Read njo ZÜNGDANGBA 20 Bible Online

ZÜNGDANGBA 20 - njo bible

ZÜNGDANGBA 20

¹Mezüngbuba ita nung Israel nunger telok ajak Zin lisem lima arem atong, aser nisungtemi kadesh nung ali. Yangji Miriam asü aser arem.

²Yangji telok asoshi tzü maliasü, aser nisungtemi külemi Mosa aser Aron anema sentep.

³Parnoki Mosa den toktepba ashi, “KIBUBA madang onok adianutem asüdangto onoka sür lilasang;

⁴Kechiba nai KIBUBA er telok onok aser onok kiset shirurutem südaktsütsü yagi anir aru?

⁵Kechiba nai Ijip lima nungi onok aniteta iba samesa lima yagi anir aru? Yangi tsük mesüra munguzünu, tsükmenatzü mesüra jarem kecha mali. Aser yangi tajemtsü tzüa maka.”

⁶Idangji Mosa o Aron nati telok tsüngdang nungi oa sentep süki kikümbangi ia parnok tejak mechiok; aser KIBUBA sentsüwangshi parnok dangi adok.

⁷KIBUBAi Mosa dang ashi,

⁸ “Ajokji agiang aser nedi Aron nenati telokji külemi sentepdakjang. Parnok jakdang lung nungjagi tzü adokdaktsütsüsa jembiang. Iba lung nungjagi nai tzü adokdakjang, aji parnok aser parnok kiset shirurutem atema tajemtsü alitsü.”

⁹Aser pai melaba ama Mosai KIBUBA madang nungi ajokji agi.

¹⁰Mosa o Aron nati lung jakdangji telokji sentepdaktsü, aser Mosai parnok dang ashi, “Nenok anema apusortem angang; onoki nenok asoshi iba lung nungi tzü adokdaktsütsü asü?”

¹¹Idangji Mosai teka mekanga pa ajok agi lung dakji anaben azük, aser tzü jenti adoka parnok aser parnok kiset shirurutem ajak ajem.

¹²Saka KIBUBAi Mosa o Aron dang ashi, “Israel chirtem nükdang nenoki ni meshiteta ayutsü kü dak mamang nungji ni parnok nem agütsüba lima jagi nenoki parnok anir marutsü.”

¹³Ibai Meriba nung atalok, kong Israel chirtemi KIBUBA den toktep, aser kaji parnok rongnung pa temeshi ta pa sasa sayu.

¹⁴Kadesh nungi Mosai osangbenertem Edom chuba dangi yok. Parnoki ashi, “Ne adianu Israeli yamai ashir, onok dak atalokba timtem ajak nai meteter.

¹⁵Ozü tetsü-teboutem Ijipi alu, aser onok idakji küm aika ali, aser Ijip nungeri onok aser onok tsüraburtem dang mejungi benshi,

¹⁶saka onoki kodang KIBUBA dang ayimten, pai onok ola angashi, aser kotak tenyar ka yoka onok Ijip nungi anitet. Tang onok ne arrtsü tatembang nung aliba kadesh yimti nung lir.

¹⁷Yimlibilema onok ner lima ajanga odakjangma. Onoki alu mesüra tsükmenatzü lu ajanga maotsü, mesüra tzübu nungi tzü majemtsü. Onoki chubar alimang leni dang aotsü, aser ne arrtsü ajanga mao tashi onoki tajichileni mesüra tabeleni memeyiptsü.”

¹⁸Saka Edom nungeri langzü, “Nenoki ya ajanga süitsü temerang, yamaji mesüra ni nenok anema nok bener arutsü.”

¹⁹Ano Israel chirtemi ashi, “Onoki alimang jagi dang aotsü, onok aser onok kiset shirurutemi ner tzü jemra, iba atema onoki jenjang agütsütsü. Onok odang süidakjangma.”

²⁰Saka pai langzü, “Nenoki aji ajanga mesüitsüla.” Idangji Edomi Israel chirtem anema tashi tait nisung aika den aru.

²¹Edomi pa arrtsü atena aotsü memela nung Israel chirtemi parnok nungi meyipa oadok.

²²Israel chirtem telok ajak kadesh nungi apusoa Hor tenemi aru.

²³Hor tenem nung KIBUBAi Mosa aser Aron dang ashi,

²⁴“Ni Israel chirtem dang nangzükba limai Aron maitsü. Pa asütsü, kechiaser Meriba tzü nung nenati kü temelaba ozüng anema noktak.

²⁵Aron aser pa jabaso Eleazar anir Hor tenem jagi tuang,

²⁶aser Aron putir sobutsüji sepzüka aji par jabaso Eleazar nem semdakjang; kechiaser Aron pei pur den atentsü, pa idakji asütsü.”

²⁷KIBUBAi melaba ama Mosai inyak, aser telok ajaki ngua parnok Hor tenemi atu.

²⁸Mosai Aron sobutsüji sepzüka aji pa jabaso Eleazar nem sobudaktsü. Aser tenem kolak nungji Aron asü. Idangji Mosa aser Eleazar tenem nungi alu.

²⁹Kodang telok ajaki Aron süogo ta angashi, Israel kidong ajongai Aron asoshi anogo semer mang ayim.