüngzüktepba na aser ne kinungertem den alitsü.”

²⁰Aser KIBUBAi Aron dang ashi, “Parnok linük nung na kecha senmang malitsü, mesüra parnok rongnung na shilem kecha makatsü; Israel chir rongnung na shilem aser ne senmangji ni lir.”

²¹ KIBUBAi ashi, “Ajiang, ni Levi chir nem oda sentep süki nung parnoki tenzükba mapa taa, Israel nunger tershilem ajak senmangtsü agütsüogo.

²²Tang nungi Israel chirtemi parnok temenen menar masütsü asoshi sentep süki anasa marutsüla.

²³Saka Levitemi sentep süki mapa inyaktsü, aser parnoki pei tai menaba abentsü; aser parnok putu songtema aji teti asoshi ozüng alitsü, aser Israel chir rongnung parnok senmang makatsü.

²⁴Kechiyong Israel chir ter shilem koba parnoki KIBUBA nem tenla agütsür, aji ni Levitem nem senmangtsü asoshi agütsüogo. Anungji ni parnok dang shiogo Israel chir rongnung parnok senmangtsü maka.”

²⁵Idangji KIBUBAi Mosa dang ashi,

²⁶“Nai Levitem dang shiang, kodang nenoki Israel chirtem nungi nenok senmangtsü parnok nungi ter shilem agizükdir, idangji nenoki KIBUBA asoshi ter shilem nungi ter shilem agütsütsüla.

²⁷Nenok tenlaji motsüngnem nung aliba tsük mesüra temenüngdak aliba tsükmenatzü ama züngshitsü.

²⁸Yamaji nenoki Israel chirtem nungi alangzükba ter shilem ajak nungi KIBUBA dang tenlatsüla. Item ter shilem nung jagi KIBUBA shilemji nenoki Aron putir nem agütsütsüla.

²⁹Nenok nem agütsüba ajak nungi tajungtiba aser temeshitibaji KIBUBA nem agütsütsüla.

³⁰Anungji nai parnok dang ashitsü, kodang nenoki tajungba tenladir idangji Levitem asoshi motsüngnem nungi anguba ama, aser tsükmenatzü menüngdak nungi anguba ama aji züngshitsü.

³¹Aji nenoki ajaklen, nenok aser nenok kinungeri achitsü; kechiyong sentep süki nung nenok mapa asoshi meyipa anguba nenok asoshi tajangzükji ya lir.

³²Iba nungi tajungtiba shilem agütsüba ajanga nenok temenen malitsü, saka nenok masütsü aser Israel chirtemi agütsüba temeshi tenlaji nenoki memenentsüla.”