Read njo ZÜNGDANGBA 19 Bible Online

ZÜNGDANGBA 19 - njo bible

ZÜNGDANGBA 19

¹KIBUBAi Mosa aser Aron dang ashi,

²“Ibai KIBUBAi melaba yimsü ozüngji lir; Israel chirtemi nashi temerem ka tarak mesüra pungmen maket aser kodanga süngra meyokdangba ka ne dangi anir arung ta shiang.

³Nai aji Eleazar putir nem agüjang, aser aji tenladak kimaleni anir adoka pa madang tepsettsüla.

⁴Aser Eleazar putiri iba züji pei temeyong agi bena arur sentep süki tejaklen tsütsü tenetben rükloktsütsü.

⁵Idangji pa madang nashi teküp, shi, azü aser janaji arongtsü.

⁶Putiri cedar süng esop aser jakja-a meremba oset kar agia itemji nashi arongba tiyong nungji enoktsütsü.

⁷Ajiser putiri pei süoshi shitoktsü aser pai tzü chigutsü iba sülenang pai tanendaki aitsü, aser putirji nikongdang matong tashi memerüki alitsü.

⁸Shibai aji rongdir pai pei süoshi shitoktsü, aser tzü chigutsü aser nikong dang tashi memerüki alitsü.

⁹ Merükteta aliba nisung kati nashi arongba autji bendentsü aser tanendak kimalen temerükdak toktsütsü. Itemji Israel chirtem teloki merüktettsü atema tzü asoshi ayutsü. Ya temenen nungi meshitetba asoshi alitsü.

¹⁰Shibai nashi autji bendendir, pai pei süoshi shitoktsü, aser pa nikong dang tashi memerüki alitsü. Ibai Israel chirtem aser bendanger shir nenok den amunger, ajak asoshi teti atema yimsü ozüng ka alitsü.

¹¹“Shibai nisung tasü mang dak kongshidir anogo tenetnü tashi memerüki alitsü.

¹²Pai pei sasa anogo asemnübuba aser tenetnübuba nung tzü nung meshitettsüla; idangji pa merüka alitsü. Saka pai tasemnü aser tenetnübuba nung pei sasa memeshitetra, pa merüka makümtsü.

¹³Shibai nisung tasümang dak kongshir memerüki lidir aser KIBUBA tekülemdak süki menentsüdir; iba nisungji Israel nungi jentoktsüla. Kechiaser merüktettsüba tzüji pa dak merüklok, pa memerüki alitsü; pa memerükbaji ano pa dak alitsü.

¹⁴“Kodang nisung ka süki nung südir iba atema ozüng ya alitsü: Süki-i aitba nisung shiba aser süki nung aliba nisung shia anogo tenet memerüki alitsü.

¹⁵Chipo-anpo kobasa tenembangtsü keta mali aser lapoka lir ajia memerüki alitsü.

¹⁶Shibai moapu nung nok agi tepsetba mesüra odang asüba dak kongshidir, mesüra nisung teret dak mesüra leper dak kongshidir, anogo tenetnü memerüki alitsü.

¹⁷“Memerükba nisung asoshi merüktetdaktsüba tenla arongba nungi aut kar agiteta po ka nung enoktsü aser iba ma nung tzü temerük enokang.

¹⁸Idangji merükteta aliba nisung kati esop agia aji tzü nungji metener süki aser idakji aliba osettsüset ajak aser idakji aliba nisung ajak dak rükloktsütsü. Ano shibaisa nisung teret dak mesüra tepseta aliba dak, mesüra yimya agi asüba dak kongshir, parnok dak pai rükloktsütsüla.

¹⁹Nisung shiba merükteta ali pai memerükba nisung dakji tasemnübuba aser tenetnübuba nung rükloktsütsüla. Aser tenetnübuba nung pai pa meshitettsütsü. Nisung shiba merüka lir pai pei süoshi shitoktsü aser tzü chigutsü aser nikongdang tashi pa-a memerüki alitsü.

²⁰“Saka nisung shiba memerüki lidir, aser pei sasa memeshiteter, iba nisung telok rongnungi jentoktsü, kechiaser pai KIBUBA tekülemdak menentsüogo: memerükba tzü pa dak merükloktsü, paji memerüki lir.

²¹Aser parnok asoshi aji teti yimsü alitsü, aser shibai memerükba tzü dakji kongshidir nikongdang tashi memerüki alitsü.

²²Aser memerükba nisungi kechi daksa kongshidir memerüki alitsü, aser nisung shibai iba dak kongshidir nikongdang tashi memerüki alitsü.”